Nashik : नाशिकमध्ये ५७ हजार कोटींची गुंतवणूक ! ८ प्रकल्पांतून २४ हजार रोजगारनिर्मितीची क्षमता निर्माण होणार

Nashik : महाराष्ट्र शासनाच्या ‘इन्व्हेस्ट महाराष्ट्र’ उपक्रमांतर्गत मुख्यमंत्री देवेंद्र फडणवीस यांच्या उपस्थितीत झालेल्या सामंजस्य करारांमधून नाशिक जिल्ह्यासाठी तब्बल ५७ हजार १२० कोटी रुपयांच्या प्रस्तावित गुंतवणुकीचे आठ प्रकल्प समोर आले आहेत. या प्रकल्पांच्या माध्यमातून सुमारे २४ हजार १२५ रोजगारनिर्मितीची क्षमता निर्माण होण्याची शक्यता आहे. नाशिकसाठी यापूर्वी प्रस्तावित असलेल्या सुमारे ३५ हजार कोटी रुपयांच्या गुंतवणुकीव्यतिरिक्त ही नवी गुंतवणूक असल्याने जिल्ह्याच्या औद्योगिक विकासाला मोठी चालना मिळण्याची शक्यता व्यक्त केली जात आहे.

सेमीकंडक्टरपासून संरक्षण क्षेत्रापर्यंत गुंतवणूक

नाशिकची ओळख पारंपरिक उत्पादन उद्योगांचे महत्त्वाचे केंद्र म्हणून आहे. मात्र, प्रस्तावित नव्या गुंतवणुकीमुळे जिल्ह्याच्या औद्योगिक क्षेत्रात वैविध्य वाढण्याची शक्यता आहे. सेमीकंडक्टर, डेटा सेंटर, माहिती-तंत्रज्ञान, इलेक्ट्रॉनिक्स, एरोस्पेस व संरक्षण, रसायने आणि पुनर्वापर यांसारख्या उच्च तंत्रज्ञानाधारित क्षेत्रांमध्ये गुंतवणूक प्रस्तावित आहे. या प्रकल्पांमुळे नाशिकच्या औद्योगिक वाटचालीला नवी दिशा मिळण्याची शक्यता आहे.

मोठ्या उद्योगांच्या आगमनामुळे थेट रोजगाराबरोबरच स्थानिक पुरवठा साखळी, लघू व मध्यम उद्योग, सेवा क्षेत्र, वाहतूक, लॉजिस्टिक्स आणि कौशल्यविकासाच्या संधींनाही चालना मिळू शकते. नाशिकमध्ये आधीपासूनच मोठ्या उद्योगांसोबत लघू, मध्यम आणि पूरक उद्योगांचे जाळे असल्याने नव्या प्रकल्पांमुळे स्थानिक उद्योगांना पुरवठादार म्हणून संधी निर्माण होण्याची शक्यता आहे.

चांदवड, दिंडोरीतही प्रकल्पांची शक्यता

प्रस्तावित गुंतवणुकीतील काही प्रकल्प नाशिकसह चांदवड आणि दिंडोरी भागात येण्याची शक्यता आहे. त्यामुळे औद्योगिक विकासाचा विस्तार शहरापुरता मर्यादित न राहता जिल्ह्याच्या विविध भागांमध्ये होण्याची शक्यता आहे. या गुंतवणुकीचा परिणाम संबंधित प्रकल्पांपुरता मर्यादित न राहता नाशिकच्या एकूण औद्योगिक परिसंस्थेवर होऊ शकतो. स्थानिक व्यवसाय, पूरक उद्योग आणि रोजगारनिर्मितीला त्यातून हातभार लागू शकतो.

उद्योग संघटनांचा सहभाग

‘इन्व्हेस्ट महाराष्ट्र’ उपक्रमात नाशिकमधील उद्योग संघटनांचे प्रतिनिधी सहभागी झाले होते. ‘निमा’चे अध्यक्ष आशिष नहार, सचिव राजेंद्र अहिरे, ‘आयमा’चे अध्यक्ष राजेंद्र पानसरे आणि सरचिटणीस संजय महाजन यांनी उद्योगमंत्री उदय सामंत तसेच एमआयडीसीच्या वरिष्ठ अधिकाऱ्यांसमोर नाशिकमधील औद्योगिक विकासाच्या विविध मुद्द्यांवर चर्चा केली.

“इन्व्हेस्ट महाराष्ट्र’ उपक्रमांतर्गत मुख्यमंत्र्यांच्या उपस्थितीत झालेल्या करारांमधून नाशिकसाठी ५७ हजार १२० कोटी रुपयांची गुंतवणूक प्रस्तावित होणे ही बाब महत्त्वाची आहे. सेमीकंडक्टर, डेटा सेंटर, माहिती-तंत्रज्ञान, इलेक्ट्रॉनिक्स, एरोस्पेस व संरक्षण, रसायने आणि पुनर्वापर यांसारख्या क्षेत्रांतील गुंतवणुकीमुळे नाशिकच्या औद्योगिक वाटचालीला नवी दिशा मिळू शकते. नाशिकसह चांदवड आणि दिंडोरीमध्ये प्रकल्प प्रस्तावित असल्याने जिल्ह्याच्या विविध भागांत औद्योगिक विकासाला चालना मिळण्याची शक्यता आहे.”— राजेंद्र पानसरे, अध्यक्ष, आयमा

गुंतवणुकीचे प्रत्यक्ष प्रकल्पांत रूपांतर महत्त्वाचे

सामंजस्य करारांद्वारे मोठ्या गुंतवणुकीची घोषणा झाल्यानंतर संबंधित प्रकल्प प्रत्यक्षात आणण्यासाठी जमीन, पायाभूत सुविधा, वीज, पाणी, रस्ते, विविध परवानग्या, कुशल मनुष्यबळ आणि प्रशासकीय समन्वय या बाबी महत्त्वाच्या ठरणार आहेत. त्यामुळे प्रस्तावित ५७ हजार १२० कोटी रुपयांची गुंतवणूक प्रत्यक्ष प्रकल्पांमध्ये रूपांतरित करण्यासाठी शासन, प्रशासन आणि उद्योग क्षेत्रातील समन्वय निर्णायक ठरणार आहे.

ठळक आकडेवारी

- प्रस्तावित नवी गुंतवणूक : ५७ हजार १२० कोटी रुपये

- प्रस्तावित प्रकल्प : ८

- संभाव्य रोजगारनिर्मिती : २४ हजार १२५

- यापूर्वीची प्रस्तावित गुंतवणूक : सुमारे ३५ हजार कोटी रुपये

- प्रमुख क्षेत्रे : सेमीकंडक्टर, संरक्षण, माहिती-तंत्रज्ञान, डेटा सेंटर, इलेक्ट्रॉनिक्स, एरोस्पेस, रसायने व पुनर्वापर

‘निमा’कडून शासनाचे आभार

नाशिकमध्ये प्रस्तावित गुंतवणुकीसाठी मुख्यमंत्री देवेंद्र फडणवीस यांचे आभार. नाशिकला देशातील प्रमुख गुंतवणूक केंद्र बनविण्यासाठी निमा सातत्याने विकासाच्या संधी शासनासमोर मांडत आहे. प्रस्तावित गुंतवणुकीचे प्रत्यक्ष प्रकल्पांमध्ये रूपांतर होण्यासाठी उद्योग, शासन आणि प्रशासनाच्या समन्वयातून आवश्यक ते सर्व सहकार्य करण्यासाठी निमा कटिबद्ध आहे असे निमा आशिष नहार यांनी म्हटले आहे.