मेलबर्न : ऑस्ट्रेलियन महिला क्रिकेट संघाची आघाडीची वेगवान गोलंदाज मेगन शट हिच्यावर क्रिकेट ऑस्ट्रेलियाने (CA) मोठी शिस्तभंगाची कारवाई केली आहे. औषधोपचार आणि वैद्यकीय मार्गदर्शक तत्त्वांच्या नियमांचे उल्लंघन केल्याप्रकरणी तिच्यावर दोन सामन्यांची बंदी घालण्यात आली आहे. या धक्क्यानंतर मेगन न्यूझीलंडविरुद्धच्या आगामी मालिकेतील शेवटच्या सामन्यासह 'विमेन्स बिग बॅश लीग' (WBBL) च्या हंगामातील पहिल्या सामन्यालाही मुकणार आहे. या अचानक झालेल्या कारवाईमुळे क्रिकेट वर्तुळात मोठी खळबळ उडाली असून खेळाडूंमध्येही एकच चर्चा रंगली आहे.
नियमांचे उल्लंघन भोवले
मेगन शटने वैद्यकीय सल्ल्यानुसार घेतल्या जाणाऱ्या औषधांच्या वापराबाबतच्या नियमांचे पालन न केल्याचे समोर आले आहे. क्रिकेट ऑस्ट्रेलियाने स्पष्ट केले आहे की, ही घटना स्पर्धा सुरू नसताना घडली असून याचा खेळातील कामगिरी सुधारण्यासाठी किंवा डोपिंगशी (Doping) कोणताही संबंध नाही. मात्र, 'स्पोर्ट्स सायन्स अँड स्पोर्ट्स मेडिसिन'च्या मार्गदर्शक तत्त्वांचे पालन न केल्यामुळे ही कारवाई अपरिहार्य ठरली. या दोन सामन्यांच्या बंदीमध्ये सर्व प्रकारच्या आंतरराष्ट्रीय आणि देशांतर्गत क्रिकेटचा समावेश आहे.
क्राइस्टचर्च (न्यूझीलंड) : न्यूझीलंडविरुद्धच्या पहिल्या टी-20 सामन्यात भारतीय फलंदाजांनी धावांचा पाऊस पाडत शानदार विजय मिळवला. न्यूझीलंडने प्रथम ...
मेगन शटने मागितली जाहीर माफी
क्रिकेट ऑस्ट्रेलियाने घेतलेला हा निर्णय मेगन शटने तात्काळ आणि विनाअट स्वीकारला आहे. आपल्या चुकीची कबुली देत मेगनने एक जाहीर निवेदन जारी केले आहे. "मला देण्यात आलेली शिक्षा मी पूर्णपणे स्वीकारते. माझ्याकडून अपेक्षित असलेले मानक पाळण्यात जे अपयशी ठरले, त्याबद्दल मी मनापासून माफी मागते," असे तिने म्हटले आहे. खेळाडूंना अशा नियमांबद्दल नियमितपणे माहिती दिली जाते आणि जबाबदारी पार पाडणे आपलेच कर्तव्य होते, याची जाणीव तिने व्यक्त केली आहे.
क्रिकेट बोर्डाची भूमिका आणि पाठिंबा
या संपूर्ण प्रकरणानंतर क्रिकेट ऑस्ट्रेलियाने खेळाडूंसाठी कडक नियमावली असल्याचे पुन्हा एकदा अधोरेखित केले आहे. बोर्डाने आपल्या निवेदनात म्हटले आहे की, आम्ही आमच्या खेळाचे प्रतिनिधित्व करणाऱ्या प्रत्येक खेळाडूकडून उच्च दर्जाच्या शिस्तीची अपेक्षा करतो. तसेच, या कठीण काळात मेगन शटला आवश्यक तो सर्व, मानसिक आणि तांत्रिक पाठिंबा देणे सुरूच ठेवणार असल्याचे बोर्डाने स्पष्ट केले आहे.