Nashik : नाशिक शहरातील विनयनगर चौक परिसरात रविवारी सकाळी साडेअकराच्या सुमारास सिटी लिंक बसच्या अपघाताची घटना घडली. गतिरोधकावरून भरधाव वेगात बस गेल्याने बसचा दरवाजा अचानक उघडला आणि दरवाजाजवळ उभा असलेला वाहक थेट रस्त्यावर फेकला गेला. या घटनेत वाहक गंभीर जखमी झाला असून, त्याला तातडीने रुग्णालयात दाखल करण्यात आले. प्रसंगावधान राखणाऱ्या नागरिकांनी चालकाचे लक्ष वेधल्याने संभाव्य मोठा अनर्थ टळला.
गतिरोधकावर बस आदळली; वाहक थेट रस्त्यावर कोसळला
माहितीनुसार, संबंधित सिटी लिंक बस साईनाथ चौफुलीकडे जात होती. पंचमुखी हनुमान मंदिराजवळील गतिरोधकावरून बस वेगाने गेल्याने तिला जोरदार धक्का बसला. याच वेळी बसचा दरवाजा अचानक उघडला आणि दरवाजाजवळ उभा असलेला वाहक रस्त्यावर पडला. वाहक बसमधून खाली पडल्याचे चालकाच्या तत्काळ लक्षात आले नाही. मात्र, रस्त्यावर उपस्थित असलेल्या नागरिकांनी आरडाओरडा करून चालकाला सावध केले. त्यानंतर बस थांबविण्यात आली. जखमी वाहकाला नागरिकांच्या मदतीने तातडीने रुग्णालयात उपचारांसाठी दाखल करण्यात आले.
नाशिकमध्ये सिटी लिंक बसचा थरार ! बसमधून वाहक रस्त्यावर पडल्याने गंभीर जखमी
.
.
#Nashik #Nashikcitylink #Prahaarnewsline #marathinews #Nashiknews https://t.co/roFNreI2XH
— Prahaar Newsline (@PrahaarNewsline) October 26, 2026
सिटी लिंक बसच्या वेगावर पुन्हा प्रश्नचिन्ह
नाशिक शहरातील नागरी वस्त्यांमधून धावणाऱ्या सिटी लिंक बसच्या वेगाबाबत यापूर्वीही नागरिकांकडून तक्रारी होत असल्याचे सांगितले जाते. अरुंद रस्ते, चौक आणि गतिरोधक असलेल्या भागांतही बस वेगाने चालविल्या जात असल्यास पादचारी, दुचाकीस्वार आणि बसमधील प्रवाशांच्या सुरक्षिततेला धोका निर्माण होऊ शकतो. विनयनगर परिसरातील या घटनेमुळे बसचालकांकडून वेगमर्यादेचे पालन केले जाते का, बसचे दरवाजे सुरक्षित आहेत का आणि प्रवाशांसह वाहकांच्या सुरक्षेसाठी पुरेशा उपाययोजना केल्या आहेत का, असे प्रश्न उपस्थित होत आहेत.