ठाणे : प्रदीप पुर्णेकर यांच्या हत्या प्रकरणावरून राजकारण करणे दुर्दैवी असल्याचे मत उपमुख्यमंत्री एकनाथ शिंदे यांनी व्यक्त केले आहे. या प्रकरणाची निष्पक्ष चौकशी करण्याचे निर्देश आपण घटनेनंतर तत्काळ ठाणे पोलीस आयुक्तांना दिले होते, असेही त्यांनी स्पष्ट केले. शिवसेना पुर्णेकर कुटुंबीयांच्या पाठीशी ठामपणे उभी असून, या प्रकरणात जे कोणी दोषी असतील त्यांच्यावर कायद्यानुसार कारवाई झाली पाहिजे, अशी भूमिका उपमुख्यमंत्री एकनाथ शिंदे यांनी मांडली.
मीनाक्षी शिंदेंचा राजीनामा माझ्याकडे
मीनाक्षी शिंदे यांनी आपल्या पदाचा राजीनामा आपल्याकडे पाठवला असल्याची माहिती उपमुख्यमंत्री एकनाथ शिंदे यांनी दिली. प्रदीप पुर्णेकर हत्या प्रकरणाशी आपले नाव वारंवार जोडले जात असल्याने त्यांनी आपल्या भावना व्यक्त करत हा निर्णय घेतल्याचे शिंदे म्हणाले. या घटनेचा उल्लेख राजीनामा पत्रातही करण्यात आल्याचे त्यांनी सांगितले.
‘तपास निष्पक्ष झाला पाहिजे’
हत्या प्रकरणाबाबत बोलताना उपमुख्यमंत्री एकनाथ शिंदे म्हणाले की, ही घटना अत्यंत दुर्दैवी आणि दुःखद आहे. मात्र, या घटनेचे राजकीय भांडवल करणे त्याहून अधिक दुर्दैवी आहे. या प्रकरणात पोलिसांनी आरोपींना अटक केली असून, शस्त्रही जप्त करण्यात आले आहे. पुढील तपास सुरू असल्याचे त्यांनी सांगितले. “घटना घडल्याच्या पहिल्याच दिवशी मी स्वतः पोलीस आयुक्तांना फोन करून या प्रकरणाचा तपास निष्पक्षपणे झाला पाहिजे, असे सांगितले. कोणालाही पाठीशी घालण्याचे कारण नाही,” असे उपमुख्यमंत्री एकनाथ शिंदे यांनी स्पष्ट केले. तपास यंत्रणेवर दबाव आणण्याऐवजी पोलिसांना त्यांचे काम करू द्यावे आणि जनतेनेही संयम राखावा, असे आवाहन त्यांनी केले. पुर्णेकर कुटुंबीयांच्या दुःखात आपण सहभागी असून, दोषींवर कारवाई झाली पाहिजे, असेही त्यांनी नमूद केले.
राज्यातील ॲप आधारित प्रवासी वाहतूक सेवा अधिक सुरक्षित, पारदर्शक आणि सुव्यवस्थित करण्यासाठी ॲग्रीगेटर कंपन्यांच्या वाहनांची, चालकांची आणि ...
ठाण्यातील कायदा-सुव्यवस्थेवरही भाष्य
ठाण्यातील कायदा-सुव्यवस्थेच्या प्रश्नावर बोलताना उपमुख्यमंत्री एकनाथ शिंदे यांनी काही घटनांबाबत नाराजी व्यक्त केली. बाहेरून येणाऱ्या काही लोकांकडून ठाणेकरांना त्रास दिला जात असल्याचा आरोप त्यांनी केला. जाळपोळ, महामार्ग बंद करणे, नौपाडा परिसरात पोलिसांवर दगडफेक होणे आणि त्यात पोलीस जखमी होणे, या प्रकारांचा त्यांनी उल्लेख केला. ठाणेकरांच्या शांततेला धक्का लागू दिला जाणार नाही. कायदा-सुव्यवस्था अबाधित राखणे ही सरकारची जबाबदारी आहे. वाहतूक कोंडीमुळे नागरिकांना त्रास होऊ नये, याची काळजी घेण्याच्या सूचनाही दिल्याचे उपमुख्यमंत्री एकनाथ शिंदे यांनी सांगितले.
‘शिवसेना कायम युतीधर्म पाळते’
विधान परिषद निवडणुकीच्या पार्श्वभूमीवर शिवसेना-भाजप युतीबाबतही एकनाथ शिंदे यांनी भूमिका स्पष्ट केली. शिवसेना कायम युतीधर्माचे पालन करते आणि युतीतील घटकांनीही त्याचे पालन केले पाहिजे, असे ते म्हणाले. काही ठिकाणी मैत्रीपूर्ण लढती झाल्या असल्या, तरी या निवडणुकीत शिवसेनेने युतीधर्म पाळल्याचे उपमुख्यमंत्री एकनाथ शिंदे यांनी नमूद केले. पुर्णेकर हत्या प्रकरणाचा तपास निष्पक्षपणे व्हावा आणि दोषींवर कायद्यानुसार कारवाई व्हावी, या भूमिकेचा त्यांनी पुनरुच्चार केला.