Political News: कर्जत येथील प्रस्तावित पंप स्टोरेज प्रकल्पावरून सुरू असलेल्या वृक्षतोडीच्या वादात भाजपचे मुंबई अध्यक्ष आणि आमदार अमित साटम यांनी ठाकरे बंधू आणि काँग्रेसवर निशाणा साधला आहे. मध्य वैतरणा धरणाच्या बांधकामासाठी झालेल्या वृक्षतोडीच्या बदल्यात बीड जिल्ह्यातील 13 गावांमध्ये 2 लाख झाडे लावण्यात आल्याचा दावा करत, ठाकरे बंधू आणि काँग्रेसने त्या ठिकाणी जाऊन झाडे दाखवावीत, असे आव्हान साटम यांनी दिले.
वृक्षतोडीच्या मुद्द्यावरून ठाकरे बंधूंना प्रत्युत्तर
शुक्रवारी भाजप प्रदेश कार्यालयात आयोजित पत्रकार परिषदेत अमित साटम यांनी कर्जत येथील प्रस्तावित पंप स्टोरेज प्रकल्पावरून राज ठाकरे आणि आदित्य ठाकरे यांनी केलेल्या आरोपांना प्रत्युत्तर दिले. त्यांच्या म्हणण्यानुसार, मुंबई महापालिकेवर ठाकरे यांच्या शिवसेनेची सत्ता असताना मध्य वैतरणा धरणासाठी झालेल्या वृक्षतोडीच्या बदल्यात बीड जिल्ह्यातील 13 गावांमध्ये 540 हेक्टर क्षेत्रावर 2 लाख झाडे लावण्यासाठी महापालिकेने निधी खर्च केला होता.
या वृक्षलागवडीच्या ठिकाणी ठाकरे बंधू आणि काँग्रेसच्या नेत्यांनी भेट द्यावी आणि प्रत्यक्ष परिस्थिती जनतेसमोर मांडावी, असे साटम म्हणाले.
Pune News: पुणे जिल्ह्यातील इंदापूर तालुक्यातील बिजवडी येथे उड्डाणपुलाच्या कामादरम्यान मोठी दुर्घटना घडली. पुलाच्या कामासाठी करण्यात येत असलेला मातीचा ...
कर्जतचा प्रकल्प स्वच्छ ऊर्जेसाठी महत्त्वाचा असल्याचा दावा
कर्जत येथील प्रस्तावित पंप स्टोरेज प्रकल्प हा स्वच्छ ऊर्जेच्या निर्मितीसाठी महत्त्वाचा असल्याचे साटम यांनी सांगितले. हा 3,000 मेगावॅट क्षमतेचा प्रकल्प असून 377 हेक्टर क्षेत्रावर उभारला जाणार असल्याचा दावा त्यांनी केला. याच क्षमतेच्या औष्णिक वीज प्रकल्पासाठी अधिक जागा आणि मोठ्या प्रमाणावर वृक्षलागवड आवश्यक ठरेल, असेही त्यांनी नमूद केले.
शाश्वत विकास ही भाजपची बांधिलकी असून विरोधक पर्यावरणाच्या मुद्द्यावरून जनतेची दिशाभूल करत असल्याचा आरोपही त्यांनी केला. यावेळी त्यांनी बीड जिल्ह्यात वृक्षलागवडीसाठी निवडलेल्या 13 गावांमधील ठिकाणांची छायाचित्रे पत्रकार परिषदेत दाखवली.
विरोधकांवर राजकीय आरोप
भारताची अर्थव्यवस्था आणि ऊर्जा क्षेत्रातील प्रगतीचा उल्लेख करत साटम यांनी नवीन प्रकल्पांना विरोध करणाऱ्या राजकीय पक्षांवर टीका केली. काँग्रेस, शरद पवार यांच्या राष्ट्रवादी काँग्रेसचा गट, शिवसेना (उद्धव बाळासाहेब ठाकरे) आणि काही अभिनेत्यांवर त्यांनी प्रकल्पविरोधी भूमिका घेतल्याचा आरोप केला.
कर्जतच्या प्रकल्पातून गुजरातला वीज पुरवली जाणार असल्याचे कथानक पसरवले जात असल्याचा आरोपही त्यांनी राज ठाकरे यांच्यावर अप्रत्यक्षपणे केला. तसेच महाराष्ट्राच्या विकासाला विरोधक विरोध करत असल्याचा दावा त्यांनी केला.