मुंबई : भारतीय शेअर बाजाराची सुरुवात आज जोरदार तेजीसह झाली. मात्र, त्यानंतर बाजारात मोठे चढ-उतार पाहायला मिळाले. अमेरिकेतील तंत्रज्ञान कंपन्यांच्या समभागांमधील सुधारणेमुळे बाजाराने सकारात्मक सुरुवात केली होती. परंतु, उच्च पातळीवर गुंतवणूकदारांनी नफावसुली केल्याने दोन्ही प्रमुख निर्देशांकांनी सुरुवातीची आघाडी गमावली आणि बाजार लाल निशाणावर घसरला.
सत्रात मोठी उलथापालथ
बॉम्बे स्टॉक एक्स्चेंजचा (BSE) सेन्सेक्स 327.89 अंकांच्या मजबूत वाढीसह 81,327.29 वर उघडला. मात्र, काही वेळातच विक्रीचा दबाव वाढल्याने तो घसरून 80,519.31 या दिवसाच्या नीचांकी पातळीवर पोहोचला. याचप्रमाणे नॅशनल स्टॉक एक्स्चेंजचा (NSE) निफ्टीही 25,076.40 वरून घसरून 24,838.75 वर आला.
खरेदीच्या जोरावर बाजाराचे दमदार पुनरागमन
बाजारात घसरण सुरू असतानाच खालच्या स्तरावर खरेदीदारांनी जोरदार एंट्री केली. बँकिंग, औषधनिर्माण (फार्मा) आणि पायाभूत सुविधा क्षेत्रातील प्रमुख कंपन्यांच्या समभागांमध्ये मोठी खरेदी झाली. परिणामी, सेन्सेक्सने दिवसाच्या नीचांकी पातळीवरून तब्बल 587 अंकांची झेप घेतली. अखेर सेन्सेक्स 107.25 अंकांच्या (0.13%) वाढीसह 81,106.65 वर बंद झाला. तर निफ्टीनेही 58.25 अंकांची (0.23%) वाढ नोंदवत 25,044.65 वर सत्राचा समारोप केला.
Banking News: तुम्ही अजूनही बँकेच्या व्यवहारांसाठी चेकबुकचा वापर करता का? मग सोशल मीडियावर व्हायरल होणारा एक मेसेज तुमच्याही वाचनात आला असेल. 31 डिसेंबर 2026 नंतर ...
सरकारी बँकांच्या समभागांमध्ये सर्वाधिक तेजी
क्षेत्रनिहाय विचार करता, सरकारी बँकांच्या (PSU Bank) समभागांमध्ये सर्वाधिक 3.73% तेजी नोंदवण्यात आली. याशिवाय फार्मा आणि बँक निफ्टीमध्येही जोरदार वाढ झाली. दुसरीकडे, आयटी आणि एफएमसीजी क्षेत्रातील समभागांवर दिवसभर विक्रीचा दबाव कायम राहिला. त्यामुळे इन्फोसिसचा समभाग सर्वाधिक नुकसान सहन करणारा ठरला. याउलट, अपोलो हॉस्पिटल्सचा समभाग 1.42% वाढीसह सर्वाधिक नफा मिळवणारा ठरला. याशिवाय एसबीआय, आयसीआयसीआय बँक आणि एचडीएफसी बँकेच्या समभागांनीही बाजाराला सावरण्यात महत्त्वाची भूमिका बजावली.
दिवसभरातील मोठ्या चढ-उतारानंतर दोन्ही प्रमुख निर्देशांकांनी सकारात्मक पातळीवर बंद होत गुंतवणूकदारांना दिलासा दिला.