नवी दिल्ली: देशाची राजधानी दिल्लीत आयोजित यंदाच्या भारत आंतरराष्ट्रीय व्यापार मेळ्यात 'भागीदार राज्य' म्हणून सहभागी झालेल्या महाराष्ट्राच्या भव्य दालनाचे उद्घाटन येत्या शनिवारी (14 नोव्हेंबर) सायंकाळी 4 वाजता राज्याचे उद्योगमंत्री उदय सामंत यांच्या हस्ते होणार आहे. दिल्लीतील प्रगती मैदान येथे 14 ते 24 नोव्हेंबर दरम्यान हा आंतरराष्ट्रीय व्यापार मेळा भरत असून यादरम्यान महाराष्ट्राचा समृद्ध सांस्कृतिक वारसा, औद्योगिक प्रगती आणि विकासाचा प्रवास देश-विदेशातील नागरिकांसमोर मांडला जाणार आहे.
या महत्त्वाच्या उद्घाटन सोहळ्यास उद्योग विभागाचे प्रधान सचिव डॉ. पी. अनबलगन, महाराष्ट्र सदनाच्या निवासी आयुक्त तथा सचिव डॉ. श्वेता सिंघल, महाराष्ट्र लघु उद्योग विकास महामंडळाचे उपाध्यक्ष जयदीप कवाडे, व्यवस्थापकीय संचालक प्रेरणा देशभ्रतार, उद्योग आयुक्त डॉ. कादंबरी बलकवडे यांच्यासह विविध विभागांचे वरिष्ठ अधिकारी उपस्थित राहणार आहेत.
'विकास आणि वारसा' संकल्पनेतून महाराष्ट्राचे दर्शन
महाराष्ट्र लघु उद्योग विकास महामंडळाच्या वतीने उभारण्यात आलेल्या या भव्य दालनात एकूण 64 कक्षांचा समावेश आहे. ‘विकास आणि वारसा - महाराष्ट्राचा समृद्ध वारसा, उद्यमशीलता आणि आधुनिक प्रगतीचा संगम’ ही या दालनाची मध्यवर्ती संकल्पना आहे. महाराष्ट्राच्या पारंपरिक वाडा वास्तुशैलीवर आधारित या दालनाच्या प्रवेशद्वारावर छत्रपती शिवाजी महाराज, जोतिराव फुले, राजर्षि छत्रपती शाहू महाराज आणि भारतरत्न डॉ. बाबासाहेब आंबेडकर यांच्या कार्याचा गौरव करणारी शिल्परचना साकारण्यात आली आहे. दालनात कोल्हापुरी चप्पल, सोलापुरी चादरी, पैठणी, हस्तकला, वस्त्रोद्योग, लाकडी खेळणी, बंजारा कला, पारंपरिक धातूकाम, दागिने आणि भौगोलिक मानांकन (GI Tag) प्राप्त उत्पादनांचे प्रदर्शन मांडले जाणार असून विणकाम व सूत कताईचे थेट प्रात्यक्षिकही पाहता येईल. तसेच 'महाराष्ट्र कनेक्टिव्हिटी हब' आणि 'महाराष्ट्र मानबिंदू' या विभागांच्या माध्यमातून राज्याच्या पायाभूत व औद्योगिक विकासाचे दर्शन घडवले जाईल.
मुंबई : भगवान बिरसा मुंडा यांच्या जयंतीनिमित्त जनजातीय गौरव दिन साजरा होत असून, महाराष्ट्र शासनाच्या वतीने 11 ते 18 नोव्हेंबर या कालावधीत राज्यभर 'भगवान ...
24 नोव्हेंबरला 'द फोक आख्यान' सोहळा
महाराष्ट्राच्या समृद्ध लोककला आणि सांस्कृतिक वैभवाचे दर्शन घडविणारा ‘द फोक आख्यान’ हा विशेष सांस्कृतिक कार्यक्रम मंगळवार, 24 नोव्हेंबर 2026 रोजी दुपारी 3:30 वाजता भारत मंडपम कन्व्हेन्शन सेंटर, प्रगती मैदान येथील ओपन ॲम्फीथिएटरमध्ये होणार आहे. या कार्यक्रमाचे उद्घाटन मुख्यमंत्री देवेंद्र फडणवीस यांच्या हस्ते पार पडणार आहे. दरम्यान, इंडिया ट्रेड प्रमोशन ऑर्गनायझेशन (आयटीपीओ) आयोजित 45 व्या भारतीय आंतरराष्ट्रीय व्यापार मेळा-2026 चे उद्घाटन केंद्रीय वाणिज्य व उद्योगमंत्री पियूष गोयल यांच्या हस्ते शुक्रवारी (13 नोव्हेंबर) होणार आहे. 14 ते 18 नोव्हेंबर हे दिवस व्यावसायिक अभ्यागतांसाठी, तर 19 ते 27 नोव्हेंबर दरम्यान मेळा सर्वसामान्य नागरिकांसाठी खुला राहणार आहे.