मुंबई : राष्ट्रवादी काँग्रेस पक्षाच्या विलिनीकरणाबाबत गेल्या आठवडाभरापासून माध्यमांमध्ये प्रसारित होणाऱ्या बातम्यांवर पक्षाचे राष्ट्रीय मुख्य प्रवक्ते उमेश पाटील यांनी स्पष्ट भूमिका मांडली आहे. विलिनीकरणासंदर्भात कोणतीही चर्चा सुरू नाही. ना औपचारिक, ना अनौपचारिक आणि ना आमच्या बाजूने, ना त्यांच्या बाजूने, असे त्यांनी स्पष्ट केले. तथाकथित सूत्रांच्या हवाल्याने खोटे नॅरेटिव्ह तयार करून स्वतःचा राजकीय अजेंडा पुढे रेटणाऱ्यांपासून माध्यमांनी सावध राहावे, असे आवाहनही त्यांनी केले.
सुनेत्रा पवार यांच्या नियमित भेटींना राजकीय रंग देऊ नका
उमेश पाटील म्हणाले की, सुनेत्रा पवार या राष्ट्रवादी काँग्रेसच्या राष्ट्रीय अध्यक्षा, राज्याच्या उपमुख्यमंत्री आणि पुणे जिल्ह्याच्या पालकमंत्री आहेत. त्या पुण्यात असताना पक्षाचे आमदार, पदाधिकारी, नगरसेवक आणि कार्यकर्ते त्यांची भेट घेणे स्वाभाविक आहे. मतदारसंघातील विकासकामे, जिल्हा नियोजन समितीशी संबंधित विषय आणि मंत्रालयात प्रलंबित असलेली कामे यांसाठी आमदारांनी आपल्या नेतृत्वाची भेट घेणे अपेक्षितच आहे. मात्र, अशा नियमित भेटींनाही वेगळा राजकीय रंग देऊन ‘पार्थ पवार यांनी आमदारांची बैठक बोलावली’ अशा बातम्या प्रसारित केल्या जात आहेत. यामागे नेमका कोणाचा अजेंडा आहे, असा सवाल त्यांनी उपस्थित केला.
सुप्रिया सुळे आणि रोहित पवार यांनीही चर्चा नसल्याचे सांगितले
खासदार सुप्रिया सुळे आणि आमदार रोहित पवार यांनीही विलिनीकरणाचा कोणताही प्रस्ताव नसल्याचे आणि त्यासंदर्भात चर्चा सुरू नसल्याचे स्पष्ट केले आहे, असे उमेश पाटील यांनी नमूद केले. मग गेल्या आठवडाभरात विलिनीकरणाच्या बातम्या माध्यमांपर्यंत नेमक्या कोणी पोहोचवल्या? पक्षाकडून सुरुवातीपासून वस्तुस्थिती स्पष्ट केली जात असताना तथाकथित सूत्रांच्या माहितीवर विश्वास ठेवणे हा पक्षावर अन्याय नाही का, असा प्रश्नही त्यांनी उपस्थित केला.
माध्यमांनी अधिकृत प्रवक्त्यांकडून खातरजमा करावी
काही मंडळी स्वतःचा छुपा राजकीय अजेंडा आणि वैयक्तिक राजकीय हितसंबंध साधण्यासाठी माध्यमांचा वापर करत आहेत का, याचा शोध माध्यमांनी घ्यावा, असे पाटील म्हणाले. राष्ट्रवादी काँग्रेस पक्षासंदर्भात कोणतीही बातमी प्रसारित करण्यापूर्वी पक्षाचे अधिकृत प्रवक्ते किंवा प्रमुख नेत्यांकडून वस्तुस्थितीची खातरजमा करावी. माध्यमांची विश्वासार्हता हीच पत्रकारितेची खरी ताकद असून, ती कोणाच्याही छुप्या राजकीय अजेंड्यासाठी पणाला लागू नये, अशी अपेक्षाही त्यांनी व्यक्त केली.
“सत्य परेशान हो सकता है, पराजित नहीं!” असे म्हणत उमेश पाटील यांनी विलिनीकरणाच्या चर्चांबाबत पक्षाची भूमिका पुन्हा स्पष्ट केली.