दिंडोरी (मध्य प्रदेश): शेजाऱ्याशी गप्पा मारत शेकोटीची ऊब घेणे एका तरुणाच्या जीवावर बेतले आहे. मध्य प्रदेशातील दिंडोरी जिल्ह्यात एका व्यक्तीने विश्वासघात करत आपल्याच शेजाऱ्याला 'रसगुल्ला' असल्याचे सांगून जिवंत गावठी बॉम्ब खायला दिला. तरुणाने तो पदार्थ तोंडात टाकून चावताच मोठा स्फोट झाला, ज्यामध्ये त्याचा जबडा आणि तोंड गंभीररीत्या छिन्नविच्छिन्न होऊन त्याचा करुण अंत झाला. या घटनेने संपूर्ण परिसरात मोठी खळबळ उडाली आहे.
पोलिसांनी दिलेल्या माहितीनुसार, ही धक्कादायक घटना दिंडोरी कोतवाली पोलीस ठाण्याच्या हद्दीतील पडरिया छांटा या गावात मंगळवारी रात्री सुमारे आठ वाजता घडली. राजेंद्र बरौतिया (वय 35) असे मृत तरुणाचे नाव असून, या प्रकरणी पोलिसांनी आरोपी शेजारी रामभगत बरौतिया याला अटक केली आहे. मंगळवारी रात्री जेवण आटोपल्यानंतर राजेंद्र आपल्या कुटुंबासह घराच्या अंगणात शेकोटी पेटवून गप्पा मारत बसला होता. त्याच वेळी शेजारी राहणारा रामभगत तिथे आला आणि त्यांच्यासोबत गप्पांमध्ये सहभागी झाला.
पाटणा : बिहारमधील वाहतुकीची व्यवस्था अधिक वेगवान आणि सुलभ करणाऱ्या एका अत्यंत महत्त्वाच्या प्रकल्पाबाबत मोठी घोषणा करण्यात आली आहे. कच्ची दरगाह ते ...
बोलता बोलता रामभगतने खिशातून हुबेहूब रसगुल्ल्यासारखा दिसणारा एक गोल पदार्थ काढला आणि 'हा गोड रसगुल्ला आहे, खाऊन बघ' असे सांगून राजेंद्रच्या हातात दिला. शेजाऱ्याच्या शब्दांवर विश्वास ठेवून राजेंद्रने कोणतीही शंका न घेता तो पदार्थ थेट तोंडात टाकला. मात्र, त्याने दाताने त्यावर चावा घेताच क्षणी तोंडात कानठळ्या बसवणारा भीषण स्फोट झाला. या स्फोटामुळे राजेंद्र रक्ताच्या थारोळ्यात कोसळला आणि त्याच्या तोंडाला अत्यंत गंभीर इजा झाली. कुटुंबीयांनी तातडीने त्याला एका ऑटोरिक्षातून दिंडोरी जिल्हा रुग्णालयात दाखल केले, परंतु उपचारादरम्यान त्याची प्राणज्योत मालवली.
पोलिस तपासात असे समोर आले आहे की, आरोपीने दिलेला तो पदार्थ कोणतीही मिठाई नसून स्थानिक भाषेत 'सुअरमार बॉम्ब' म्हणून ओळखला जाणारा एक अत्यंत घातक गावठी स्फोटक पदार्थ होता. ग्रामीण भागात रानडुकरांची शिकार करण्यासाठी किंवा त्यांना पळवून लावण्यासाठी अशा प्रकारच्या स्फोटकांचा बेकायदेशीर वापर केला जातो. दिंडोरी पोलिसांनी आरोपी रामभगत बरौतिया याच्याविरुद्ध भारतीय न्याय संहितेच्या (BNS) कलम 105 (सदोष मनुष्यवध) आणि स्फोटक पदार्थ कायद्याच्या कलम 3 व 4 अंतर्गत गुन्हा दाखल करून त्याला बेड्या ठोकल्या आहेत.
Accident News: पश्चिम बंगालहून ओडिशातील पुरी येथे भगवान जगन्नाथांच्या दर्शनासाठी निघालेल्या यात्रेकरूंच्या बसला शुक्रवारी पहाटे अपघात झाला. ओडिशातील ...
रामभगतने हे क्रूर कृत्य का केले, याचा तपास पोलीस करत आहेत. दोघांमध्ये यापूर्वी काही जुना वाद होता का आणि आरोपीने हा जीवघेणा गावठी बॉम्ब नेमका कोठून मिळवला, या दिशेने पोलीस सखोल चौकशी करत आहेत. या स्फोटकाच्या पुरवठ्यात आणखी कोणाचा सहभाग आहे का, याचाही शोध घेतला जात आहे. या हृदयद्रावक घटनेमुळे ग्रामीण भागातील बेकायदेशीर स्फोटकांच्या उपलब्धतेवर आणि सुरक्षिततेवर गंभीर प्रश्नचिन्ह उपस्थित झाले आहे.