मुंबई : राज्यातील शेतकऱ्यांना केंद्र आणि राज्य सरकारच्या विविध कृषी योजनांसह अन्य शासकीय योजनांचा लाभ थेट मिळावा, यासाठी ई-केवायसी आणि फार्मर आयडी प्रक्रिया पूर्ण करणे आवश्यक आहे. विशेषतः दुष्काळग्रस्त शेतकऱ्यांनी ही प्रक्रिया तातडीने पूर्ण करून घ्यावी, असे आवाहन राज्याच्या मदत व पुनर्वसन विभागाने केले आहे. ॲग्रीस्टॅक प्रणालीतील शेतकऱ्यांची माहिती अद्ययावत असल्यास शासकीय योजनांचे लाभ वेळेत मिळण्यास मदत होणार आहे.
दुष्काळग्रस्त शेतकऱ्यांसाठी ई-केवायसी महत्त्वाची
राज्य सरकारकडून विविध योजनांच्या माध्यमातून शेतकऱ्यांना आर्थिक मदत, अनुदान आणि इतर लाभ दिले जातात. नैसर्गिक आपत्ती आणि अन्य संकटांच्या काळातही शासनाकडून आर्थिक सहाय्य उपलब्ध करून दिले जाते. सध्या दुष्काळग्रस्त शेतकऱ्यांना दिवाळीपूर्वी अग्रीम मदत देण्याच्या निर्णयाच्या पार्श्वभूमीवर ई-केवायसी आणि फार्मर आयडीचे महत्त्व वाढले आहे. पात्र शेतकऱ्यांना मदतीची रक्कम थेट त्यांच्या बँक खात्यात जमा होण्यासाठी आवश्यक नोंदणी आणि पडताळणी प्रक्रिया पूर्ण असणे गरजेचे आहे.
ॲग्रीस्टॅक प्रणालीत माहिती अद्ययावत असणे आवश्यक
ॲग्रीस्टॅक प्रणालीच्या माध्यमातून शेतकऱ्यांची माहिती एकत्रित केली जात आहे. ही माहिती अद्ययावत असल्यास कृषी विभागासह अन्य विभागांच्या विविध योजनांचा लाभ पात्र लाभार्थ्यांपर्यंत पोहोचविणे सोपे होणार आहे. त्यामुळे शेतकऱ्यांनी ई-केवायसी आणि फार्मर आयडीची प्रक्रिया पूर्ण करून घ्यावी. यामुळे योजनांचा लाभ मिळवताना येणाऱ्या अडचणी कमी होण्यास मदत होईल, असे मदत व पुनर्वसन विभागाने स्पष्ट केले आहे.
केंद्र सरकारकडून आदिवासी बांधवांवर योजनांचा पाऊस, 'या' गोष्टींमुळे समाजाचे पालटणार जीवन
मुंबई: भारतात आदिवासी समाजाच्या विकासासाठी आणि त्यांच्या संस्कृतीच्या जतनासाठी केंद्र सरकारने एक ऐतिहासिक पाऊल उचलले आहे. भगवान बिरसा मुंडा यांच्या ...
तांत्रिक अडचणी आल्यास शासनाकडून सहकार्य
ई-केवायसी किंवा फार्मर आयडी तयार करताना काही तांत्रिक अथवा अन्य अडचणी येत असल्यास संबंधित शासकीय यंत्रणांकडून आवश्यक सहकार्य केले जाईल. कोणत्याही अडचणीमुळे प्रक्रिया अपूर्ण ठेवू नये. संबंधित यंत्रणांशी संपर्क साधून माहिती अद्ययावत करावी आणि आवश्यक पडताळणी पूर्ण करावी, असे आवाहन करण्यात आले आहे.
फार्मर आयडी कुठे आणि कसा तयार कराल?
शेतकऱ्यांनी फार्मर आयडी तयार करण्यासाठी जवळच्या सीएससी (नागरी सुविधा केंद्र) येथे भेट द्यावी. यासाठी आधार कार्ड आणि आधारशी संलग्न असलेला मोबाईल क्रमांक सोबत घेऊन जावा. तेथे आवश्यक नोंदणी आणि पडताळणी प्रक्रिया पूर्ण करून फार्मर आयडी तयार करून घेता येईल. शासकीय योजनांचा लाभ पात्र शेतकऱ्यांपर्यंत वेळेत आणि पारदर्शक पद्धतीने पोहोचविण्यासाठी ही प्रक्रिया महत्त्वाची असल्याने राज्यातील सर्व शेतकऱ्यांनी ई-केवायसी आणि फार्मर आयडीला प्राधान्य देऊन तातडीने पूर्ण करावे, असे आवाहन मदत व पुनर्वसन विभागाने केले आहे.