
मुंबई: सण-उत्सवांच्या काळात रेल्वे प्रवाशांची वाढती गर्दी लक्षात घेऊन मध्य रेल्वेने मुंबईतील लोकमान्य टिळक टर्मिनस आणि बिहारमधील सहरसा दरम्यान 2 अतिरिक्त विशेष गाड्या चालवण्याचा निर्णय घेतला आहे. या गाड्यांमुळे मुंबई आणि बिहारदरम्यान प्रवास करणाऱ्या प्रवाशांना दिलासा मिळणार आहे.
लोकमान्य टिळक टर्मिनस-सहरसा विशेष गाडीचे वेळापत्रक
विशेष गाडी क्रमांक 01019 ही 19 नोव्हेंबर 2026 रोजी रात्री 10.55 वाजता लोकमान्य टिळक टर्मिनस येथून सुटेल. ही गाडी 21 नोव्हेंबर रोजी सायंकाळी 5.20 वाजता सहरसा येथे पोहोचेल.
परतीची विशेष गाडी क्रमांक 01020 ही 22 नोव्हेंबर रोजी सायंकाळी 4 वाजता सहरसा येथून सुटेल. ही गाडी 24 नोव्हेंबर रोजी दुपारी 12.10 वाजता लोकमान्य टिळक टर्मिनस येथे पोहोचेल.
कोणत्या स्थानकांवर थांबणार?
या विशेष गाड्यांना ठाणे, कल्याण, इगतपुरी, नाशिक रोड, भुसावळ, खंडवा, इटारसी, जबलपूर, कटनी, सतना, मानिकपूर, प्रयागराज छिवकी, पंडित दीनदयाळ उपाध्याय जंक्शन, बक्सर, आरा, दानापूर, पाटलीपुत्र, हाजीपूर जंक्शन, बरौनी, बेगूसराय आणि खगडिया जंक्शन येथे थांबे असतील.
गाडीतील डब्यांची रचना
या विशेष रेल्वेमध्ये 12 शयनयान डबे, 6 सामान्य द्वितीय श्रेणीचे डबे आणि गार्ड्स ब्रेक व्हॅनसह 2 सामान्य द्वितीय श्रेणीचे डबे असतील.
तिकीट आरक्षण कसे कराल?
गाडी क्रमांक 01019 साठी आरक्षण सर्व संगणकीकृत आरक्षण केंद्रांवर तसेच IRCTC च्या अधिकृत वेबसाइटवर उपलब्ध आहे. अनारक्षित डब्यांसाठी UTS प्रणालीद्वारे सामान्य दरात तिकीट काढता येईल. प्रवाशांना RailOne अॅपचाही वापर करता येईल.
या गाड्यांच्या थांब्यांवरील सविस्तर वेळापत्रक जाणून घेण्यासाठी भारतीय रेल्वेच्या चौकशी संकेतस्थळाला भेट द्यावी किंवा NTES अॅपचा वापर करावा, असे आवाहन मध्य रेल्वेने केले आहे.






