मुंबई : दादासाहेब फाळके आंतरराष्ट्रीय चित्रपट महोत्सव पुरस्कार (DPIFF) २०२५ हा भारतीय चित्रपटसृष्टीच्या दहाव्या वर्षाचा गौरव साजरा करणारा एक खास सोहळा असणार आहे. भारतीय सिनेमाचे जनक म्हणून ओळखले जाणारे धुंडिराज गोविंद फाळके यांना श्रद्धांजली अर्पण करत हा महोत्सव दरवर्षी पार पडतो. DPIFF हा देशातील एक मानाचा आणि लोकप्रिय चित्रपट पुरस्कार समारंभ ठरला आहे, ज्यामध्ये मोठे कलाकार आणि नवीन चेहऱ्यांना एकाच मंचावर सन्मानित केले जाते.
याआधी २०२४ मध्ये झालेला DPIFF पुरस्कार सोहळा खूपच चर्चेत होता. शाहरुख खान, करीना कपूर खान, नयनतारा, राणी मुखर्जी, शाहिद कपूर यांसारख्या अनेक नामवंत कलाकारांनी या कार्यक्रमात हजेरी लावली होती. हा सोहळा केवळ पुरस्कार देण्यापुरता मर्यादित नसतो, तर तो सिनेसृष्टीतील कला, मेहनत, आणि प्रतिभेचा एक भव्य उत्सव असतो. दरवर्षी यामध्ये कलाकारांसोबतच सरकारी अधिकारी, चित्रपटसृष्टीतील तज्ज्ञ, प्रसारमाध्यमांचे प्रतिनिधी आणि अनेक मान्यवर सहभागी होतात.
दादासाहेब फाळके आंतरराष्ट्रीय चित्रपट महोत्सवाचे यानंदाचे १०वे वर्ष आहे , या वेळी हा सोहळा आणखी भव्य आणि आकर्षक असणार आहे. भारतातील विविध भागांतील कथा, चित्रपट, गाणी आणि कलाकारांचा गौरव या मंचावर केला जाणार आहे. या सोहळ्यात ग्लोबल शॉर्ट फिल्म फेस्टिव्हल देखील आयोजित करण्यात आला आहे, ज्यामध्ये जगभरातील तरुण आणि नवोदित चित्रपट निर्माते सहभागी होणार आहेत.
सूत्रांच्या माहितीनुसार, यावेळी काही आंतरराष्ट्रीय कलाकार आणि व्यक्तीही कार्यक्रमाला उपस्थित राहणार असल्याची शक्यता आहे. DPIFF चे सीईओ अभिषेक मिश्रा म्हणाले, “आपण दहाव्या वर्षात प्रवेश करत आहोत आणि यंदाचा महोत्सव हा केवळ भारतीयच नव्हे, तर जागतिक चित्रपटसृष्टीतील एक संस्मरणीय क्षण ठरणार आहे.” हा महोत्सव २९ आणि ३० ऑक्टोबर २०२५ रोजी मुंबईत पार पडणार आहे . हा सोहळा सिनेसृष्टीतील कला, कथा आणि सांस्कृतिक प्रभाव यांचा एक सुंदर संगम असणार आहे.