मुंबई : कन्नड स्टार यशच्या बहुचर्चित ‘टॉक्सिक: ए फेरी टेल फॉर ग्रोन-अप्स’ या चित्रपटाबाबत मोठी अपडेट समोर आली आहे. जगभर १९ मार्चला प्रदर्शित होणार असल्याची घोषणा करण्यात आलेला हा सिनेमा आता त्या तारखेला थिएटरमध्ये येणार नाही.
‘रॉकी भाई’च्या कमबॅकची चार वर्षांपासून रंगलेली चर्चा चाहत्यांना पुन्हा प्रतीक्षा करायला लावणारी ठरली आहे.
जागतिक तणावाचा फटका
निर्मात्यांच्या मते, मध्यपूर्वेतील अस्थिर वातावरण आणि आंतरराष्ट्रीय स्तरावरील तणावाचा परिणाम वितरणावर होण्याची शक्यता आहे. ‘टॉक्सिक’ हा चित्रपट जागतिक बाजारपेठ डोळ्यासमोर ठेवून तयार करण्यात आला आहे.
कन्नडसोबतच इंग्रजी भाषेतही शूटिंग करण्यात आल्याने परदेशातील प्रदर्शनाला विशेष महत्त्व होते. मात्र सध्याच्या परिस्थितीत जागतिक रिलीज करणे धोकादायक ठरू शकते, असा अंदाज व्यक्त करण्यात आला आहे.
यशची अधिकृत भूमिका
सोशल मीडियावर चाहत्यांशी संवाद साधताना यशने स्पष्ट केले की, प्रेक्षक आणि वितरण भागीदारांचे हित लक्षात घेऊन प्रदर्शनाची तारीख पुढे ढकलण्यात आली आहे. नवीन नियोजनानुसार हा हाय-ऑक्टेन ॲक्शन ड्रामा आता ४ जून २०२६ रोजी थिएटरमध्ये दाखल होणार आहे.
दमदार स्टारकास्ट
दिग्दर्शक गीतू मोहनदास यांच्या या चित्रपटात गीतू मोहनदास दिग्दर्शित या चित्रपटात नयनतारा, कियारा अडवाणी, हुमा कुरेशी आणि तारा सुतारिया यांसारखी तगडी कलाकार फळी झळकणार आहे.
‘धुरंधर २’ला सोलो रिलीजचा फायदा?
‘टॉक्सिक’ शर्यतीतून बाहेर पडल्याने १९ मार्चला प्रदर्शित होणाऱ्या धुरंधर २ ला थेट फायदा होण्याची शक्यता आहे. बॉलिवूड अभिनेता रणवीर सिंगचा हा स्पाय थ्रिलर आता स्पर्धेशिवाय थिएटरमध्ये उतरणार आहे. मोठ्या चित्रपटाची टक्कर टळल्याने बॉक्स ऑफिसवर एकहाती कमाईची संधी निर्माण झाल्याचे चर्चा सुरु आहे.
चाहत्यांची नजर जूनकडे
सध्या ‘टॉक्सिक’च्या नव्या रिलीज डेटची अधिकृत घोषणा करण्यात आली असून, पुढील काही महिन्यांत प्रमोशनचा वेग वाढवला जाण्याची शक्यता आहे. दरम्यान, मार्चमध्ये बॉक्स ऑफिसवर ‘धुरंधर २’चा दबदबा राहणार का, याकडे चित्रपटसृष्टीचे लक्ष लागले आहे.