बॉलिवूडचा'धुरंधर' २ सिनेमा सध्या बॉक्स ऑफिसवर धुमाकूळ घालत आहे. या सिनेमातील काही सीन सोशल मीडियावर मोठ्या प्रमाणात व्हायरलही होत आहेत. विशेष म्हणजे या सिनेमातील अभिनेता रणवीर सिंहचा शेवटचा सीन अतिशय भावुक करणारा आहे. सिनेमातील रणवीरचा हा सीन पाहून अनेकांच्या डोळ्यात पाणी आलं आहे.
पण, सोशल मीडिया कंटेंट क्रीएटर सुमित पाटील यानं एक आगळीवेगळी शक्कल लढवत 'धुरंधर'मधील हा सीन आणि मराठी प्रेक्षकांचा जीव की प्राण असलेला 'अशी ही बनवाबनवी' सिनेमातील काही पात्रांसह एक वेगळाच व्हिडीओ तयार केला आहे. या व्हिडीओनं सध्या सोशल मीडियावर धुमाकूळ घातला असून हा व्हिडिओ प्रेक्षकांच्या पसंतीस
उतरला आहे.
या व्हिडीओत सुमितने 'धुरंधर' सिनेमातील त्या भावुक सीनचा आधार घेतला आहे, जेथे रणवीर सिंग आपल्या मिशननंतर मायदेशी परततो. पण यात त्याने 'अशी ही बनवाबनवी' मधील अशोक सराफ (धनंजय माने), सुधीर जोशी (विश्वासराव) आणि लता थत्ते (मालकीण) यांच्या पात्रांचा वापर केला असून यामध्ये त्यानं अशोक सराफ यांनी साकारलेल्या धनंजय मानेचं पात्र रणवीरच्या जागी दाखवलंय.
AIच्या मदतीने तयार केलेल्या या व्हिडीओमध्ये 'Dhanandhar माने इथेच राहत होते' अशा आशयाचे मजेशीर टेक्स्ट वापरण्यात आले आहे. तसेच घरमालक, जुनी केरसुणी आणि ७० रुपयांच्या हिशोबावरून केलेले भाष्य पाहून आजही प्रेक्षकांना हसू आवरता येत नाहीय.
या रीलवर प्रेक्षकांनी कमेंट्सचा पाऊस पाडला असून एका युजरने उपरोधिकपणे म्हटंलयं की, "इस्राइलहून औषधं आणणं आता थोडं कठीण आहे", तर दुसऱ्यानं अशोक मामांचं कौतुक करत "महाराष्ट्रचे अशोक मामा... ऑल टाइम फेव्हरेट" अशी कमेंट केली आहे. अनेकांनी हा व्हिडीओ पाहून हसून हसून डोळ्यात पाणी आल्याचं म्हटलं आहे.
मराठी प्रेक्षकांसाठी रणवीरच्या 'धुरंधर'पेक्षा अशोक सराफ यांनी साकारलेला 'धनंजय माने' अर्थात 'धनंधर' नेहमीच वरचढ असेल. हे या व्हिडीओतून सिद्ध झाले आहे. एआयचा वापर करून बनवलेला हा 'कॉमेडी व्हिडिओ सध्या सोशल मिडियावर जोरदार व्हायरल होत आहे.