मुंबई : अभिनेता विजय वर्माच्या वाढदिवसानिमित्त भारतातील सर्वात लोकप्रिय प्राईम व्हिडिओनं विजयच्या आगामी ओरिजिनल ड्रामा सीरिज ‘मटका किंग’ वर्ल्डवाइड प्रीमियरची तारीख जाहीर केली असून येत्या १७ एप्रिल २०२६ रोजी ही सिरीज रिलीज होणार आहे.
अभय कोरन्ने यांनी लिहिलेली आणि नागराज पोपटराव मंजुळे यांनी तयार करून दिग्दर्शित केलेली ही सिरीज १९६० च्या दशकातील बदलत्या बॉम्बेवर आधारित आहे. ही कथा एका कापूस व्यापाऱ्याभोवती फिरते, जो ‘मटका’ नावाची नवी जुगार प्रणाली सुरू करतो आणि श्रीमंतांच्या या छंदाला संपूर्ण देशभर पसरवतो.
ही सिरीज सिद्धार्थ रॉय कपूर, नागराज पोपटराव मंजुळे, गार्गी कुलकर्णी, अश्विनी सिदवानी आणि आशीष आर्यन यांनी ‘रॉय कपूर फिल्म्स’, ‘आटपाट’ आणि ‘SMR प्रोडक्शन्स’च्या बॅनरखाली निर्मित केली आहे.
या सिरीजमध्ये विजय वर्मा, कृतिका कामरा, सई ताम्हणकर, सिद्धार्थ जाधव, भूपेंद्र जादावत आणि गुलशन ग्रोवर मुख्य भूमिकांमध्ये झळकणार आहेत.
यांच्यासोबत विनीत कुमार सिंह, भरत जाधव, गिरीश कुलकर्णी, जेमी लीवर, किशोर कदम, सायरस साहूकार, अर्पिता सेठिया, संभाजी तांगडे, इश्तियाक खान, संजीव जोटांगिया आणि सिमरन अश्विनी महत्त्वाच्या भूमिकांमध्ये दिसणार आहेत.
या सिरीजमद्ये १९६० च्या दशकातील बदलत्या बॉम्बेमध्ये स्वतःची ओळख आणि मान-सन्मान मिळवण्यासाठी झटणारा एक हुशार आणि मेहनती कापूस व्यापाऱ्याची कथा आहे. ज्याची भूमिका विजय वर्मा यांनी साकारली आहे.
गर्दीने गजबजलेले बाजार, चाळी आणि बदलणारी सत्ता यांच्यात ही कथा उभी राहते. एका महत्त्वकांक्षी कल्पनेपासून सुरू होणारी ही कथा हळूहळू स्वतःची वेगळी ओळख निर्माण करते आणि समाजातील सर्व स्तरातील लोकांना आकर्षित करते.
जसजशी अपेक्षा आणि जोखीम वाढत जाते, तशी ही सीरिज महत्त्वाकांक्षा, सत्ता आणि स्वतःची जागा निर्माण करण्याच्या रोमांचक प्रवासात रूपांतरित होते. ही सिरीज १७ एप्रिलपासून भारतासह जगभरातील २४० पेक्षा अधिक देशांमध्ये फक्त प्राइम व्हिडिओवर स्ट्रीम होणार आहे.