DCM Sunetra Pawar : सुनेत्रा पवार यांच्या राजीनाम्यामुळे रिक्त झालेल्या राज्यसभेच्या जागेसाठी पोटनिवडणूक जाहीर

मुंबई : उपमुख्यमंत्री आणि राष्ट्रवादीच्या राष्ट्रीय अध्यक्ष सुनेत्रा पवार यांच्या राजीनाम्यामुळे रिक्त झालेल्या राज्यसभेच्या जागेसाठी केंद्रीय निवडणूक आयोगाने शुक्रवारी पोटनिवडणूक जाहीर केली. येत्या १८ जून २०२६ रोजी या एका जागेसाठी मतदान प्रक्रिया पार पडणार असून, त्याच दिवशी सायंकाळी ५ वाजता मतमोजणी करून निकाल घोषित केला जाईल. महाराष्ट्रासोबतच तामिळनाडूतील सी. व्ही. शन्मुगम यांच्या राजीनाम्यामुळे रिक्त झालेल्या जागेसाठीही याच दिवशी निवडणूक होणार आहे.

सुनेत्रा पवार यांनी बारामती विधानसभा पोटनिवडणूक जिंकल्यानंतर ६ मे २०२६ रोजी आपल्या राज्यसभा सदस्यत्वाचा राजीनामा दिला होता. त्यांचा हा कार्यकाळ ४ जुलै २०२८ पर्यंत होता. या जागी आता ज्येष्ठ नेते आणि राज्याचे अन्न आणि नागरी पुरवठा मंत्री छगन भुजबळ राज्यसभेवर जातील, असा कयास बांधला जात आहे. शिवाय सुनेत्रा पवार यांचे दुसरे सुपुत्र जय पवार यांचेही नाव चर्चेत आहे.

विशेष म्हणजे याच दिवशी १८ जून रोजी विधानपरिषदेच्या १६ रिक्त जागांसाठी आणि नागपूर पोटनिवडणुकीसाठी मतदान प्रक्रिया पार पडणार आहे.

• निवडणूक अधिसूचना जारी होणार : १ जून २०२६


• नामांकन अंतिम तारीख : ८ जून २०२६


• उमेदवारी अर्जांची छाननी : ९ जून २०२६


• अर्ज मागे घेण्याची अंतिम मुदत : ११ जून २०२६


• मतदानाचा दिनांक आणि वेळ : १८ जून २०२६ (सकाळी ९ ते दुपारी ४ वाजेपर्यंत)


• मतमोजणी : १८ जून २०२६ (सायंकाळी ५:०० वाजता)