Nashik Crime News : दाखल गुन्ह्यात अटक करून पोलीस कोठडी न घेता थेट न्यायालयात हजर करण्यासाठी १० हजार रुपयांची लाच स्वीकारणाऱ्या पोलीस हवालदाराला न्यायालयाने दोषी ठरवलं आहे. रामचंद्र आडके असं दोषी ठरलेल्या हवालदाराचं नाव असून, त्याला भ्रष्टाचार प्रतिबंध अधिनियमान्वये चार वर्षांचा कारावास आणि १० हजार रुपयांचा दंड ठोठावण्यात आला आहे. (Nashik Crime News)
१५ हजारांची लाच मागितली अन्...
रामचंद्र आडके हे नाशिक तालुका पोलीस ठाण्यात कार्यरत होते. तक्रारदार आणि त्यांच्या चुलत भावाविरुद्ध याच पोलीस ठाण्यात विविध कलमांन्वये गुन्हा दाखल होता. या गुन्ह्यात अटक करून पोलीस कोठडी न घेता थेट न्यायालयात हजर करण्यासाठी आडके यांनी २३ सप्टेंबर २०१४ रोजी तक्रारदाराकडे १५ हजार रुपयांची लाच मागितली होती. तडजोडीनंतर ही रक्कम १० हजार रुपये ठरली.
लाचेची रक्कम पंच साक्षीदारांसमोर गिरणारे आऊट पोस्ट येथे स्वीकारताना लाचलुचपत प्रतिबंधक विभागाच्या पथकाने रामचंद्र आडके यांना रंगेहात पकडलं होतं. पदाचा गैरवापर करून बेकायदेशीररीत्या आर्थिक लाभ मिळवल्याप्रकरणी त्यांच्याविरुद्ध गुन्हा दाखल करण्यात आला. या प्रकरणाचा तपास तत्कालीन पोलीस निरीक्षक अशोक पवार यांनी करून जिल्हा व सत्र न्यायालयात दोषारोपपत्र दाखल केलं होतं. (Nashik Crime News)
Chhatrapati Sambhajinagar Crime : लग्नासाठी वारंवार फोन करून त्रास देणे आणि घरात घुसून धमक्या देण्याच्या प्रकाराला कंटाळून १९ वर्षीय तरुणीने गळफास घेऊन आत्महत्या ...
न्यायालयाकडून दोषी ठरवत शिक्षा
या खटल्याची सुनावणी जिल्हा व सत्र न्यायाधीश एन. एल. मोरे यांच्यासमोर झाली. न्यायालयाने रामचंद्र आडके यांना दोषी ठरवत पुढील शिक्षा सुनावली
भ्रष्टाचार प्रतिबंध अधिनियम, १९८८ कलम ७: तीन वर्षे कारावास आणि पाच हजार रुपये दंड.
कलम १३(२): चार वर्षे कारावास आणि पाच हजार रुपये दंड.
दंडाची रक्कम न भरल्यास अतिरिक्त कारावासाची शिक्षाही सुनावण्यात आली आहे सरकारी पक्षातर्फे सचिन गोरवाडकर यांनी कामकाज पाहिलं. लाचलुचपत प्रतिबंधक विभागाच्या अधिकाऱ्यांच्या मार्गदर्शनाखाली या प्रकरणाचा पाठपुरावा करण्यात आला. (Nashik Crime News)
लाच मागितल्यास तक्रार करण्याचं आवाहन
दरम्यान, कोणत्याही शासकीय अधिकारी, कर्मचारी किंवा त्यांच्या वतीने खासगी व्यक्ती लाचेची मागणी करत असल्यास नागरिकांनी लाचलुचपत प्रतिबंधक विभागाशी संपर्क साधावा, असं आवाहन करण्यात आलं आहे.
तक्रारीसाठी संपर्क :
टोल फ्री क्रमांक : १०६४
दूरध्वनी : ०२५३-२५७५६२८ / ०२५३-२५७८२३०
व्हॉट्सॲप : ९५४५६५१०६४
या खटल्यात लाचलुचपत प्रतिबंधक विभाग, नाशिक परिक्षेत्राचे पोलीस अधीक्षक भारत तांगडे, अपर अधीक्षक प्रदीप मैराळे व कविता फडतरे यांच्या मार्गदर्शनाखाली पोलीस निरीक्षक शिवाजी लोंढे आणि कोर्ट पैरवी अंमलदार पोलीस हवालदार प्रदीप काळोगे, प्रभाकर गवळी, किरण धुळे यांनी कामकाज केले. या संदर्भातील माहिती लाचलुचपत प्रतिबंधक विभागाचे निरीक्षक स्वप्नील राजपूत यांनी दिली.