Raipur Crime News : छत्तीसगडच्या रायपूर जिल्ह्यातून माणुसकीला काळिमा फासणारी धक्कादायक घटना समोर आली आहे. विवाहित प्रेयसीला आधी निर्जनस्थळी नेलं, गाडीच्या डिक्कीतून पेट्रोलची बाटली काढली आणि तिच्यावर पेट्रोल ओतून पेटवून दिलं. गंभीर भाजलेल्या महिलेचा उपचारादरम्यान मृत्यू झाला. या प्रकरणात पोलिसांनी तिच्या २६ वर्षीय प्रियकराला अटक केली असून, आरोपीने गुन्ह्याची कबुली दिल्याची माहिती आहे. वीरू धीवर असं अटक करण्यात आलेल्या आरोपीचं नाव असून, मृत महिलेचं नाव राजकुमारी साहू आहे.
लग्नातील अडथळे आणि...
प्राथमिक तपासानुसार, राजकुमारीचा इतर व्यक्तींशी असलेला संपर्क आणि दोघांच्या लग्नात निर्माण होणारे कथित अडथळे यामुळे वीरू संतापलेला होता. याच कारणातून त्याने हत्या केल्याचं प्राथमिक तपासात समोर आलं आहे. ही घटना रायपूर जिल्ह्यातील माना पोलीस ठाण्याच्या हद्दीत घडली. पोलिसांच्या माहितीनुसार, वीरूने हत्येपूर्वीच संपूर्ण कटाचं नियोजन केलं होतं. पोलिसांना आपलं लोकेशन मिळू नये आणि मोबाईलच्या माध्यमातून आपला माग काढता येऊ नये, यासाठी त्याने मोबाईल घरी ठेवून बंद केला होता. त्यानंतर त्याने पेट्रोल पंपावरून बाटलीत पेट्रोल घेतलं आणि ते स्वतःच्या गाडीच्या डिक्कीत ठेवले.
Kanpur Crime News : कानपूरमधील प्रसिद्ध औषध व्यावसायिक विनीत मनोचा (६०) यांच्या हत्येच्या तपासात दररोज नवे धागेदोरे समोर येत आहेत. आतापर्यंत या प्रकरणात विनीत ...
विमानतळामागील निर्जन रस्त्यावर भयंकर कृत्य
योजना पूर्ण केल्यानंतर वीरू राजकुमारीला रायपूर विमानतळाच्या मागील बाजूस असलेल्या एका निर्माणाधीन आणि निर्जन रस्त्यावर घेऊन गेला. तिथे दोघांमध्ये जुन्या कारणावरून पुन्हा वाद झाला. वाद वाढल्यानंतर वीरूने गाडीच्या डिक्कीत ठेवलेली पेट्रोलची बाटली बाहेर काढली. राजकुमारीच्या अंगावर पेट्रोल ओतून तिला पेटवून दिल्याचा आरोप आहे.आगीचा भडका उडताच राजकुमारी जीव वाचवण्यासाठी मदतीसाठी धावत होती. मात्र आरोपी तिला त्याच अवस्थेत सोडून घटनास्थळावरून पसार झाला.
याचदरम्यान विमानतळाच्या एअर ट्रॅफिक कंट्रोल (ATC) टॉवरवर तैनात असलेल्या सुरक्षारक्षकाचं लक्ष आगीच्या भक्ष्यस्थानी पडलेल्या महिलेकडे गेलं. त्याने तातडीने पोलिसांना माहिती दिली. राजकुमारीचा आक्रोश ऐकून स्थानिक नागरिकही घटनास्थळी धावून आले आणि त्यांनी आग विझवण्याचा प्रयत्न केला. पोलिसांनी तिला गंभीर अवस्थेत रुग्णालयात दाखल केलं. मात्र उपचारादरम्यान तिचा मृत्यू झाला.
आरोपीचा याआधीही गुन्हेगारी इतिहास
राजकुमारी ही मूळची समोदा परिसरातील रहिवासी होती. सुमारे आठ वर्षांपूर्वी तिचा विवाह आरंग परिसरातील मोखला येथे झाला होता. तिला दोन मुलं आहेत. सुमारे पाच वर्षांपूर्वी तिची वीरू धीवरशी ओळख झाली आणि त्यांच्यात प्रेमसंबंध निर्माण झाल्याचं सांगण्यात येत आहे. या संबंधावरून २०२१ मध्ये झालेल्या वादात वीरूने राजकुमारीच्या सासूवर प्राणघातक हल्ला केल्याचा आरोप होता. या प्रकरणात हत्येचा प्रयत्न केल्याच्या आरोपाखाली त्याला तुरुंगवासही भोगावा लागला होता. दरम्यान, राजकुमारीच्या हत्येप्रकरणी आरोपी वीरू धीवरला अटक करण्यात आली असून, पोलिसांकडून या संपूर्ण घटनेचा पुढील तपास सुरू आहे.