Pakistan Mosque Blast : पाकिस्तानच्या खैबर पख्तूनख्वा प्रांतातील कोहाट जिल्ह्यात शुक्रवारच्या नमाजावेळी भीषण स्फोट झाला. जुन्या पोलीस लाइन्सजवळील मशिदीजवळ झालेल्या या स्फोटात किमान 16 जणांचा मृत्यू, तर 50 हून अधिक जण जखमी झाल्याची माहिती समोर आली आहे. शुक्रवारी, 18 सप्टेंबर रोजी नमाजासाठी मोठ्या संख्येने नागरिक मशिदीत जमले होते. त्याचवेळी पोलीस लाइन्स परिसरात जोरदार स्फोट झाला. स्फोटानंतर परिसरात एकच खळबळ उडाली. जखमींना तातडीने कोहाट जिल्हा मुख्यालय रुग्णालयात दाखल करण्यात आले.
मशिदीची भिंत कोसळली, घटनास्थळी मोठा खड्डा
स्फोटाची तीव्रता मोठी असल्याने मशिदीच्या बाहेरील भागाचे मोठे नुकसान झाले. एका भिंतीचा भाग कोसळला असून स्फोटामुळे घटनास्थळी मोठा खड्डाही पडला. आसपासच्या इमारतींचेही नुकसान झाल्याची माहिती आहे. स्फोटानंतर बचाव पथके आणि रुग्णवाहिका घटनास्थळी दाखल झाल्या. ढिगाऱ्याखाली अडकलेल्या नागरिकांचा शोध घेण्यासाठी बचावकार्य सुरू करण्यात आले. जखमींना रुग्णालयात हलवण्यात आले असून कोहाटच्या जिल्हा रुग्णालयात आपत्कालीन परिस्थिती जाहीर करण्यात आली.
हरिद्वार : २००६ मधील नोएडा येथील बहुचर्चित आणि थरारक निठारी नरसंहार प्रकरणातील मुख्य आरोपी सुरिंदर कोळी याने शुक्रवारी (१८ सप्टेंबर २०२६) ...
मृतांमध्ये पोलीस कर्मचाऱ्यांचाही समावेश
ताज्या वृत्तांनुसार, मृतांमध्ये नागरिकांसोबत पोलीस कर्मचाऱ्यांचाही समावेश आहे. काही अहवालांनुसार या हल्ल्यात पाच पोलीस कर्मचारी आणि 11 नागरिकांचा मृत्यू झाला आहे. प्राथमिक माहितीनुसार, स्फोट हा स्फोटकांनी भरलेल्या वाहनाशी संबंधित असल्याचे अधिकाऱ्यांनी सांगितले आहे. स्फोटानंतर परिसरात गोळीबाराचीही माहिती समोर आली असून सुरक्षा दलांनी परिसराला घेराव घातला आहे.
हल्ल्याची जबाबदारी अद्याप कुणी स्वीकारली नाही
या हल्ल्याची जबाबदारी अद्याप कोणत्याही दहशतवादी संघटनेने स्वीकारलेली नाही. स्फोटामागील नेमके कारण, हल्लेखोर आणि त्यामागील सूत्रधारांचा शोध घेण्यासाठी सुरक्षा यंत्रणांकडून तपास सुरू आहे. घटनेनंतर परिसरात अतिरिक्त सुरक्षा दल तैनात करण्यात आले असून कोहाट-हांगू मार्गावरील वाहतूकही बंद करण्यात आल्याची माहिती आहे. हा एक विकसित होत असलेला प्रकार असून मृतांचा आणि जखमींचा आकडा बदलू शकतो.
