Nashik News : नांदगाव तालुक्यातील मन्याड चौकी परिसरातील बाभुळवाडी येथून आठ महिन्यांची चिमुकली बेपत्ता झाल्याच्या प्रकरणाने आता गंभीर वळण घेतलं आहे. मध्यरात्री घरातून चिमुकली बेपत्ता झाल्यानंतर पोलिसांनी अपहरणाचा गुन्हा दाखल करून तपास सुरू केला. मात्र, तपासादरम्यान एका संशयिताचा मृत्यू आणि आता चिमुकलीचे आजोबाही बेपत्ता असल्याने या प्रकरणातील गूढ आणखी वाढलं आहे.
मध्यरात्री चिमुकली बेपत्ता
17 तारखेच्या मध्यरात्री आठ महिन्यांची चिमुकली अचानक बेपत्ता झाल्याचं कुटुंबीयांच्या लक्षात आलं. घराच्या परिसरात तसेच आसपासच्या भागात तिचा शोध घेण्यात आला. मात्र, बराच वेळ शोध घेऊनही चिमुकलीचा ठावठिकाणा लागला नाही. त्यानंतर नांदगाव पोलिसांना माहिती देण्यात आली. पोलिसांनी अज्ञात व्यक्तीविरुद्ध अपहरणाचा गुन्हा दाखल करत तपास सुरू केला. चिमुकलीचा शोध घेण्यासाठी परिसरातील विविध ठिकाणी शोधमोहीम राबवण्यात आली. (Nashik Crime News)
संशयिताची चौकशी अन् त्यानंतर मृत्यू
या प्रकरणाच्या तपासादरम्यान पोलिसांनी एका इसमाची संशयित म्हणून चौकशी केली होती. चौकशीनंतर या इसमाने गळफास घेऊन जीवन संपवल्याची माहिती समोर आली. या घटनेनंतर आधीच गुंतागुंतीच्या बनलेल्या प्रकरणाला आणखी गंभीर वळण मिळालं.
Nashik Earthquake : नाशिक जिल्ह्यातील सुरगाणा तालुक्यात शुक्रवारी सायंकाळी भूकंपाचे सौम्य धक्के जाणवले. डांगराळे, शिंदे, रोकडपाडा आणि आसपासच्या परिसरातील ...
आता आजोबाही बेपत्ता
दरम्यान, बेपत्ता चिमुकलीच्या आई-वडिलांनी तिच्या आजोबांवर संशय व्यक्त केल्याची माहिती आहे. त्यातच चिमुकलीचे आजोबाही बेपत्ता असल्याचं समोर आलं आहे. त्यामुळे पोलिसांच्या तपासाची दिशा आणखी बदलली असून, या दोन्ही घटनांचा एकमेकांशी काही संबंध आहे का, याचा तपास केला जात आहे. मात्र, आजोबांचा चिमुकलीच्या बेपत्ता होण्याशी संबंध असल्याचं अद्याप पोलिसांकडून अधिकृतपणे स्पष्ट झालेलं नाही. त्यामुळे या प्रकरणातील प्रत्येक शक्यता तपासली जात आहे. (Nashik Crime News)
चिमुकलीचा शोध घेण्यासाठी पोलिसांकडून कसून तपास
चिमुकलीचं अपहरण झालं आहे का, ती कुठे आहे, तिच्यासोबत नेमकं काय घडलं आणि या प्रकरणात आणखी कोणाचा सहभाग आहे का, याचा तपास पोलिसांकडून सुरू आहे. उपलब्ध माहिती, परिस्थितीजन्य पुरावे आणि संबंधित व्यक्तींच्या चौकशीच्या आधारे तपासाची चक्रं फिरत आहेत. एकीकडे आठ महिन्यांच्या चिमुकलीचा शोध सुरू असताना दुसरीकडे संशयिताचा मृत्यू आणि आजोबांचं बेपत्ता होणं यामुळे नांदगावमधील या प्रकरणाचे गूढ अधिकच वाढलं आहे. आता पोलिसांच्या तपासातून चिमुकलीचा शोध लागतो का आणि या संपूर्ण प्रकरणामागचं सत्य काय आहे, याकडे सर्वांचं लक्ष लागलं आहे.