Bangladesh News : बांगलादेशातील एका 75 वर्षीय खासदाराला त्याच्या 19 वर्षीय दुसऱ्या पत्नीच्या मृत्यूप्रकरणी अटक करण्यात आली आहे. खासदाराची दुसरी पत्नी मरियम खातून यांचा मृतदेह ढाक्यातील एनएएम भवनातील फ्लॅटमध्ये पंख्याला लटकलेल्या अवस्थेत आढळून आला. याप्रकरणी मरियम यांच्या वडिलांनी दिलेल्या तक्रारीनंतर खासदार गाझी नजरुल इस्लाम, त्यांची पहिली पत्नी मकसुदा बेगम आणि मेहुणा ओबैदुल रहमान यांच्यावर आत्महत्येस प्रवृत्त केल्याचा गुन्हा दाखल करण्यात आला आहे.
एनएएम भवनातील फ्लॅटमध्ये आढळला मृतदेह
मिळालेल्या माहितीनुसार, मरियम खातून यांचा मृतदेह ढाका येथील एनएएम भवनाच्या पाचव्या इमारतीतील खासदारांच्या फ्लॅटमध्ये आढळला. पोलिसांच्या माहितीनुसार, ज्या खोलीत त्या होत्या त्या खोलीचा दरवाजा आतून बंद होता. पोलिस आणि घटनास्थळी उपस्थित व्यक्तींनी दरवाजा उघडल्यानंतर मरियम यांचा मृतदेह पंख्याला ओढणीच्या सहाय्याने लटकलेल्या अवस्थेत आढळला. घटनेची माहिती मिळताच पोलीस, सीआयडी, पीबीआय आणि डिटेक्टिव्ह ब्रँचच्या पथकांनी घटनास्थळी पोहोचून तपास सुरू केला.
Pandharpur Crime News : प्रेमाला वयाचं बंधन नसतं, असं म्हटलं जातं. पंढरपूर तालुक्यातही असंच वयाचं बंधन नसलेलं प्रेम पहायला मिळालंय. मात्र, पंढरपूर तालुक्यातील या ...
कुटुंबीयांकडून मानसिक-शारीरिक त्रासाचे आरोप
मरियम यांच्या कुटुंबीयांनी पोलिसांत दाखल केलेल्या तक्रारीत गंभीर आरोप केले आहेत. त्यांच्या म्हणण्यानुसार, जून महिन्यात मरियम यांचा गाझी नजरुल इस्लाम यांच्यासोबत इस्लामी पद्धतीने विवाह झाला होता. त्यानंतर त्या खासदारांसोबत एनएएम भवनात राहत होत्या. मात्र, पहिल्या पत्नीच्या उपस्थितीत मरियम यांना मानसिक आणि शारीरिक त्रास दिला जात असल्याचा आरोप त्यांच्या कुटुंबीयांनी केला आहे. मरियम यांनी फोनवरून कुटुंबीयांना या त्रासाबाबत माहिती दिल्याचेही तक्रारीत नमूद करण्यात आले आहे. हे आरोप असून, त्यांची स्वतंत्रपणे पुष्टी झालेली नाही.
पलंगावर सापडली सुसाइड नोट
घटनेनंतर पोलिसांना मरियम यांच्या बिछान्यावर कथित सुसाइड नोट आढळल्याची माहिती समोर आली आहे. मात्र, ही चिठ्ठी मरियम यांनीच लिहिली होती का, याची खात्री फॉरेन्सिक तपासणीनंतर होणार आहे. दरम्यान, रविवारी संध्याकाळी खासदार गाझी नजरुल इस्लाम यांनी मरियम यांच्या वडिलांना फोन करून एनएएम भवनात बोलावल्याची माहिती आहे.
तिघांना अटक; तपास सुरू
मरियम यांच्या वडिलांच्या तक्रारीनंतर पोलिसांनी खासदार गाझी नजरुल इस्लाम, त्यांची पहिली पत्नी मकसुदा बेगम आणि ओबैदुल रहमान यांच्याविरोधात आत्महत्येस प्रवृत्त केल्याचा गुन्हा दाखल केला. त्यानंतर तिघांनाही अटक करण्यात आली असून, या प्रकरणाचा पुढील तपास सुरू आहे. दरम्यान, जुलै महिन्यात गाझी नजरुल इस्लाम यांचा एका तरुणीसोबतचा खासगी व्हिडिओ सोशल मीडियावर व्हायरल झाला होता. त्यानंतर खासदारांनी ती तरुणी आपली दुसरी पत्नी मरियम असल्याचे सांगितले होते. या घटनेनंतर जमात-ए-इस्लामीने 22 जुलै रोजी गाझी नजरुल इस्लाम यांना पक्षातून निष्कासित केल्याची माहिती आहे.
