मुंबई : आदित्य धर दिग्दर्शित धुरंधर २ अर्थात 'धुरंधर द रिव्हेंज' हा सिनेमा १९ मार्च २०२६ रोजी प्रदर्शित झाला. सध्या हा सिनेमा बॉक्स ऑफिसवर धुमाकूळ घालत आहे. आतापर्यंत या सिनेमाचे वर्ल्डवाईड बॉक्स ऑफिस कलेक्शन १४०० कोटींपेक्षा जास्त झाली आहे. सिनेमातील सगळ्याच कलाकारांना धुरंधर २ मुळे नवी ओळख मिळाली आहे. याच सिनेमात एका अभिनेत्रीने जेमतेम एका सेकंदाची भूमिका केली आहे. हा धुरंदर २ सिनेमातील सर्वात छोटा रोल म्हणता येईल. एवढ्या कमी लांबीची भूमिका करूनही या अभिनेत्रीची सोशल मीडियात प्रचंड चर्चा सुरू आहे.
'धुरंधर द रिव्हेंज' सिनेमाच्या क्लायमॅक्समध्ये अभिनेता रणवीर सिंह चार्टर्ड प्लेनमध्ये जातो. या विमानाच्या दाराजवळ काही क्षणांसाठी एक एअर होस्टेस दिसते. हे दृश्य सिनेमात जेमतेम एका सेकंदासाठी दिसते. यामुळे अनेकांना सुरुवातीला सिनेमा बघूनही ही अभिनेत्री लक्षात राहिली नव्हती. पण स्वतः या अभिनेत्रीने सीनची क्लीप इन्स्टावर शेअर केली आणि त्याला एक कॅप्शन दिली, 'धुरंधर २ मध्ये मला कोणी बघितलं का ?'
नियती पारीखची ही इन्स्टा पोस्ट व्हायरल झाली. दहा लाखांपेक्षा जास्त इन्स्टा युझरनी तिची इन्स्टा पोस्ट बघितली. यानंतर सोशल मीडियात नियतीची चर्चा सुरू झाली. काहींनी नियतीचं कौतुक केलं तर काही जणांनी तिला ट्रोल केलं. पण पॉझिटिव्ह असो वा निगेटिव्ह प्रसिद्धी मिळणं महत्त्वाचं हे सूत्र डोक्यात ठेवून नियतीनं उत्साहानं निवडक ट्रोलरना छान प्रतिसाद दिला. छोट्या भूमिकेसाठी २२ लाख रुपये मिळाल्याचं तिनं एका ट्रोलरला सांगितलं.
नियतीचे इन्स्टावर तीन हजारांपेक्षा जास्त फॉलोअर आहेत. पण तिनं इन्स्टा पोस्ट केलेली धुरंधर २ ची क्लिप दहा लाखांपेक्षा जास्त इन्स्टा युझरनी बघितली आहे. तिच्या अकाऊंटवर धुरंधर सिनेमातील निवडक कलाकारांसोबतचे फोटो देखील आहेत.