अफगाण टी20 लीगमध्ये पाकिस्तानी खेळाडूंना नो-एन्ट्री; नेमकं कारण काय? जाणून घ्या

आयपीएल टी20 लीग स्पर्धेच्या प्रचंड यशानंतर जगभरात विविध लीग स्पर्धा सुरू झाल्या आहेत. आता या लीग स्पर्धेत अफगाणिस्तानचं नावही समाविष्ट झालं आहे. अफगाणिस्तान प्रीमियर लीग नावाने ही स्पर्धा खेळवली जाणार आहे. आठ वर्षानंतर या स्पर्धेचं आयोजन केलं जाणार आहे. या लीग स्पर्धेला 2018 मध्ये सुरूवात झाली होती. मात्र त्यानंतर ही स्पर्धा थांबवण्यात आली. मात्र आता ही स्पर्धा यशस्वी करण्यासाठी प्रयत्न केले जात आहेत. पण या स्पर्धेत खेळण्यासाठी विदेशी खेलाडूंची गरज आहे. अफगाणिस्तान क्रिकेट बोर्डाच्या माहितीनुसार, ही स्पर्धा डिसेंबर 2026 च्या शेवटी होईल आणि सर्व सामने हे युएईत होणार आहेत. यासाठी खेळाडूंचा लिलावही होणार आहे.इतकंच काय तर खेळाडूंचे पूलही तयार केले जाणार आहेत. पण यात आश्चर्याचा बाब म्हणजे पाकिस्तानी खेळाडू नसतील. त्याला कारणंही तसंच आहे. पाकिस्तानी क्रिकेट बोर्डाने या लीग स्पर्धेत आपल्या खेळाडूंना भाग घेण्यास बंदी घातली आहे.

पाकिस्तानी खेळाडूंचं काय आहे कारण?

अफगाणिस्तान प्रीमियर लीग स्पर्धेला 27 डिसेंबर 2026 पासून सुरूवात होणार आहे. अफगाण क्रिकेट बोर्ड दुसऱ्यांदा ही स्पर्धा भरवण्याचा प्रयत्न करत आहे. 2018 नंतर थेट आता ही स्पर्धा होणार आहे. पण लीग स्पर्धेत पाकिस्तानचे खेळाडू खेळणार नाहीत. पाकिस्तानी मीडिया रिपोर्टनुसार, पीसीबीने आपल्या खेळाडूंना ही लीग स्पर्धा खेळण्यासाठी ना हरकत प्रमाणपत्र देण्यास मनाई केली आहे. या स्पर्धेत पाकिस्तानी खेळाडूंनी भाग घेऊ नये, अशीच इच्छा पीसीबीची आहे. मात्र या निर्णयामागे नेमकं काय कारण आहे अद्याप अस्पष्ट आहे. पण राजकीय वादाचं कारण सांगितलं जात आहे. कारण काही महिन्यांपासून या दोन्ही देशात कमालीचा वाद आहे. पण हेच कारण आहे का? याबाबत अस्पष्टता आहे. पाकिस्तान क्रिकेट बोर्डाने मागच्या दोन तीन वर्षात टी20 लीगबाबत एक पॉलिसी तयार केली आहे. यात पाकिस्तानी क्रिकेट बोर्डाच्या सेंट्रल काँट्रॅक्टमधील खेळाडूंना एका वर्षात फक्त दोनहून अधिक विदेशी टी20 लीग स्पर्धेत खेळण्याची परवानगी नाही. पण करारबद्ध नसलेल्या खेळाडूंवर तसं काही बंधन नाही. असं असतानाही जर टी20 स्पेशालिस्ट आणि करारबद्ध नसलेल्या खेळाडूंवर बंधनं घातली गेली, तर नक्कीच राजकीय कारण असू शकते. कारण, पाकिस्तानी सैन्यदलाने अफगाणिस्तानच्या काही भागांवर हवाई हल्ले केले होते. दोन्ही देशात मार्च 2026 मध्ये तीन चार वेळा गोळीबारही झाला होता.