डिनो मोरियाचा आका ‘कलानगरात’ - मंत्री नितेश राणे यांचा हल्लाबोल; ‘नाईट लाईफ गँग’चा उल्लेख करत आदित्य ठाकरेंवरही निशाणा
October 2, 2026 02:49 PM
मुंबई : मिठी नदी गैरव्यवहारप्रकरणी अभिनेता डिनो मोरियावर झालेल्या कारवाईच्या पार्श्वभूमीवर राज्याचे मत्स्यव्यवसाय आणि बंदरे विकास मंत्री नितेश राणे यांनी उबाठा गटाचे नेते आदित्य ठाकरे यांच्यावर आरोप केले आहेत. डिनो मोरिया हा महाविकास आघाडीच्या काळातील ‘नाईट लाईफ गँग’चा सदस्य असून, त्याचा आका ‘कलानगरात’ राहतो. त्याच्या माध्यमातून कंत्राटांबाबतच्या बाबी ठरवल्या जात असल्याचा दावा राणे यांनी केला. या प्रकरणामागे राजकीय वरदहस्त कोणाचा होता, हे टप्प्याटप्प्याने समोर येईल, असेही ते म्हणाले.
“महाविकास आघाडीच्या काळात डिनो मोरियाच्या घरी बसून कोणाला किती कंत्राट मिळणार, याबाबत सगळे ठरवायचे. तिथे स्वतः आदित्य ठाकरे असायचे,” असा आरोप राणे यांनी केला. त्यामुळे डिनो मोरिया हा एकमेव आरोपी नसून, त्याला कंत्राटे मिळवून देण्यासाठी कोणाची मदत होती आणि तो कोणाच्या वतीने हे सर्व करत होता, याचीही चौकशी होणे आवश्यक असल्याचे त्यांनी सांगितले. मुंबईला लुटण्याचे आणि लुबाडण्याचे काम ज्यांनी केले, त्या सर्वांना आता कारवाईला सामोरे जावे लागेल. ही तर फक्त सुरुवात आहे. आता पुढे टप्प्याटप्प्याने काय होते ते पाहा, असेही ते म्हणाले.
मिठी नदीतील गाळ उपसा आणि सफाईच्या कामातील आर्थिक गैरव्यवहारप्रकरणी अभिनेता डिनो मोरिया याला मुंबई पोलिसांच्या आर्थिक गुन्हे शाखेने (ईओडब्ल्यू) ...
सुया आदित्य ठाकरेंकडे जात आहेत!
डिनो मोरियाला कंत्राटे स्वतःच्या ताकदीवर किंवा ओळखीच्या जोरावर मिळत होती का, असा सवाल उपस्थित करत मंत्री राणे यांनी या प्रकरणातील राजकीय संबंधांकडे लक्ष वेधले. डिनो मोरियाचे काही नेत्यांसोबतचे संबंध आणि त्याचे फोटो यांचा उल्लेख करत त्यांनी या प्रकरणातील “सुया आदित्य ठाकरेंकडे जात आहेत”, असा दावा केला. “डिनो मोरियाची एवढी ताकद नाही की तो स्वतः हे सगळे कंत्राट मिळवू शकतो. त्याला कोणीतरी मदत करत आहे,” असे राणे म्हणाले. त्याला मदत करणाऱ्या ‘नाईट लाईफ गँग’मधील लोकांचीही टप्प्याटप्प्याने चौकशी आणि वस्तुस्थिती समोर येईल, असा दावा त्यांनी केला.