मुंबई : राज्यात उद्भवलेल्या दुष्काळजन्य परिस्थितीवर मात करण्यासाठी उपाययोजना सुचवण्याकरिता अभ्यासगट स्थापन करण्याचा निर्णय राज्य शासनाने घेतला आहे. मंगळवारी, पशुसंवर्धन, दुग्धव्यवसाय विकास व मत्स्यव्यवसाय विभागाच्या वतीने याबाबतचा शासन निर्णय जारी करण्यात आला.
अपुऱ्या पावसामुळे उद्भवलेल्या दुष्काळजन्य परिस्थितीचा आढावा घेऊन उपाययोजना सुचविण्यासाठी यापूर्वी महसुलमंत्री चंद्रशेखर बावनकुळे यांच्या अध्यक्षतेखाली मंत्रिमंडळाची उपसमिती गठीत करण्यात आली आहे. दरम्यान, या मंत्रिमंडळ उपसमितीच्या बैठकीत दुष्काळजन्य परिस्थितीवर मात करण्यासाठी उपाययोजना सुचविण्यासाठी अपर मुख्य सचिव (महसूल) यांच्या अध्यक्षतेखाली अभ्यासगट स्थापन करण्याचा निर्णय घेण्यात आला. या अनुषंगाने आता अभ्यासगट गठीत करण्यात आला आहे.
मुख्यमंत्री देवेंद्र फडणवीस यांच्या अध्यक्षतेखाली पार पडलेल्या राज्य मंत्रिमंडळाच्या बैठकीत आज (६ ऑक्टोबर) सर्वसामान्यांपासून ते पोलीस दलापर्यंत ...
महसुल विभागाच्या अपर मुख्य सचिवांच्या अध्यक्षतेखाली स्थापन करण्यात आलेल्या या अभ्यासगटात वित्त, नियोजन, ऊर्जा, वने या विभागांचे अपर मुख्य सचिव सदस्य आहेत. तसेच मदत व पुनर्वसन, सहकार, मृद व जलसंधारण आणि जलसंपदा विभागाचे प्रधान सचिव हेदेखील या अभ्यासगटात सदस्य असतील. तर, कृषी आणि ग्रामविकास विभागाचे सचिव हे सदस्य आणि पदुम विभागाचे सचिव हे या अभ्यासगटात सदस्य सचिव असतील.
दुष्काळजन्य परिस्थतीवर मात करण्यासाठी आपल्या राज्यात तसेच इतर राज्यात यापुर्वी केलेल्या चांगल्या उपाययोजनांचा अभ्यास करुन उपाययोजना सुचविणे, उपलब्ध चारा व संभाव्य उत्पादन करण्यात येणारा चारा आणि पुढील काळात आवश्यक चारा विचारात घेऊन चारा नियोजन करणे तसेच इतर अनुषांगिक बाबींचा अभ्यास करुन उपाययोजना सुचविण्याचे काम या अभ्यासगटाचे असेल.
