मुंबई: महाराष्ट्राची समृद्ध लोकसंस्कृती, परंपरा आणि कलांचा वारसा केवळ गणेशोत्सवापुरता मर्यादित न राहता वर्षभर जनमानसात जिवंत राहावा, या उद्देशाने ‘bappa.org’ च्या वतीने ‘बाप्पाचा कट्टा’ हा ९० दिवसांचा भव्य सांस्कृतिक उपक्रम मुंबई आणि पुणे येथे आयोजित करण्यात येत आहे. गुरुवार, २९ ऑक्टोबर २०२६ रोजी सुरू होणाऱ्या या उपक्रमात सांस्कृतिक कार्यमंत्री ॲड. आशिष शेलार आणि बाप्पा डॉट ऑर्गचे श्रीपाद आष्टेकर यांच्या प्रमुख उपस्थितीत महाराष्ट्राच्या सांस्कृतिक परंपरांना मोठे व्यासपीठ मिळणार आहे.
मुख्य उद्दिष्ट आणि संकल्पना
मुख्यमंत्री देवेंद्र फडणवीस यांच्या महाराष्ट्राचा सांस्कृतिक वारसा प्रत्येक कुटुंबापर्यंत पोहोचविण्याच्या संकल्पनेला पुढे नेत या उपक्रमाद्वारे सर्वसामान्य कुटुंबे, मित्रमंडळी आणि सहकाऱ्यांना आपले कलागुण सादर करण्याची सुवर्णसंधी मिळणार आहे. उखाणे, मंगळागौरीचे खेळ, भोंडला, पोवाडा, लोककला, म्हणी, अंताक्षरी तसेच पारंपरिक आणि आधुनिक कलांच्या संगमातून हा सांस्कृतिक कट्टा रंगणार आहे.
ठिकाण आणि वेळ
मुंबई: वांद्रे बँडस्टँड
पुणे: फर्ग्युसन कॉलेज रस्ता (एफ.सी. रोड)
रविवार, १५ नोव्हेंबर २०२६ ते २४ जानेवारी २०२७ या कालावधीत दर रविवारी सायंकाळी ७ ते १० या वेळेत हे कार्यक्रम पार पडतील. यामध्ये भावंडांमधील धमाल, बोलीभाषेतील स्पर्धा, हिप-हॉप, रॅप, जुन्या नाटकांतील प्रसंग आणि तिळगुळाचे उखाणे यांसारख्या विविध संकल्पना पाहायला मिळतील.
मुंबई: राज्यातील मच्छीमार, मत्स्यशेतकरी, मत्स्यव्यावसायिक आणि मच्छीमार संस्थांना शासनाच्या विविध योजनांचा लाभ घेणे अधिक सुलभ व्हावे, यासाठी ...
सहभागाचे नियम व ऑडिशन प्रक्रिया
पात्रता: कुटुंबीय, मित्र, सहकारी, विद्यार्थी-शिक्षक किंवा एकत्र राहणाऱ्या व्यक्तींच्या जोड्यांना सहभागीता घेता येईल. जोडीतील किमान एका सदस्याचे वय १८ ते ३५ वर्षे असणे बंधनकारक आहे.
भाषा: भारतीय भाषांमधून सादरीकरण करता येईल, मात्र त्यात मराठीतील किमान एक ओळ असणे आवश्यक आहे.
वेळ: सहभागी जोड्यांना आपला कलाप्रकार सादर करण्यासाठी ३ मिनिटे मिळतील.
प्रवेश शुल्क: या उपक्रमात सहभागी होण्यासाठी कोणतेही शुल्क आकारले जाणार नाही.
ऑडिशन: इच्छुकांनी ‘bappa.org’ च्या +९१ ९१३६१ ७२६८१ या व्हॉट्सॲप क्रमांकावर ३० सेकंदांचा ऑडिशन व्हिडिओ पाठवणे आवश्यक आहे. प्रत्येक शहरातून दर आठवड्याला १६ जोड्यांची निवड केली जाईल.
मतदान आणि आकर्षक पारितोषिके
विजेत्यांची निवड व्हॉट्सॲपद्वारे होणाऱ्या सार्वजनिक मतदानाद्वारे होईल (प्रत्येक मोबाईल क्रमांकावरून आठवड्यातून एकदाच मतदान करता येईल). प्रत्येक शहरातील साप्ताहिक स्पर्धेतील प्रथम, द्वितीय आणि तृतीय क्रमांकाच्या विजेत्यांना अनुक्रमे ५,००० रुपये, ३,००० रुपये आणि २,००० रुपयांची रोख पारितोषिके आणि सुवर्ण, रौप्य व कांस्य स्वरूपातील ‘मोदक करंडक’ प्रदान केले जातील. प्रत्येक कार्यक्रमाचे थेट प्रक्षेपण यूट्यूबवर केले जाईल आणि प्रत्येक आठवड्यात सेलिब्रिटी सह-यजमान कलाकारांना प्रोत्साहन देतील.
उद्या उद्घाटन सोहळे
मुंबई: २९ ऑक्टोबर रोजी रात्री ९ वाजता वांद्रे बँडस्टँड येथे.
पुणे: २९ ऑक्टोबर रोजी सकाळी १० वाजता एफ.सी. रोड येथे.
महाअंतिम सोहळा
या उपक्रमाचा भव्य महाअंतिम सोहळा प्रजासत्ताक दिनी, मंगळवार, २६ जानेवारी २०२७ रोजी मुंबईतील वांद्रे बँडस्टँड येथे पार पडेल (पुण्यात याचे थेट प्रक्षेपण होईल). या सोहळ्यात मंत्री आशिष शेलार यांच्या हस्ते ‘कलाधिपती करंडक’ प्रदान केला जाईल, तसेच चंद्रोदयाच्या वेळी ‘६४ कलांचा मोदक’ सादर केला जाणार आहे.
महाराष्ट्राची लोककला आणि सांस्कृतिक परंपरा नव्या पिढीपर्यंत पोहोचवण्यासाठी मुंबई आणि पुणे येथील नागरिकांनी या सांस्कृतिक सोहळ्यांना मोठ्या संख्येने उपस्थित राहण्याचे आवाहन करण्यात आले आहे.