मुक्या प्राण्यांच्या सुरक्षिततेचा विषय निघाला की अनेकांच्या डोळ्यात पाणी येतं, तर काही जण त्यांच्या रक्षणासाठी धावून जातात. सध्या सोशल मीडियावर असाच एका तरुणाच्या धाडसाचा आणि संवेदनशीलतेचा व्हिडिओ तुफान व्हायरल होत आहे. रस्त्यावरून जीव मुठीत धरून पळणाऱ्या एका चिमुकल्या मांजराच्या पिल्लाला वाचवण्यासाठी एका तरुण बाइकस्वाराने दाखवलेले प्रसंगावधान खरोखरच कौतुकास्पद आहे.
नेमकी घटना काय ?
View this post on Instagram
हा व्हायरल व्हिडिओ इन्स्टाग्रामवरील ‘Radwan Unfiltered’ या अकाउंटवरून शेअर करण्यात आला आहे. बांग्लादेशमधील रदवान नावाचा हा तरुण आपल्या बाइकवरून चालला असताना, त्याच्या नजरेला एक हृदयद्रावक दृश्य पडले. रस्त्यावरून वेगाने जाणाऱ्या एका कारच्या चाकाखाली येण्याच्या मार्गावर एक चिमुकले मांजराचे पिल्लू होते. जर तिथे एका सेकंदाचाही उशीर झाला असता, तर त्या पिल्लाचा जागीच जीव गेला असता.
थरारक प्रसंग आणि तरुणाचे धाडस
परिस्थितीचे गांभीर्य ओळखताच रदवानने कोणतीही वेळ न घालवता आपली बाइक मागे वळवली आणि थेट चालत्या कारला हात दाखवून थांबवले. कार थांबताच त्याने क्षणाचाही विलंब न करता त्या पिल्लाला आपल्या हाताने उचलले. पिल्लाचा जीव वाचवल्यानंतर त्याने सुरक्षेसाठी त्याला आपल्या कुर्त्याच्या खिशात सुरक्षितपणे ठेवले. त्यानंतर त्याने त्या पिल्हाला एका पिशवीत ठेवून त्याला आवडीने दूधही पाजले. त्याच्या या संपूर्ण रेस्क्यू मोहिमेचा व्हिडिओ कॅमेऱ्यात कैद झाला आहे.
सोशल मीडियावर कौतुकाचा वर्षाव
हा व्हिडिओ इंटरनेटवर पाहिल्यानंतर युजर्स भावूक झाले आहेत आणि कमेंट्समध्ये या तरुणावर कौतुकाचा वर्षाव करत आहेत. अनेकांनी या तरुणाला 'खरा हिरो' म्हटले असून, "अशी माणुसकी आजही जिवंत आहे," अशा प्रतिक्रिया दिल्या आहेत. व्यस्त रस्त्यावर एका मुक्या जिवासाठी स्वतःचा जीव धोक्यात घालून धावणाऱ्या या तरुणाची कथा प्रत्येकालाच भारावून टाकणारी आहे.
(टीप : सदर वृत्त सोशल मीडियावर उपलब्ध माहिती आणि व्हायरल झालेल्या दाव्यांवर आधारित आहे.)
