Monday, November 16, 2026

PM Modi Barong Tagalog : पंतप्रधान मोदींचा फिलिपिन्सच्या 'बॅरोंग टॅगालॉग' पोशाखात रॉयल लूक; 'गाला डिनर'मध्ये वेधले जागतिक नेत्यांचे लक्ष!

मार्कोस यांनी ४९ व्या आसियान (ASEAN) शिखर परिषदेसाठी आलेल्या जगभरातील मान्यवर नेत्यांच्या सन्मानार्थ या शाही मेजवानीचे आयोजन केले होते. 'नॅव्हिगेटिंग द फ्युचर' (भविष्याची वाटचाल ठरवणे) या संकल्पनेवर ही परिषद होत आहे. या सोहळ्यात पंतप्रधान मोदींचा लूक सर्वांचे लक्ष वेधून घेत होता. त्यांनी चक्क फिलिपिन्सचा राष्ट्रीय आणि पारंपरिक पोशाख असलेला 'बॅरोंग टॅगालॉग' (Barong Tagalog) परिधान केला होता. विशेष म्हणजे, राष्ट्राध्यक्ष मार्कोस यांनीही असाच पोशाख घातला होता, ज्यामुळे दोन्ही नेत्यांमधील मैत्रीपूर्ण संबंध दिसून आले.

अनिवासी भारतीयांना आपुलकीची विचारपूस!

मनिला : पंतप्रधान नरेंद्र मोदी (PM Narendra Modi) सध्या तीन दिवसांच्या फिलिपिन्स दौऱ्यावर असून, सोमवारी संध्याकाळी ते मनिला येथील 'फिलिपिन्स आंतरराष्ट्रीय कन्व्हेन्शन सेंटर'मध्ये आयोजित भव्य 'गाला डिनर'साठी दाखल झाले. फिलिपिन्सचे राष्ट्राध्यक्ष फर्डिनांड आर. मार्कोस यांनी ४९ व्या आसियान (ASEAN) शिखर परिषदेसाठी आलेल्या जगभरातील मान्यवर नेत्यांच्या सन्मानार्थ या शाही मेजवानीचे आयोजन केले होते. 'नॅव्हिगेटिंग द फ्युचर' (भविष्याची वाटचाल ठरवणे) या संकल्पनेवर ही परिषद होत आहे. या सोहळ्यात पंतप्रधान मोदींचा लूक सर्वांचे लक्ष वेधून घेत होता. त्यांनी चक्क फिलिपिन्सचा राष्ट्रीय आणि पारंपरिक पोशाख असलेला 'बॅरोंग टॅगालॉग' (Barong Tagalog) परिधान केला होता. विशेष म्हणजे, राष्ट्राध्यक्ष मार्कोस यांनीही असाच पोशाख घातला होता, ज्यामुळे दोन्ही नेत्यांमधील मैत्रीपूर्ण संबंध दिसून आले.

मनिलामध्ये रामायणाचा जागर आणि भारतीय समुदायाशी जिव्हाळ्याचा संवाद

या रात्रीच्या मेजवानीपूर्वी, दिवसाच्या सुरुवातीला पंतप्रधान मोदी मनिला विमानतळावर पोहोचताच तिथे जमलेल्या अनिवासी भारतीयांनी त्यांचे जल्लोषात स्वागत केले. मोदींनीही तितक्याच आपुलकीने सर्वांशी संवाद साधला. यानंतर त्यांनी रामायणावर आधारित एका विशेष नाट्यप्रयोगाला हजेरी लावून आपल्या दौऱ्याची सांस्कृतिक सुरुवात केली. इलिगन शहरातील 'इंटिग्रेटेड परफॉर्मिंग आर्ट्स गिल्ड' (IPAG) या संस्थेने सादर केलेला 'सीता: द रामायण रिव्हिजिटेड' हा नाट्यप्रयोग मोदींनी पाहिला. भारताचे प्राचीन महाकाव्य रामायण हे आग्नेय आशियाच्या संस्कृतीत किती खोलवर रुजले आहे, याचा प्रत्यय या प्रयोगातून आला. तसेच, मनिलातील एका कार्यक्रमात 'श्री सत्य साई शाळे'च्या फिलिपिनो आणि भारतीय वंशाच्या विद्यार्थ्यांनी सादर केलेले 'पूर्ण कुंभ श्लोक' पठणही त्यांनी ऐकले.

अनिवासी भारतीयांचा उत्साह आणि मोदींची 'अयोध्ये'बाबत आपुलकीची विचारपूस

पंतप्रधानांची प्रत्यक्ष भेट झाल्यामुळे फिलिपिन्समध्ये राहणारे भारतीय कमालीचे भारावून गेले होते. अनिवासी भारतीय दिनेश मिश्रा म्हणाले की, "पंतप्रधान मोदींना भेटणे हा आमच्यासाठी मोठा सन्मान आहे. ते आम्हा सर्वांचे प्रेरणास्थान आहेत आणि 'विकसित भारत २०४७' चे स्वप्न पूर्ण करण्यासाठी आपल्या सर्वांना एकत्र काम करायचे आहे." पंकज नावाच्या एका सदस्याने सांगितले की, "मोदींच्या नेतृत्वामुळे आज परदेशात भारतीयांकडे पाहण्याचा दृष्टिकोन बदलला असून आम्हाला खूप आदर मिळतो." तर, गेल्या दोन वर्षांपासून फिलिपिन्समध्ये राहणाऱ्या रोहित यांनी एक खास किस्सा सांगितला. ते म्हणाले, "पंतप्रधानांनी आमच्याशी अत्यंत आपुलकीने गप्पा मारल्या आणि विचारले की, तुम्ही अयोध्येला जाऊन आलात का ? आम्ही नक्कीच अयोध्येला भेट देऊ."

सागरी सुरक्षा आणि इंडो-पॅसिफिक सहकार्यावर भारताचे विशेष लक्ष

१६ ते १८ नोव्हेंबर दरम्यान होणाऱ्या या दौऱ्यात पंतप्रधान मोदी २३ व्या आसियान-भारत शिखर परिषद आणि २१ व्या पूर्व आशिया शिखर परिषदेत सहभागी होणार आहेत. ११ देशांचा समावेश असलेल्या आसियान संघटनेच्या या बैठकीत प्रादेशिक सुरक्षा, सागरी वाद आणि आर्थिक सहकार्यावर महत्त्वाची चर्चा होणार आहे. इंडो-पॅसिफिक क्षेत्रात शांतता राहावी यासाठी समविचारी देशांसोबत नौदल समन्वय आणि सागरी सुरक्षा वाढवण्यावर भारताचा मुख्य भर असेल. २००५ मध्ये सुरू झालेल्या 'पूर्व आशिया शिखर परिषदे'त आसियान देशांसोबत भारत, अमेरिका, रशिया, चीन, जपान, दक्षिण कोरिया, ऑस्ट्रेलिया आणि न्यूझीलंड हे बडे देश सहभागी होतात. या बैठकीत दक्षिण चीन समुद्रातील आचारसंहितेबाबत (Code of Conduct) आसियान आणि चीनमधील प्रलंबित वादावरही चर्चा अपेक्षित आहे. मात्र, या चर्चेत प्रगती होत असली तरी फिलिपिन्सच्या अध्यक्षतेखाली हा करार पूर्ण होऊ शकणार नाही, असे फिलिपिन्सच्या परराष्ट्र सचिव थेरेसा लाझारो यांनी स्पष्ट केले आहे.

व्यापार कराराला गती आणि १९ जागतिक नेत्यांची मांदियाळी

सुरक्षेसोबतच आसियान देशांशी व्यापारी संबंध अधिक घट्ट करण्याचा भारताचा प्रयत्न आहे. यामध्ये 'आसियान-भारत वस्तू व्यापार कराराचा' (AITIGA) आढावा घेऊन ही चर्चा लवकरात लवकर निकाली काढणे हा भारताचा प्रमुख अजेंडा आहे. फिलिपिन्स सरकारने दिलेल्या माहितीनुसार, या परिषदेसाठी विविध देशांचे आणि जागतिक संस्थांचे किमान १९ प्रमुख नेते मनिलामध्ये एकत्र आले आहेत. यामध्ये चीनचे पंतप्रधान ली कियांग, ब्राझीलचे राष्ट्राध्यक्ष लुईझ इनासियो लुला दा सिल्वा, कॅनडाचे पंतप्रधान मार्क कार्नी आणि संयुक्त राष्ट्रांचे सरचिटणीस अँटोनियो गुटेरेस यांचा समावेश आहे. याशिवाय ऑस्ट्रेलिया, इंडोनेशिया, मलेशिया, थायलंड, सिंगापूर आणि तिमोर-लेस्टे या देशांचे पंतप्रधानही उपस्थित आहेत. या सर्व जागतिक नेत्यांच्या उपस्थितीत इंडो-पॅसिफिक क्षेत्राच्या भविष्यावर मंथन होणार असून, आग्नेय आशियासोबतच्या संबंधांना नवी दिशा देण्याचा भारताचा प्रयत्न असेल.
Comments
Add Comment
प्रहार ई-पेपर
हे पण पहा


संबंधित बातम्या आणखी वाचा >