मालेगाव : शहरालगतच्या द्याने रमजानपुरा पोलिसांनी अवैध अमली पदार्थाची विक्री आणि तस्करी करणाऱ्यांवर मोठी कारवाई केली आहे. पोलिसांनी केलेल्या या कारवाईत १ लाख ५९ हजार रुपयांची एम.डी. पावडर, एक दुचाकी आणि इलेक्ट्रॉनिक वजनकाटा असा एकूण १ लाख ९२ हजार रुपयांचा मुद्देमाल जप्त केला आहे. याप्रकरणी दोन संशयितांना ताब्यात घेतले आहे.
पोलिसांना खडकी रोडवर अमली पदार्थाची विक्री करण्यासाठी संशयितयेणार असल्याची माहिती मिळाली होती. या माहितीच्या आधारे द्याने रमजानपुरा पोलिसांच्या पथकाने सोमवारी (ता. २४) रात्री अकराच्या सुमारास द्याने येथील गणेश नगर ते असलम हॉटेलकडे जाणाऱ्या खडकी रस्त्यावर छापा टाकला. यावेळी अफसर अनिस कुरेशी (वय २२, रा. अज्जू लसुनवाले यांचे गट, दरेगाव, ता. मालेगाव) हा तरुण दुचाकी (एमएच ४१-एडी ८२२६) सह मिळून आला. पथकाने दुचाकी ताब्यात घेऊन तिची तपासणी केली असता एका प्लास्टिकच्या पिशवीत १ लाख ५९ हजारांची ५३ ग्रॅम एम.डी. पावडर मिळून आली. चौकशीदरम्यान संशयित अफसर याने ही पावडर हनिफ शेख गुफरान (रा. कमालपुरा, मालेगाव) याच्या सांगण्यावरून बाळगल्याचे समोर आले. त्यामुळे पोलिसांनी हनिफ यालाही ताब्यात घेतले आहे. दरम्यान, या कारवाईची माहिती मिळताच उपविभागीय पोलिस अधिकारी सिद्धार्थ बारवाल, सहाय्यक पोलिस निरीक्षक आनंदा माळी, उपनिरीक्षक नाना चव्हाण यांनी घटनास्थळी भेट देऊन पाहणी केली. याप्रकरणी हवालदार दीपक खैरणार यांनी तक्रार दिली आहे.
