पिंपरी-चिंचवड: गणेशोत्सवाच्या आनंदात आणि उत्साहात असतानाच पिंपरी-चिंचवड शहरातून एक अत्यंत धक्कादायक घटना समोर आली आहे. जाधववाडी परिसरात जुन्या आर्थिक देवाण-घेवाणीच्या वादातून एका तरुणावर पिस्तूलातून थेट गोळीबार करून त्याला जीवे मारण्याचा प्रयत्न करण्यात आला. या थरारक घटनेमुळे परिसरात आणि संपूर्ण शहरात मोठी खळबळ उडाली असून नागरिकांमध्ये भीतीचे वातावरण पसरले आहे.(Pimpri firing)
नेमकी घटना कशी घडली?
पोलिसांनी दिलेल्या माहितीनुसार, रवी धनाजी घोगरे (वय ३५) हे १४ सप्टेंबर रोजी पहाटे २:१५ वाजण्याच्या सुमारास जाधववाडी येथील ओलियो हॉटेलजवळ आले होते. त्याच वेळी मुख्य आरोपी स्वप्नील कांताराम जाधव आणि त्याचा चालक रोशन पिंगळे तिथे उपस्थित होते. पूर्ववैमनस्य आणि जुन्या आर्थिक देवाण-घेवाणीच्या कारणावरून रवी घोगरे आणि आरोपींमध्ये बाचाबाची सुरू झाली. वाद वाढल्यानंतर आरोपी स्वप्नील जाधव याने "तुला आज जिवंत सोडत नाही" अशी धमकी देत आपल्या जवळील पिस्तूल काढून रवी यांच्या दिशेने थेट गोळी झाडली. या अचानक झालेल्या हल्ल्यात रवी घोगरे गंभीर जखमी होऊन रक्ताच्या थारोळ्यात खाली कोसळले. घटनेनंतर परिसरात एकच दशत पसरली. स्थानिकांच्या आणि पोलिसांच्या मदतीने त्यांना तातडीने जवळच्या रुग्णालयात दाखल करण्यात आले. सुदैवाने, वेळेवर उपचार मिळाल्यामुळे सध्या त्यांची प्रकृती स्थिर असल्याची माहिती डॉक्टरांनी दिली आहे.(Pimpri firing)
छत्रपती संभाजीनगर: गणपती बाप्पाच्या आगमनाच्या उत्साहात आणि आनंदा वातावरणात सुरू असलेल्या मिरवणुकीत एका भरधाव कंटेनरने शिरकाव केल्याने भीषण ...
आरोपी अवघ्या काही तासांत जेरबंद; मुद्देमाल जप्त
घटनेचे गांभीर्य लक्षात घेऊन चिखली पोलिसांनी तत्काळ तपासाची चक्रे वेगाने फिरवली. जखमी रवी घोगरे यांच्या फिर्यादीवरून पोलिसांनी मुख्य आरोपी स्वप्नील कांताराम जाधव आणि चालक रोशन पिंगळे यांच्याविरोधात भारतीय न्याय संहिता (BNS) आणि भारतीय शस्त्र कायद्यान्वये (Arms Act) गंभीर कलमांखाली गुन्हा दाखल केला. चिखली पोलिसांनी धडक कारवाई करत दोन्ही आरोपींना अवघ्या काही तासांत बेड्या ठोकल्या आहेत. तपासादरम्यान पोलिसांनी गुन्ह्यात वापरलेले पिस्तूल, वाहन आणि मोबाईल फोन असा ऐवज जप्त केला आहे. या प्रकरणाचा पुढील सखोल तपास चिखली पोलीस ठाण्याचे पोलीस निरीक्षक अमोल फडतरे करत आहेत. ऐन सणासुदीच्या काळात घडलेल्या या गोळीबाराच्या घटनेमुळे कायदा आणि सुव्यवस्थेचा प्रश्न पुन्हा एकदा ऐरणीवर आला आहे.(Pimpri firing)
