Thursday, November 19, 2026

Eastern Freeway News: ठाण्यातून 20 मिनिटांत मुंबई गाठता येणार, ईस्टर्न फ्रीवेवरून प्रवास सुसाट, कधी सुरु होणार नवा मार्ग?

मुंबई- ठाणे दरम्यानची होणारी दररोजची वाहतूक कोंडी कायमची फोडण्यासाठी एमएमआरडीएकडून 13.9 किमी लांबीचा 'ईस्टर्न फ्रीवे एक्स्टेंशन' तयार केला जात आहे. या संबंधित महत्त्वाचे अपडेट समोर आले.

मुंबई: मुंबई- ठाणे प्रवास करणाऱ्या प्रवाशांना कायमच वाहतूक कोंडीला सामोरे जावे लागते. विशेषत: नोकरदारांना या वाहतूक कोंडीचा फटका बसतो. मुंबई- ठाणे दरम्यानची होणारी ही दररोजची वाहतूक कोंडी कायमची फोडण्यासाठी एमएमआरडीएकडून 13.9 किमी लांबीचा 'ईस्टर्न फ्रीवे एक्स्टेंशन' (उन्नत मार्ग) तयार केला जात आहे. मुंबई महानगर प्रदेश विकास प्राधिकरण (MMRDA)च्या मार्फत हा ब्रिज तयार केला जात आहे. या उन्नत मार्गामध्ये, एक अत्यंत महत्त्वाचा आणि ऐतिहासिक टप्पा पार पडला आहे. भांडूप पंपिंग स्टेशनजवळ पहिला 90 टनांचा महाकाय सेगमेंट (प्रीकास्ट ब्लॉग) यशस्वीपणे उभारण्यात आला आहे.

महाकाय सेगमेंट यशस्वीपणे उभारण्यात आल्यानंतर 'ईस्टर्न फ्रीवे एक्स्टेंशन'चा एक महत्त्वाचा टप्पा पार पडला आहे. महत्त्वाचे म्हणजे, ईस्टर्न एक्स्प्रेस हायवेवर खालून वाहनांची ये- जा सुरू असतानाच एमएमआरडीएकडून काम केलं जात होतं. कोणताही विशेष ब्लॉक न घेता पुलाचे काम करण्यात आले. पुलाची उभारणी करण्यासाठी 'लाँचिंग गॅन्ट्री' या आधुनिक तंत्रज्ञानाचा वापर करण्यात आला. त्यामुळे खाली वाहनांची ये- जा सुरू असताना आणि वाहनांना वाहतूकीवेळी कोणताही अडथळा न येता हवेतच महाकाय गर्डर सुरक्षितपणे बसवण्याचं काम एमएमआरडीएकडून करण्यात आलं आहे. या सहा पदरी उन्नत मार्गामुळे वाहतूकदारांना फार मोठा दिलासा मिळणार आहे.

13.9 किमीचा ईस्टर्न फ्रीवे हा ठाण्यातील आनंद नगर ते घाटकोपरमधील छेडा नगर दरम्यान बांधण्यात येणार आहे. या मार्गासाठी एमएमआरडीएला तब्बल 2682 कोटी रूपयांचा खर्च येणार आहे. या उन्नत मार्गासाठी एमएमआरडीएकडून 40 मीटरचे एकूण 288 स्पॅन उभारले जाणार आहे. तर, संपूर्ण प्रोजेक्टसाठी 3732 प्रीकास्ट सेगमेंटचा वापर केला जाणार आहे. प्रवाशांच्या सोयीच्या दृष्टीने या मार्गावर मुलुंड, ऐरोली, जेव्हीएलआर (JVLR), कांजूरमार्ग, विक्रोळी आणि घाटकोपर या प्रमुख ठिकाणांना जोडणारे रॅम्प आणि लूप तयार करण्यात येणार आहे, असा हा संपूर्ण ब्रिज उभारला जाणार आहे. ह्या उन्नत मार्गामुळे ठाणे- मुंबईकरांना फार मोठा दिलासा मिळणार आहे.

दरम्यान, सकाळी आणि संध्याकाळच्या वेळी नोकरदारांना ठाण्यावरून दक्षिण मुंबईच्या दिशेने आणि दक्षिण मुंबईवरून ठाण्याला प्रवास करताना वाहनांच्या रांगेमध्ये तासनतास अडखळत राहावं लागतं. यामुळे मोठ्या प्रमाणावर इंधनाची आणि वेळेचे मोठे नुकसान होते. हेच होणारे नुकसान लक्षात घेत, सरकारने नोकरदारांच्या दृष्टीने महत्त्वाच्या प्रोजेक्टची आखणी केली. या उन्नत मार्गामुळे दक्षिण मुंबई ते ठाण्यादरम्यानचा दररोजचा 20 ते 25 मिनिटांचा प्रवास कमी होणार आहे. सध्या पुलाचे काम प्रगतीपथावर आहे. किती दिवसांमध्ये हा पूल नोकरदारांच्या सेवेमध्ये दाखल होईल? हे पाहणं महत्त्वाचं ठरणार आहे.

Comments
Add Comment
प्रहार ई-पेपर
हे पण पहा


संबंधित बातम्या आणखी वाचा >