प्रसिद्ध रहस्यकथा लेखक गुरुनाथ नाईक गोव्यात आजारी असल्याची आणि त्यांना मदतीची गरज असल्याची बातमी फेसबुक मित्र मुरलीधर खैरनार यांनी काही दिवसांपूर्वी फेसबुकात पोस्ट केली. ती अनेकांनी रिपोस्ट केली आणि आता त्यांच्या मदतीसाठी काही हालचाली सुरू झाल्या आहेत.
प्रसिद्ध रहस्यकथा लेखक गुरुनाथ नाईक गोव्यात आजारी असल्याची आणि त्यांना मदतीची गरज असल्याची बातमी फेसबुक मित्र मुरलीधर खैरनार यांनी काही दिवसांपूर्वी फेसबुकात पोस्ट केली. ती अनेकांनी रिपोस्ट केली आणि आता त्यांच्या मदतीसाठी काही हालचाली सुरू झाल्या आहेत. मूळ बातमी ‘गोमंतक’च्या वार्ताहर योजना यादव-पाटील यांनी दिली होती. प्रसारमाध्यमांमध्ये चर्चेत असलेल्या ‘बेरक्या’नेही ही बातमी त्याच्या ब्लॉगवर पोस्ट केली आणि हा ज्येष्ठ लेखक आयुष्याच्या सांजसावल्या सुशेगात घालवायच्या वयात गोव्यात दोन वेळच्या जेवणाची भ्रांत करतोय, रेशनिंगचा तांदूळ खाऊन पत्नीसह दिवस काढतोय अशा त्यांच्या चाहत्यांना अस्वस्थ करणा-या काही गोष्टी समोर आल्या.
रहस्यकथांच्या जगात एकेकाळी गुरुनाथ नाईक या नावाचा दबदबा होता. ब्रँडनेमच होतं ते. मला वाटतं आता पन्नाशीकडे सरकणारी मराठी वाचकांची एक अख्खी पीढी तरुण वयात या नावाच्या प्रेमात असणार. जशी सुहास शिरवळकर यांची वाचकांवर जबरदस्त मोहिनी होती तशीच जादू गुरुनाथ नाईक यांच्या लेखणीने त्या काळातील वाचकांवर केली होती. रहस्यकथांचा चस्का लागण्याचं विशिष्ट वय सांगता येत नाही. वाचनाची आवड असेल आणि एखादी रहस्यकथा हातात आली तर त्यात गुरफटून जाणे ओघाने येते. आणि एकदा का चस्का लागला की सुटता सुटत नाही. त्यांच्या अशा वेगवेगळ्या वयातील चाहत्यांपैकी मीही एक होतो आणि आहेही. गोष्टीच्या पुस्तकांच्या नादात अभ्यासाची पुस्तके हातात जेमतेमच धरली जायची त्याच नवथर वाचकवयात अभ्यासाच्या पुस्तकांमध्ये दडवून गुरुनाथ नाईकांच्या शिलेदार, गोलंदाज वा गरुड किंवा रातराणी कथा आरामात वाचता येतात याचा शोध लागला होता. तुफान पुस्तकं वाचून काढली होती त्यावेळी. त्यात हेमंत कर्णिक यांच्या महंत कथा, ब्लॅकस्टार कथा, अर्नाळकरांच्या झुंजार कथा, एस. एम. काशीकर यांच्या धूमकेतू कथा, लावसट-जखीण-हडळ-आग्यावेताळ-मुंजा अशा बाबा मंडळींना गपगुमान करणा-या पातंजलीच्या करामती सांगणा-या दिवाकर नेमाडे यांच्या पातंजली कथा.. जे जे मिळेल ते वाचण्याचा झपाटा लावला होता. त्यातही माझी नजर नाईकांच्या कॅप्टन दीपने वा गरुड, रातराणी या अफलातून मंडळींनी केलेल्या कामगिरीवर असायची. रद्दीवाला, लायब्ररी जिथून मिळेल तिथून रहस्यकथांची ७०-८० पानांची छोटी पुस्तकं आणायची आणि एका बैठकीत वाचून काढायची हा नित्यक्रम झाला होता. आजही रहस्यकथांकडेच पहिले लक्ष जाते. फक्त भाषांचा आणि लेखकांचा परीघ वाढला आहे एवढंच.
सांगायचं हेच की रहस्यकथांची पहिली ओळख म्हणा वा नाद म्हणा, गुरुनाथ नाईक आदी प्रभृतींच्या लेखनामुळे लागला. तोच लेखक आज अडचणीत आहे. एकसे एक रहस्यकथा कादंब-या, लेख, पत्रकारिता अशी चौफेर
लेखणी चालवणा-या गुरुनाथ नाईक यांच्या लेखनयज्ञाची दखल २०१२मध्ये ‘लिम्का बुक ऑफ रेकॉर्ड्स’नेही घेतली होती. मूळचा गोव्याचा हा लेखक उमेदीच्या काळात पायाला चक्र लागल्यागत अनेक ठिकाणी फिरला. पत्रकारिता आणि पुस्तकलिखाण या दोन्ही माध्यमांत लेखणीच्या आधारानेच त्याने त्यांचा संसार सांभाळला. वाढतं वय आणि मानेचं दुखणं यामुळे आयुष्याच्या सांजवेळी त्यांनी पत्नीसह पुन्हा गोवा गाठलं. आज मानेचं दुखणं वाढलंय, घराबाहेर पडणं अशक्य आहे, उतारवयामुळे पूर्वीसारखं लिखाणही होत नाही, चरितार्थाचं अन्य साधन वा आधार नाही अशी त्यांची अवस्था आहे. त्यांच्या एका मुलाखतीत त्यांनी म्हटलं होतं, चार रुपयांपासून ५०० रुपये मानधन घेऊन त्यांनी एकेकाळी आठवडयात एक प्रसंगी दोन अशा वेगाने रहस्यकथा लिहिल्या होत्या. आता हात थकले आहेत, लेखणीही थबकली आहे.
‘गोमंतक’मध्ये त्यांची बातमी येण्याआधी त्यांची गाठ अजब पुस्तकालयाच्या ग्रंथप्रदर्शनात पडली होती. गाठ पडली म्हणजे पन्नास रुपयांत कोणतंही पुस्तक या योजनेत त्यांची पुस्तकं उपलब्ध होती. ती पुस्तकं दिसल्यावर रहस्यकथांसाठी पागल असण्याचे जुने दिवस आठवले. गुरुनाथ नाईकांच्या आणि इतर लेखकांच्या रहस्यकथांसाठी डोंबिवलीतील रद्दीवाल्यांकडे मारलेल्या चकरा, उलथेपालथे केलेले सेकंडहँड पुस्तकांचे ढीग आठवले. लायब्ररीत लावलेली फिल्डिंग आठवली. आमच्या इथल्या एका रद्दीवाल्याकडे या रहस्यकथा त्या वेळी आठ आण्याला एक याप्रमाणे मिळायच्या. मी आणि माझा मित्र किरण नाईक दोन-दोन रहस्यकथा घ्यायचो आणि सोसायटीतील एका कोप-यातलं कडुनिंबाचं झाड गाठायचो. त्याच्या फांदीवर बसून पुस्तक वाचताना आमच्यात कॅप्टन दीप, गरुड वा रातराणीचा संचार व्हायचा. पुस्तकांची अदलाबदली करून सर्व पुस्तकं संपली की दणादण झाडावरून खाली उडया मारून पुन्हा रद्दीवाल्याकडे. वाचनाचे चार आणे कापून घेऊन तो आणखी पुस्तकं द्यायचा. पुढे आम्ही नेहमी येतो म्हटल्यावर त्याने भाव वाढवला. एक रुपया केला. प्रचंड राग आला होता तेव्हा त्याचा. नाईकांनी पुस्तकात उभ्या केलेल्या नायकांप्रमाणे आम्हीही गॅलरीच्या कट्टयावर हात रोवून शरीर तोलून वर उचलायच्या कसरती केल्या होत्या, इतकी त्या लिखाणाची जादू होती.
माझ्यासारख्या असंख्य वाचकांवर असे गारूड करणा-या या लेखकाने झपाटल्यासारखं लिखाण केलं आणि त्याची शारीरिक, मानसिक किंमतही चुकवली. त्यांनीच एका मुलाखतीत म्हटलं होतं, ‘रहस्यकथांचं लिखाण वेगळ्या पद्धतीचं असतं. कायम विचार करावा लागतो. दिवसाचा आराम, रात्रीची झोप एका कथेसाठी ओवाळून टाकावी लागते. दैनंदिन आयुष्यावर याचा मोठा परिणाम घडतो.’ ते त्यांच्या बाबतीत खरंही आहे. याच लिखाणामुळे येणा-या मानसिक दबावामुळे मध्यंतरी काही काळ त्यांनी लिखाण एकदम थांबवलं होतं. रहस्यकथांचा, नाईकांच्या कथांचा चस्का कसा असतो, त्याचं एक उदाहरण सांगतो. त्यांच्या २०० रहस्यकथांचं २००४ साली पुनर्मुद्रण करण्यात आलं होतं. प्रत्येक पुस्तकाच्या ११०० प्रती काढण्यात आल्या आणि त्या हातोहात संपल्या. लेखकाच्या हातात मात्र प्रत्येक कथेचं मानधन म्हणून अवघे ५०० रुपये टेकवण्यात आले, असं त्यांनीच या मुलाखतीत म्हटलं आहे. मराठी साहित्यात रहस्यकथा वा तत्सम लिखाणाला तसंही फारसं मानाचं पान मिळत नाही. त्यामुळे धनंजय, काळा पहाड, झुंजार कथा लिहिणारे बाबूराव अर्नाळकर काय किंवा गुरुनाथ नाईक काय यांच्या विक्रमी लिखाणाची हवी तितकी दखल आजवर घेतली गेलेली नाही. पुणे विद्यापीठाने मराठी गूढ, भय आणि रहस्यकथा या विषयावर घेतलेल्या चर्चासत्रात त्यांना आवर्जून बोलावलं, मनोगत व्यक्त करायला सांगितलं आणि सत्कारही केला. तेवढाच काय तो अपवाद.
वाचनीय लिखाणाद्वारे, गुंगवून ठेवणा-या कथा-कादंब-यांमुळे गुरुनाथ नाईक आणि त्यांच्यासारख्या लेखकांनी वाचकांना कायमचं आपलेसं केलं आहे. त्यांच्या या ऋणातून अल्पसं उतराई होण्यासाठी केवळ नाईकच नव्हे तर दुर्लक्षित, विपन्नावस्थेत आयुष्याची पानं उलटणा-या इतरही लेखकांच्या मदतीसाठी काहीतरी करायला हवं, असं या क्षणी मनात फार दाटून आलं आहे.. आणि मी माझ्या परीने ते करणारही आहे!
(गुरुनाथ नाईक यांना मदत करण्यासाठी : गुरुनाथ विष्णू नाईक — खाते क्रमांक – ३११८०६६७७९३/स्टेट बँक ऑफ इंडिया, सेक्रेटरीएट शाखा, पणजी. ifsc कोड : SBIN000554MICR कोड : ४०३००२००६. अधिक माहितीसाठी संपर्क – ९४२२०४२०५४, ९४०९५२१७७१)
Ian also fan of Gurunath Naik. I want to read शिलेदार कथा, गोलंदाज कथा in book or ebook format.
Can I get all books in any format?
Ian also fan of Gurunath Naik. I want to read शिलेदार कथा, गोलंदाज कथा in book or ebook format.
Can I get all books in any format?