विविध क्षेत्रांत प्रभावी कामगिरी करणा-या जगभरातील शंभर महिलांमध्ये सिंधुदुर्गची सुकन्या गौरी चिंदरकर चमकली आहे.
सिंधुदुर्ग- विविध क्षेत्रांत प्रभावी कामगिरी करणा-या जगभरातील शंभर महिलांमध्ये सिंधुदुर्गची सुकन्या गौरी चिंदरकर चमकली आहे. ‘बीबीसी वर्ल्ड न्यूज’ वाहिनीने केलेल्या या यादीत पाच भारतीय महिलांची नावे असून त्यापैकी एक गौरी आहे. देवगड तालुक्यातील शिरगाव येथील गौरी सध्या सिंधुदुर्ग शिक्षण प्रसारक मंडळाच्या अभियांत्रिकी महाविद्यालयात बीई कॉम्प्युटरच्या तिस-या वर्षात शिकत आहे. या यादीतील सर्वात लहान वयाची महिला म्हणून गौरीचा सर्वत्र गौरव होत आहे. गौरीमुळे सिंधुदुर्गला प्रथमच हा सन्मान मिळाला आहे. जगात वेगवेगळ्या क्षेत्रात काम करणा-या महिलांना दरवर्षी बीबीसी वर्ल्ड मानाचे पान देते. ही यादी १९ नोव्हेंबर रोजी बीबीसीने जाहीर केली असून यातील प्रत्येक पाच महिलांच्या मुलाखती दर दिवशी प्रसिद्ध केल्या जात आहेत.
२० तारीख पासून सुरू झालेल्या या मुलाखतीत गौरीची मुलाखत बुधवारी प्रसारित झाली आणि जगभरातून तिच्यावर कौतुकाचा वर्षाव झाला. सिंधुदुर्गातील एका खेडय़ात राहणा-या या मुलीला विविध क्षेत्रांतून मान्यवरांचे शुभेच्छांचे संदेश येत आहेत. गौरी ही शिरगांवातील एका सामान्य कुटुंबातील मुलगी. वडिलांचे शिरगांवात इलेक्ट्रीकचे दुकान आहे.
गौरीचीच निवड कशासाठी?
गौरीने ‘क्लाऊड’ तंत्रज्ञानाचा आधार घेत अंमलात आणलेल्या शिक्षण प्रणालीचा गौरव म्हणून तिची निवड करण्यात आली आहे. २००९मध्ये शिरगांव हायस्कूलमध्ये न्यू कॅसल विद्यापीठ, इंग्लडच्या माध्यमातून ‘सोल’ हा प्रकल्प राबविण्यात आला. डॉ.सुगातो मित्रा यांच्या कल्पनेतून डॉ. सुनिता कुलकर्णी यांच्या सहकार्याने शिरगांव हायस्कूलच्या संस्था पदाधिका-यांच्या सहकार्याने हा प्रकल्प सुरू झाला. या प्रकल्पामध्ये विद्यार्थ्यांना स्वत:च्या अध्यापनात येणा-या समस्या सोडविण्यासाठी जगभरातील शिक्षक मार्गदशर्न करण्यास सज्ज होते. मात्र, विद्यार्थ्यांनी आपल्या समस्या ओळखून आपणच सोडवाव्यात अशी संकल्पना होती. या संकल्पनेला अनुसरून शिरगांव हायस्कूलमधील मुले जगभरातील शिक्षकांशी संवाद साधून आपल्या अडचणी दूर करत होते.
गौरीही याच हायस्कूलमध्येच शिकत होती. तिचे शिक्षण संपले तरी तिने आपली सवय सोडली नाही. या सवयीमुळे ती उच्च शिक्षणातही या सोलच्या युनीक क्लाऊडमध्ये कायम राहिली. आपल्या उच्च शिक्षणातही तिने याच क्लाऊड तंत्रज्ञानाचा आधार घेतला आहे. यामुळेच वेगळ्या पद्धतीने अध्ययन करणारी जगातली विद्यार्थीनी म्हणून तिची निवड झाली आहे.
प्रश्न पडायला हवेतच. आणि प्रश्नांची उत्तरे शोधल्याशिवाय स्वस्थ बसायचे नाही.ही सवय मला सोल प्रकल्पातून लागली. या प्रकल्पातील पहिल्या बॅचची मी विद्यार्थीनी असल्याचा मला अभिमान आहे. कोणत्याही प्रश्नांला उत्तर हे असतेच..क्लाउड तंत्रज्ञानात ते झटकन आणि योग्य तेच मिळते.बीबीसीने या तंत्राची दखल घेतली हे माझ्यासाठी महत्वाचे आणि सर्व गुरुवर्यांचेही आभार! – गौरी अजय चिंदरकर
‘आम्ही जेव्हा सकाळी ६.३० वाजता सोल प्रोजेक्ट सुरू करण्यासाठी जायचो त्यापूर्वीच शाळेत मुले दाखल झालेली असायची. सकाळी ६.३० वाजता ही मुले जगभरातील शिक्षकांशी संवाद साधायची. सायंकाळी ७.३० वाजता हा प्रोजेक्ट बंद व्हायचा. शिरगावसारख्या खेडय़ातील अनेक मुले या प्रकल्पासाठी सकाळीच दाखल असायची. गौरी सकाळीच शाळेत ६ किलोमीटर अंतर पार करून चालत येत होती. तिने घेतलेले परिश्रम आणि भविष्यातील शिक्षणासाठी तिने ठेवलेली सवय आता कामी आली. या प्रकल्पाचे प्रयत्न आणि उद्देश सफल झाला. गौरीच्या यशदायी कारकिर्दीने प्रकल्पाचे दूरगामी परिणाम दिसून येऊ लागले आहेत. याचा आनंद आहे. – शमसुद्दीन अत्तार,‘सोल’ प्रकल्पाचे प्रशिक्षक
शाब्बास gaori chinderkar.!!!
Good Gauri, मराठी पाउल पडते पुढे