कणकवली एसटी बसस्थानकावर चेंगराचेंगरी होते. प्रवाशांना एसटी बसमध्ये प्रवास करताना गर्दीमुळे त्रास होतो.
कणकवली – कणकवली एसटी बसस्थानकावर चेंगराचेंगरी होते. प्रवाशांना एसटी बसमध्ये प्रवास करताना गर्दीमुळे त्रास होतो. आदी एसटीच्या अनेक गोष्टी कणकवली मतदारसंघाचे आमदार म्हणून नितेश राणे यांच्यापर्यंत पोहोचल्या.
आज काँग्रेसच्या मध्यवर्ती कार्यालयात बसलेल्या आमदार नितेश राणे यांनी थेट कणकवली बसस्थानक गाठले. कणकवली फोंडाघाट कुर्ली गाडी बसस्थानकावर लागली होती. आमदार राणे यांनी त्या फोंडाघाटकडे जाणा-या एसटीमध्ये प्रवास करण्याचा निर्णय घेतला. आमदार राणे फोंडाघाटकडे जाणा-या एसटीत बसले आणि एसटी स्थानकावरील तसेच एसटीतील प्रवाशांनाही आश्चर्य वाटले.
आमदार नितेश राणे यांनी कणकवली-फोंडाघाट या एसटी प्रवासात प्रवाशांच्या अडचणी जाणून घेतल्या. तत्पूर्वी कणकवली एसटी बसस्थानकावरही प्रवाशांशी थेट संवाद साधून प्रवासात किंवा एसटी बसस्थानकावर लागताना कशी धावपळ होते याची माहिती बसस्थानकावरील प्रवाशांकडून जाणून घेतली.
कणकवली-फोंडाघाट एसटी बस प्रवासात कॉलेज युवक-युवती व बसमधील शेतकरी प्रवाशांची त्यांनी विचारपूस केली. आपणाला एसटी प्रवासात नितेश राणे यांच्याशी थेट संवाद साधता येतोय. याचा आनंद प्रवाशांच्या चेह-यावर दिसत होता.
या गाडीतील काही प्रवाशांनी पत्रकारांना सांगितले की, एसटीचा प्रवास आम्ही कसा करतो हे आमच्या लोकप्रतिनिधींनी स्वत: अनुभवावे ही बाब आमच्यासाठी खूपच आनंददायी आहे. या एसटी बसमधील महिला प्रवासी वर्षा पाटील म्हणाल्या, आ. नितेश राणे आमचे सहप्रवासी आहेत यावर आमचा विश्वासच बसत नाही.
आमदार राणे यांच्या शेजारी बसून प्रवास करणारे मनोहर मुंडये यांनी त्यांच्याशी संवाद साधला आणि प्रवासात येणा-या अनेक अडचणी त्यांना सांगितल्या. ‘बरा झाला आमच्या आमदारान आमच्याबरोबर प्रवास केलो. त्यामुळे एसटी प्रवाशांच्या समस्या त्यांका समजान इल्या.’
फोंडाघाट एसटी बसस्थानकात उतरल्यावर तिथेही त्यांनी अनेक प्रवाशांच्या भेटी घेतल्या. फोंडाघाट एसटी बसस्टँड अधिका-यांकडून समस्या जाणून घेतल्या आणि त्यांच्या समस्या सोडविल्या जातील असे आश्वासन राणे यांनी दिले.
सायबान माका घर दिल्यान!
आमदार नितेश राणे फोंडाघाट बसस्थानकावर उतरताच जयश्री गणपत पाताडे ही महिला धावतच आमदार राणे यांच्याजवळ आली अन् आनंदाने, मायेने नितेशजींच्या डोक्यावरून हात फिरवत ती म्हणाली, या सायबान माका घर दिल्यानं, त्यामुळा मी आणि आमचे घरवाले(पती) त्या घरात राहतो. आमच्यावर खूप मोठे उपकार केल्यानं. अरे बाबा तू खूप मोठो होतलंस, असे आशीर्वाद त्या महिलेने दिले. फोंडाघाट बसस्थानकावर घडलेल्या या प्रसंगाने आमदार नितेश राणे यांच्यातील सहृदयी माणूसही दिसला. तेव्हा सारेच उपस्थित भावुक झाले.
बीएसएनएल सेवेचा प्रश्न सोडविणार
सिंधुदुर्ग जिल्हय़ातील बीएसएनएल कंपनीच्या अनियमित सेवेबाबत व ग्राहकांना येणा-या अनेक समस्यांबाबत रत्नागिरी येथील बीएसएनएलच्या वरिष्ठ अधिका-यांशी लेखी पत्रव्यवहार करून जिल्हय़ासाठी डीजीएम हे महत्त्वाचे अधिकारीपद भरण्यासंबंधी चर्चा करण्यात आली आहे. हे पद भरल्यास सिंधुदुर्ग जिल्हय़ाचा बीएसएनएल सेवेचा प्रश्न कायमस्वरूपी सुटणार आहे. येत्या काही महिन्यात हा प्रश्न मार्गी लागेल, असे राणे म्हणाले.
मोकाट जनावरांचा प्रश्न लवकरच मार्गी
कणकवली शहरातील मोकाट जनावरांचा प्रश्न मार्गी लावण्यासाठी आमदार या नात्याने नगरपंचायतीमार्फत स्वत: लक्ष घालून हा प्रश्न सोडविणार आहे, असे राणे यांनी सांगितले.
कणकवली, देवगड रुग्णालयातील समस्या
कणकवली उपजिल्हा रुग्णालय व ग्रामीण रुग्णालय देवगड या दोन्ही रुग्णालयांतील सर्व समस्या मी स्वत: भेट देऊन जाणून घेतल्या आहेत. येत्या काळात दोन्ही रुग्णालयातील सेवासुविधा, नोकरभरतीबाबत शासनस्तरावरून प्रश्न सोडवण्यात येणार आहेत. याचे परिणाम येत्या काळात दिसतील, असे राणे यांनी सांगितले.
कुर्ली-घोणसरी धरण कालव्यांचे काम
कुर्ली-घोणसरी धरणाच्या कालव्यांचा प्रलंबित प्रश्नाबाबत पत्रकारांनी छेडले असता, अधिवेशन संपल्यानंतर याबाबत संबंधित खात्याच्या अधिका-यांशी चर्चा करून तसेच त्यासंबंधी माहिती जाणून घेऊन कालव्याचे काम सुरू करण्यासाठी प्रयत्न करण्यात येतील, असे आमदार नितेश राणे म्हणाले. तसेच जिल्हा काँग्रेसच्या नवीन कार्यकारिणीची निवड येत्या काही दिवसात करण्यात येणार आहे. तसेच निवडणुकीत केलेल्या कामांची पाहणी करण्यात येणार आहे. पक्षवाढीसाठी पक्षाला दिलेले योगदान या सर्व गोष्टींचे परीक्षण सुरू आहे. चाचपणी पूर्ण झाल्यानंतर जिल्हा कार्यकारिणीची निवड करण्यात येणार आहे, असे राणे पुढे म्हणाले.
‘बापसे बेटा सवाई’ व्हावा एवढीच इच्छा…