इंटिरिअर डेकोरेशन करताना सगळ्यात महत्त्वाचा भाग असतो तो म्हणजे स्वयंपाकघर. कारण सगळ्यात जास्त पसारा तिथेच असतो आणि हा सगळा पसारा बाहेर राहणार नाही अशा प्रकारचा ओटा आणि उपलब्ध जागा यानुसार ओटय़ाचे प्रकार पडतात. जेणेकरून त्यात हे सगळं सामान सामावून घेतलं जातं. उपलब्ध जागेनुसार ओटय़ांचे कितीतरी प्रकार होऊ शकतात हे जाणून घेऊ या.
स्वयंपाक‘घरा’त असतात वेगवेगळी भांडी, फ्रीज, ओव्हन, अ‍ॅक्वागार्ड, फूड प्रोसेसरसारखी उपकरणं, मसाले, डाळी, तेल, चहा, साखर, तांदळाचे डबे.. ही यादी मारुतीच्या शेपटीप्रमाणे न संपणारीच आहे. पण स्वयंपाकघर हे सगळं सामान सामावून घेतं. आपण त्याची मांडणी कशाप्रकारे करतो हे महत्त्वाचं असतं. कित्येकांच्या स्वयंपाकघरात गॅसची शेगडी सोडली तर एक वस्तू बाहेर दिसत नाही. सगळ्या वस्तू कशा आत कपाटात आणि जागच्या जागी जातात. म्हणूनच इंटिरिअरमध्ये किचनच्या नियोजनला अधिक महत्त्व प्राप्त झालं आहे. म्हणूनच स्वयंपाकघराचं डिझाईन करणं हे चॅलेंजचं काम आहे. कारण आपल्या गरजेच्या गोष्टी तर करणं आवश्यक असतंच त्याप्रमाणे या सोयीसुविधा तर कराव्याच लागतात. मात्र हे करताना स्वयंपाकघर कसं सुटसुटीत, आटोपशीर, नीटनेटकं आणि सुंदर दिसेल याकडेही लक्ष पुरवणं आवश्यक असतं. कारण स्वयंपाकघर सुटसुटीत आणि नेटकं असेल तरच त्या स्वयंपाकघरात काम करण्याचा आनंद मिळतो. म्हणूनच इंटिरिअर करताना या सगळ्या गोष्टींचं नियोजन करणं महत्त्वाचं असतं.
उपलब्ध जागा आणि काम करण्याची सहजता याचा विचार करून तुम्ही स्वयंपाकघरात प्रामुख्याने सिंगल लाईन ओटा, पॅरलल किंवा समांतर ओटा, एल आकाराचा किंवा सी आकाराचा ओटा तयार करू शकतात. अशा या प्रकारांची आपण थोडक्यात माहिती घेऊ या.
सरळ रेषेतला किंवा सिंगल लाईन
नावावरूनच तुमच्या लक्षात आलं असेलच की सिंगल लाईन म्हणजे आपल्या घरात सर्वसाधारणपणे तयार केला जाणारा ओटा. हा प्रत्येकाच्या घरात आपल्याला पाहायला मिळतो. साधारणपणे फ्रीजची जागा सोडून हा ओटा बांधला जातो. फ्रीजच्या बाजूने प्रथम सिंकची सुरुवात होते. आणि पुढे संपूर्ण ओटा असतो. हा ओटा एखाद्या कोप-यातल्या भिंतीलगत किंवा उजेडाच्या दृष्टीने खिडकीजवळ बांधला जातो. त्याखाली ट्रॉलीज केल्या की बरचसं सामान त्याखाली मावतं. आणखी सामान ठेवायचं असेल तर ओटय़ाच्या वरच्या बाजूला भिंतीवर तुम्ही कॅबिनेट करू शकतात.
पॅरालल किंवा समांतर ओटा
अशा प्रकारचा ओटा प्रामुख्याने परदेशातल्या स्वयंपाकघरात बघायला मिळत असला तरी आता छोटय़ाशा जागेतही भरपूर सामान राहत असल्याने आपल्याकडेही हा प्रकार पाहायला मिळतोय. यात समोरासमोर दोन ओटे असतात. काही जण एका बाजूच्या ओटय़ावरच गॅसची शेगडी आणि सिंक लावतात तर काही जण वेगवेगळ्या ओटय़ांवर गॅसची शेगडी आणि सिंक लावतात. ज्या बाजूच्या ओटय़ावर गॅसची शेगडी असेल त्या ओटय़ाचा आसपासचा भाग भाज्या चिरणे, किंवा झालेलं जेवण झाकून ठेवायला जागा मिळते. तर दुस-या समोरच्या ओटय़ावर ज्या बाजूला सिंक लावलेलं असतं तो भाग धुतलेली भांडी उपडी घालून ठेवायला सोयीस्कर पडतं. त्यामुळे पाणीही उडत नाही. काम करायला मोकळेपणा वाटतो. आणि या दोन्ही ओटय़ांच्या खाली ट्रॉलीज केल्या की भरपूर सामान राहातं. त्यामुळे वरच्या बाजूला कॅबिनेट करायची गरज भासत नाही आणि पसारा दिसत नसल्यामुळे स्वयंपाकघर सुटसुटीत आणि आवरलेलं दिसतं. ज्या ठिकाणी दिवाणखाना आणि स्वयंपाकघर एकच असतं त्या ठिकाणीही हा समांतर ओटा करू शकतो. म्हणजे त्यामुळे स्वयंपाकघर आणि दिवाणखाना विभागला जातो. तसंच तयार झालेल्या वस्तू त्यावर ठेवणं सोयीस्कर होतं.
एल आकार
आजकाल इंटिरिअर करायचं म्हटलं की गृहिणींची पहिली पसंती मिळते ती एल आकारातल्या ओटय़ाला. जागा लहान असो वा मोठी हा एल आकाराचा ओटा अगदी सहज करता येतो. खिडकी जवळ किंवा ज्यांचं किचन बाल्कनीत असतं अगदी तेदेखील हा एल आकारातला ओटा करू शकतात. ओटय़ाच्या एका कोप-यात शक्यतो लहान बाजू असलेल्या कोप-यात गॅसची शेगडी तर दुस-या कोप-यावर सिंक अशी साधारण यात रचना केली जाते. आपल्या गरजेनुसार आपण यात बदल करू शकतो. या एल आकाराच्या ओटय़ाखाली ट्रॉलीज केल्या की किचन आटोपशीर दिसतं. एका कोप-यावर हे किचन होत असल्यामुळे ते अधिक आटोपशीर दिसतं. ज्या ठिकाणी एल ओटा संपतो त्या ठिकाणी काही जण कपाटदेखील करतात. म्हणजे त्यात मिक्सर किंवा क्रोकरीचं सामान आरामात मावतं.
सी आकाराचा ओटा
हा ओटा प्रामुख्याने मोठय़ा स्वयंपाकघरात केला जातो. स्वयंपाकघरात प्रवेश करतो ती भिंत सोडली तर उरलेल्या तीन भिंती ज्या ठिकाणी जोडल्या जातात त्यांच्या कोप-यात हा ओटा केला जातो. तीन भिंतीलगत हा ओटा केला जात असल्यामुळे त्याला सी शेप ओटा म्हणतात. साधारणपणे मधल्या ओटय़ावर खिडकी येते. आणि एका बाजूला गॅसची शेगडी तर दुस-या बाजूला सिंकची व्यवस्था केली जाते. गॅसला हवा लागू नये असा त्यामागचा उद्देश असावा. काही जण आपल्या सोयीनुसारही ही रचना करतात. म्हणजे प्रत्येक वेळी तुम्हाला कोप-यातच गॅस शेगडी दिसेल असं नाही. तर कित्येकदा ती मधल्या भागावरदेखील ठेवली जाते. उरलेल्या मोकळ्या जागेचा वापर अन्नपदार्थ ठेवायला होतो. वावरायला सुटसुटीतपणा असल्याने समानांची गर्दी होत नाही. या ओटय़ाखाली ट्रॉलीज केल्या तर या प्रकारचं स्वयंपाकघर अधिकच सुटसुटीत दिसतं. त्यात भरपूर सामान मावतं. मुख्य म्हणजे भिंतीवर कॅबिनेट करायची गरजही भासत नाही. भरपूर कॅबिनेट होत असल्यामुळे ट्रॉलीजमध्ये भरपूर सामान मावतं.
Please provide new l shape design