चार दिवसांवर ख्रिसमस येऊन ठेपला आहे. ख्रिसमस म्हणजे ख्रिस्ती बांधवांसाठी दिवाळीच जणू! आपल्या दिवाळीसारखीच त्यांचीदेखील जय्यत तयारी सुरू असते. घराई साफसफाई, घराची सजावट अशा सगळ्याच गोष्टी सुरू असतात. कंदील, माळा आणि झिरमिळ्यांबरोबरच ख्रिसमस ट्री, सांताक्लॉज, डान्सिंग बॉल्स, स्नो मॅन, बेल्स, रेड रिबिन्सने घर सजतं. तर अशा या ख्रिसमसच्या स्वागतासाठी घर सज्ज करण्यासाठी खास टिप्स.
परदेशाइतकं नसलं तरीही आपल्याकडे थोडयाफार प्रमाणात का होईना पण ख्रिसमस साजरा केला जातोच. मॉल्स, दुकानं तर अक्षरश: ख्रि्रसमसच्या सजावटीने लखलखत असतात. ख्रिस्ती बांधवांच्या घरी तर लगबग सुरू असते. ख्रिसमस ट्री, सांताक्लॉज, डान्सिंग बॉल्स, स्नो मॅन, बेल्स, रेड रिबिन्स आदी गोष्टींनी घर सजलं असेल. या गोष्टी तर आपण दरवर्षी करतोच. पण त्याचबरोबर आपल्या घराला आणखी कशा प्रकारे सजवता येईल यासाठी काही टिप्स जाणून घेऊ या.
पुष्पगुच्छ
वर्तुळाकार आकारात असलेला पुष्पगुच्छ ख्रिसमसच्या निमित्ताने घरोघरी लावलाच जातो. कागदाच्या फुलांनी किंवा बाजारात मिळणारी प्लास्टिक किंवा ख-या फुलांनी केलेला हा पुष्पगुच्छ खिडकीवर, दरवाजावर किंवा गॅलरीत शोभून दिसेल. घरी करायला वेळ नसेल तर बाजारातही हे पुष्षगुच्छ मिळतात. त्यांना खरं म्हणजे व्रेथ असं म्हणतात.
वेगवेगळ्या आकाराचे हे गोल आणून ते एकमेकांच्या वर लावा आणि त्यावर बेल्स किंवा रिबीन लावून दरवाजा किंवा खिडकीत लावा. नेहमीपेक्षा काहीतरी वेगळं दिसेल. तसंच तुम्ही हे मेणबत्त्यांभोवतीदेखील ठेवू शकतात. केवळ जिलेटीन पेपरचे करून त्यात दिव्यांची माळा लावूनही तुम्ही छान भिंतीवर लावू शकतात.
मेणबत्त्यांचा वास
एका कॅनला भरपूर मेणबत्त्या लावून सजवा. या मेणबत्त्यांमध्ये केवळ पांढ-याच नाही तर रंगीत मेणबत्त्याही आल्या आहेत. त्याचा वापर करून तुम्ही छान वास किंवा फ्लॉवरपॉट करू शकतात. या मेणबत्त्या एकमेकांना गोंदाच्या साहाय्याने चिकटवून घ्या. त्याला छानशी रेड रिबिन बांधा आणि त्यात फुलं ठेवून तो डायनिंग टेबल किंवा खिडकीच्या कोप-यात ठेवा.
डायनिंग टेबल आणि सांताच्या खुर्च्या
आपण नेहमीच डायनिंग टेबलवर टेबलक्लॉश घातलेला असतो. पण या वेळी या खास सणानिमित्त डायनिंग टेबलासोबत खुर्च्यानाही कापडाचं कव्हर करा. आणि त्यांच्या भोवती तुम्हाला आवडीच्या रंगाचा बो करून लावा. पाहा बरं तो डायनिंग कोपरा काही वेगळाच दिसतो. खुर्च्या नुसत्याच कव्हर करायच्या नसतील तर तुम्ही केवळ सांताक्लॉजच्या टोप्यांच्या आकाराच्या खुर्च्याच्या पाठीला कव्हर करून ठेवू शकतात. यामुळे या खुर्च्याना छान लूक येईल. डायनिंग टेबलच्या मधोमध ख्रिसमस ट्री ठेवल्यास ते छान दिसतं.
ख्रिसमस बॉल्स
तुम्हाला हव्या त्या अ‍ॅक्रेलिक रंगात बल्स पेंट करून त्यावर ग्लिटरने स्प्रे करा. आणि ते बल्ब कुठेही टांगा. किंवा त्यावर छान शुभेच्छा देणारे संदेश लावा. या ब्लबचे तुम्ही सांताक्लॉजदेखील करू शकता. पांढरा रंग देऊन त्यावर पेन्सिलने सांताचं चित्रं काढून घ्या आणि मग रंगवा.
कापसाचा वापर करून त्याला दाढी लावा आणि घोटीव पेपराची टोपी करा. हे सांता तुम्ही टांगू शकतात किंवा कुठेही ठेवू शकतात. किंवा या बॉल्सना नुसतंच रंगवून एका परडीत किंवा छान आकराच्या भांडयामध्ये ठेवून कॉर्नर पीस म्हणूनही ठेवू शकतात.
ख्रिसमस कॅरल्स
तुम्हाला आवडणा-या ख्रिसमस कॅरलमधलं एखादं वाक्य पेंट करून ते वॉलवर लावा. किंवा दरवाजावर लावा. उदाहरणच द्यायचं झालं तर ‘जॉय टू द वर्ल्ड..’, ‘फा ला ला ला’ अशी गाणी छान रंगांमध्ये डिस्प्ले करून लावावीत.
हँगिंग मोजे
ख्रिसमसला सांताक्लॉज मोजांमध्ये गिफ्ट देतो असं म्हणतात. एक किंवा अनेक मोजे छान डेकोरेट करून ते जिन्यामध्ये किंवा खिडकी-दरवाजात लावा. पण नुसता मोजा लावण्यापेक्षा तो दिसेल अशा पद्धतीने डेकोरेट करा. म्हणजे पटकन तिकडे लक्ष जाईल. त्यासाठी त्यावर लाईटिंग करा. किंवा बेल्स किंवा पानं लावा. या फुलं आणि पानांच्या मध्ये डेकोरेटिव्ह बॉल्स आणि दिव्यांचा वापर करून संपूर्ण घर छान उजळून टाका. तुमच्या मुलांच्या उशाशी ठेवायला एकच छानसा मोजा सजवून त्यात गिफ्ट घालून ठेवा.
स्नो मॅन
वर म्हटल्याप्रमाणे बॉल किंवा प्लास्टिकच्या जारचादेखील तुम्ही स्नो मॅन करू शकता. काळा, पांढरा आणि केशरी रंग आणि रेड रिबिनचा वापर करून तुम्ही स्नो मॅन करू शकता. एक मोठा आणि एक लहान असे दोन बॉल एकमेकांवर ठेवून त्यांना पांढरा रंग द्या किंवा कापूस चिकटवा. रेड रिबिनच्या साहाय्याने तुम्ही हा स्नो मॅन उभारू शकतात. त्यांना एका कोप-यात बसवा आणि तो कोपरा कापसाने भरून टाका. वाटल्यास तिथे एक ट्रीदेखील लावा.
पिलोज सजवा
आजकाल बाजारात छान छान रिबिन्स आणि त्यावर लावण्यात येणारा बो मिळतो. त्याचा वापर करा आणि तुमची उशी किंवा पिलो सजवा. रिबिन त्या उशीभोवती गुंडाळा. मधोमध बो लावा. हा बो तुम्ही सॅटिन रिबिनचादेखील करू शकतात.
झाडांची वेल
जिने, खिडक्या, दरवाजे, घरातले खांब, गॅलरी अशा विविध ठिकाणी तुम्ही वेल लावावी. त्यात अधून मधून दिव्यांची माळ सोडली की त्याचा लूकच वेगळा येतो.
कार्ड डेकोरेशन
या ख्रिसमसच्या निमित्ताने अनेक जण ग्रीटिंग्ज पाठवत असतात. तुम्ही तुम्हाला आतापर्यंत आलेली ग्रीटिंग्ज किंवा तुमच्या मुलांनी केलेली ग्रीटिंग्ज जपून ठेवली असतील तर ती तुम्ही भिंतीवर डिस्प्ले करू ठेवा. त्याच्या आजूबाजूने लायटिंग करा. ग्रीटिंग्ज कार्ड करायचे नसेल तर ख्रिसमसच्या शुभेच्छा देणारं तोरण करून लावा आणि त्याच्या आजूबाजूला रेनडिअर, स्नो मॅन, ट्री किंवा सांताक्लॉज ठेवा.
नट्स जार
काचेचा आठ ते बारा इंचांचा एक मोठा जार घ्या. त्यात जाड खांबासारख्या मेणबत्तीला ठेवा. त्यासाठी लागणारा काचेचा होल्डर त्या जारच्या मधोमध ठेवा. आणि तुमच्या आवडीच्या फळांनी आणि नट्सनी तो जार भरून टाका. आणि हा जार पाहुणे मंडळी ज्या ठिकाणी बसतील अशा ठिकाणी म्हणजे सोफ्याच्या बाजूला किंवा टेबलावर ठेवावा.
ख्रिसमस ट्री
ख्रिसमस ट्री ही तसं पाहायला गेलं तर नेहमीचीच गोष्ट आहे. ठिकठिकाणी दुकानांत आणि घरात ख्रिसमसची ही झाडं उभारली जातात. ही झाडं उभारून ती सजवा. त्याला दिव्यांच्या माळा किंवा छोटी छोटी गिफ्ट्स, सांताक्लॉज आणि कापसाच्या साहाय्याने सजवा. बाजारात फोल्डिंगचीदेखील झाडं असतात. ती अगदी सहज उपलब्ध होतात.
सजवलेली ही झाडं घराला शोभा आणतात. लहान -मोठया हव्या त्या आकारातल्या ख्रिसमस ट्रीचा वापर करून तुम्ही तुमचं घर सजवू शकतात. त्यासाठी सोनेरी किंवा चंदेरी रंगांचाही वापर करू शकतात. ही झाडं अतिशय छान दिसतात. याशिवाय तुम्ही बॉल्सचा वापर करूनही ख्रिसमस ट्री उभारू शकतात.
गिफ्टस् बॉक्स
ख्रिसमसच्या निमित्ताने ख्रिस्ती बांधव एकमेकांना शुभेच्छा देतात आणि लहान मुलांना गिफ्ट्स देतात. म्हणूनच तुम्ही जर तुमच्या लहान मुलांना गिफ्ट्स घेतली असतील तर ती छान सजवून एका कोप-यात ठेवून द्या.
छान आर्टिकल,! ख्रिसमस च्या शुभेच्छा !