महिला बचतगटांच्या माध्यमातून विविध राजकीय पक्षांनी मतदारांपर्यंत पोहोचण्यासाठी प्रयत्न चालवले आहेत.
ठाणे – महिला बचतगटांच्या माध्यमातून विविध राजकीय पक्षांनी मतदारांपर्यंत पोहोचण्यासाठी प्रयत्न चालवले आहेत. ठाणे जिल्ह्यातील शहरी व ग्रामीण भागात सुमारे बारा हजारांच्या जवळपास महिला बचतगट कार्यरत असून, त्यांना गळ घालण्यासाठी मोर्चेबांधणी सुरू झाली आहे.
प्रचार, प्रसार व सभांवर खास भर देण्यात आला असून जिल्ह्यात ७० लाख मतदारांपैकी सुमारे ३५ लाख महिला मतदारांची संख्या आहे. या मतदारांना आपल्याकडे आकर्षित करण्यासाठी महिला बचतगटांमार्फत प्रयत्न चालवले जात आहेत.
जिल्ह्यातील विविध बचतगटांमार्फत विविध शासकीय, निमशासकीय कार्यक्रम राबवले जात असून, बचतगटांचा जनसंपर्कही मोठा असल्याने राजकीय पक्षांनी बचतगट सदस्यांमार्फत नाना आमिषे दाखवून छुपा प्रचार सुरू केला आहे. पत्रके वाटणे, रॅली, मेळाव्यात उपस्थिती दाखवणे तसेच खानावळी आदी कामे बचतगटांमार्फत कामे करून घेतली जात आहेत.
या बचतगटांमार्फत जिल्ह्यातील ग्रामीण भागात अंगणवाडय़ांना पोषण आहाराचा पुरवठा करण्यात येतो. या अंगणवाडी केंद्रातील सेविकांना ही निवडणूक लाभदायी ठरत आहे. मागील लोकसभा निवडणुकीत एका उमेदवाराने महिला बचतगटांना खूश करण्यासाठी शिलाई मशिनचे वाटप केले होते. त्यामुळे यावेळी बचतगटांनी दानशूर उमेदवाराचा प्रचार करण्याचे निश्चित केले आहे.
या महिला बचतगटांनी सहकार्य केल्यास उमेदवाराचा विजय निश्चित मानला जात आहे. त्यामुळे सर्वपक्षीय उमेदवारांनी जास्तीत जास्त महिला बचतगटांशी संपर्क साधण्याचे प्रयत्न सुरू केले आहेत. महिला कार्यकर्त्यांच्या माध्यमातून महिला बचतगटांना काही रक्कम देऊन आपल्याकडे खेचण्यासाठी प्रयत्न केले जात आहे.