आज दिवाळी.. अगदी आवडीने तुम्ही फराळ खाल्ला असेल. पहिल्या दिवशी जितका फराळ खाल्ला जातो तितका इतर दिवशी खाल्ला जात नाही. फराळावर ताव मारल्यानंतर मित्रमैत्रिणींना-नातेवाईकांना दिवाळीच्या शुभेच्छा देण्यासाठी जात असाल. हे सगळं केलं तरीही दिवसभर बराच वेळ असतो. मग हा वेळ घालवण्यासाठी तरुणाई शिकते, नोकरी करते किंवा सामाजिक उपक्रमात सहभागी होऊनही दिवाळीचा आनंद लुटते.
हूश्श.. परीक्षा संपल्या आणि एकदाची सुट्टी लागली. परीक्षेच्या ताणानंतर सुट्टी मिळाली की काय मजाच. त्यात दिवाळीची सुट्टी म्हटलं तर डबल मजा. दिवाळी म्हणजे सगळीकडे उत्साह, आनंद, चैतन्य. सगळी मरगळ झटकून दिवाळीची कामं करण्यात एक वेगळाचं उत्साह असतो. आकाश कंदील आणि दिव्याच्या रोषणाईमुळे सगळं काही तेजोमय झालेलं असतं. त्यात सुट्टी असल्यामुळे या मजेत आणि आनंदात भरच पडते. एरवी सुट्टी असली की आपण आरामशीर उठतो, पण दिवाळीत लवकरच उठावं लागतं. मग सकाळी उठून आई-वडिलांना मदत करणं, पहाटेचं फटाके लावणं किंवा आंघोळ-देवपूजा करून फराळाचा मनसोक्त आस्वाद घेणं हीच कामे तरुणाईला असतात. त्यानंतर आपल्या नातेवाईकांना, मित्रमंडळींना अगदी साध्या आणि सोप्या पद्धतीने तसंच जलद गतीने व्हॉटसअॅपवरून शुभेच्छा पाठवण्याचं काम तरुणाई करते. मोबाईलच्या या नवीन तंत्रज्ञानाचा फायदा तरुणाई पुरेपूर उठवताना दिसते.
व्हॉटसअॅपवर सगळ्यांना दिवाळीच्या शुभेच्छा दिल्यानंतर स्वत:चा एक सेल्फी काढून किंवा एखाद्याला फोटो काढायला सांगून तो फोटो लगेच डिपी म्हणून ठेवला जातो. अशी काहीशी धम्माल सणासुदीला असते. त्यातील निवडक जणांनाच फोन करून शुभेच्छा दिल्या जातात. ज्यांच्याकडे अॅन्ड्राइड फोन नाही त्यांना मेसेज करावा लागतो, पण दिवाळीत एका मेसेजचा एक रुपया असल्यामुळे फोन करण्याला जास्त पसंती दिली जाते. पहिला दिवस सोडला तर इतर दिवशी तसं फारसं काम नसतं. अशावेळी तरुणाई एखादा कमी दिवसांचा म्हणजेच झटपट शिकता येईल असा कोर्स करते. काहीजण समाजकार्यात वेळ घालवतात तर काही जण कट्टयावर बसून गप्पा मारत बसतात. बहुतांश मुली सुट्टीत ब्युटीपार्लरचा कोर्सकरतात किंवा वॉल पेटिंग, ग्लास पेटिंग, फ्लावर मेकिंग यांसारखे छोटे कोर्स शिकतात आणि आपला छंद जोपसण्याचा प्रयत्न करतात. काही जण तर घरी बसून टीव्ही पाहण्याला जास्त पसंती देतात.
इंटर्नशिपचा पर्याय बेस्ट !
दिवाळीच्या आधी एक दिवस परीक्षा संपल्या. त्यामुळे दिवाळीचे पाच एक दिवस मज्जेत घालवल्यानंतर करायचं काय असा प्रश्न दरवर्षीचा आहे. गेले चार पाच वर्ष दिवाळीची दहा पंधरा दिवसाची सुट्टी एन्जॉय करण्यात पिकनीक, मुव्ही इथे तिथे भटकण्यात आम्ही घालवली त्यामुळे या वर्षी आपण दरवेळीपेक्षा काहीतरी वेगळं करायचं ठरवलं. आमच्या संपूर्ण इंजिनीअरच्या ग्रुपनं ठरवलं की या वर्षी दिवाळीच्या सुट्टया एन्जॉय करण्यापेक्षा किंवा त्या घरी बसून वाया घालवण्यापेक्षा या पंधरा दिवसात इंटर्नशिप करायची. त्या दृष्टीनं आम्ही प्रयत्न पण सुरू केले. ग्रुपमधल्या सगळ्यांनाच इंटर्नशिप करायला मिळेल की नाही हे सांगता येत नाही. पण इतर जे मित्रमैत्रिणी काही अडचणीमुळे इंटर्नशिप करू शकत नाही, त्या आमच्या मित्रमैत्रींणी आम्ही या काळात कोणत्या नवीन गोष्टी शिकलो, वर्कशॉपमधल्या कामाची पद्धती काय होत्या ते त्यांना नंतर शिकवायचं असंही कबुल केलं. – चित्रा नाईक
गरिबांबरोबर साजरी करतो दिवाळी !
माझं कुटुंब मोठं असल्यामुळे दिवाळीची सुट्टी कशी जाते हे कळतंच नाही. आमच्याकडे दोन आठवडयाआधीच दिवाळीची लगबग सुरू होते. महिला वर्ग एकत्र फराळ करतात आणि पुरुष इतर कामं करतात. आम्ही त्यांना मदत करतो. दिवाळी आल्यानंतर आमची माळी, वाडी दिव्यांनी आणि तोरणांनी सजलेली असते. एकमेकांकडे जाऊन मजा करणं हा एकमेव उद्योग असतो. घरातले मोठे दिवाळी म्हणून जे पैसे देतात आणि आमच्याकडची जी पॉकेटमनी असते, ते सगळे पैसे मी आणि माझी भावंड जमा करतो. त्यानंतर या पैशांनी आम्ही दिवे आणि मिठाई घेऊन गरिबांच्या झोपडीत जाऊन त्यांना ती मिठाई देऊन त्यांच्या दारात किमान दोन दिवे लावतो. त्यांच्या चेह-यावरचा तो आनंद बघून आम्हालाही बरं वाटतं. एरवी उनाडक्या करत फिरणारे आम्ही एकदिवस एखाद्याच्या चेह-यावर हास्य आणण्याचा प्रयत्न करतो.- दर्शन माळी
आईला मदत करणार!
दिवाळीची सुट्टी ही परीक्षा संपल्या संपल्या असल्यामुळे दिवाळीचा आनंद द्विगुणित झालेला असतो. आम्ही सगळे फ्रेण्डस भेटतो. सगळ्याकडे फराळाला जाणं असाच नेहमीचा ठरलेला बेत असतो. पण यावेळी मी माझ्या आईला मदत करणार आहे असं मी ठरवलं आहे. आई सतत काम करत असते. मी कॉलेजमध्ये असल्यामुळे मला तिला मदत करता येत नाही. म्हणून यावेळी मी ठरवलं आहे तिला जमेल तितकी मदत करायची. दिवाळी पूर्वी घरची साफसफाई आणि फराळ करण्यात आईचा वेळ जातो, त्यात ती खूप थकते. त्यानंतर दिवाळी सुरू झाली की येणाऱ्या पाहूण्यांची उठाबस करावी लागते. त्यामुळे तिला दिवाळी साजरीच करता येत नाही. म्हणून मी तिला मदत करणार आहे.- रिचा परमार
बहिणीकडून ब्युटीपार्लरचं प्रशिक्षण !
आईला मदत करून, घरातली इतर कामं झाली की मी बहिणीकडून ब्युटीपार्लरचं प्रशिक्षण घेते. माझ्या बहिणीने ब्युटीपार्लरचा रितसर कोर्स केला आहे. मेहंदी काढणं, केस कापणं अशा गोष्टी तिच्याकडून शिकते आणि तिला तिच्या कामातसुद्धा मदत करते. जेणेकरून नकळत माझा सरावही होतो आणि तिला मदतसुद्धा होते. पैसे देऊन एखादा कोर्स करण्यापेक्षा बहिणीकडूनच मी शिकते, त्यामुळे वेळही जातो आणि काहीतरी शिकल्याचा आनंदही मिळतो. – काजल भद्रेसा
ग्रुपबरोबर धम्माल!
दिवाळीच्या सुट्टीत मी आणि माझ्या ग्रुपसोबत एकमेकांच्या घरी जातो. माझ्या ग्रुपमध्ये दहा जण आहेत. प्रत्येक दिवशी किमान दोन जणांच्या घरी जायचं आणि फराळाचा आस्वाद घ्यायचा. खरं तर त्यात फराळ कमी खाल्ला जातो आणि धम्माल जास्त केली जाते. त्यात प्रत्येकाच्या घरी गेल्यामुळे त्यांच्या आईवडिलांनासुद्धा बरं वाटतं. सगळ्यांकडे जाऊन आल्यानंतर एखाद्या आइस्क्रीम पार्लरमध्ये जाऊन, गप्पा गोष्टी करत आइस्क्रीम खातो. त्यानंतरसुद्धा वेळ उरलाच तर आम्ही फटाके लावतो. – पूजा गुप्ता
दिवाळी आजीच्या घरी !
आम्हाला फक्त दोन दिवसच सुट्टी असल्यामुळे मी माझ्या आजीकडे भाऊबीजेसाठी जाणार आहे. तिथे माझी सख्खी चुलत भावंड येतात. सणासुदीतच आम्ही एकमेकांना भेटतो. इतर वेळी सगळे कॉलेज आणि ऑफिसला असल्यामुळे भेटण्याचा कितीही विचार केला तरीही सगळ्यांच्या वेळा जुळणं अशक्यच असतं. रक्षाबंधन, भाऊबीज या अशा गोष्टी आहेत जिथे कोणतीही कारणं चालत नाहीत. या दिवशी आम्ही भेटून खूप मज्जा करतो. फटाके फोडण्यात पैसे वाया घालवण्यापेक्षा त्याच पैशाने आम्ही गरिबांसाठी मिठाई घेतो आणि ती त्यांना जाऊन देतो. – प्रीता झगडे
घरच्यांना मदत करतो !
माझ्या घरची परिस्थिती हालाखीची असल्यामुळे मला जेव्हा सुट्टी किंवा वेळ असेल तेव्हा मी काहीना काही काम करतो. कॉलेज सुरू असताना तितकासा वेळ मिळत नाही म्हणून सुट्टीत मी काम करतो. यावेळी मी साधा कंदिलांचा आणि फटाक्यांचा स्टॉल लावाला आहे. या कामात मला माझी लहान बहीण आणि आई मदत करते. या कामात मला बऱ्यापैकी पैसे मिळतात. माझ्या पैशांमुळे घरची परिस्थिती सुधारणारी नाही, पण किमान हातभार लागेल या उद्देशाने मी करतो. माझ्या घरच्यांना मदत करून मला बरं वाटतं. अशी आनंदात माझी सुट्टी जाते.- हितेश कदम