न्यायालयाच्या आदेशानुसार आम्ही सर्व गुंतवणुकदारांचे पैसे परत करणार आहोत, असे बांधकाम व्यावसायिक डी. एस. कुलकर्णी यांनी मंगळवारी पत्रकार परिषदेत सांगितले.
पुणे- न्यायालयाच्या आदेशानुसार आम्ही सर्व गुंतवणुकदारांचे पैसे परत करणार आहोत, असे बांधकाम व्यावसायिक डी. एस. कुलकर्णी यांनी मंगळवारी पत्रकार परिषदेत सांगितले.
माझे आयुष्य पारदर्शक आहे, मी कधीही काहीही लपवलेले नाही, कोणाला फसवले नाही, माझ्याबद्दल भरपूर अफवा पसरवल्या, त्यामुळे मी आज माध्यमांसमोर आलो. डीएसके समुहावर १५०० कोटींचे कर्ज असले तरी समुहाची ९१२४ कोटींची एकूण मालमत्ता आहे. त्यामुळे एकाही गुंतवणूकदारांचे पैसे ठेवणार नाही. गेले वर्षभर आर्थिक अडचणीमुळे आम्ही अनेकांचे पैसे परत करु शकलो नाही. पण, आता त्यातून बाहेर पडत असून पॉझिटिव्ह दिशेने आमचा प्रवास सुरु झाला आहे. उच्च न्यायालयात गुंतवणुकदारांचे पैसे परत कसे करणार याचा प्लॅन देणार असून न्यायालयाच्या आदेशानुसार आम्ही सगळ्यांचे पैसे परत करणार आहोत. फिनिक्स पक्षाप्रमाणे आम्ही पुन्हा भरारी घेऊ, असे डी. एस. कुलकर्णी यांनी सांगितले.
बांधकाम व्यावसायिक डीएसके यांच्याविरुद्ध गुंतवणुकदारांची फसवणूक केल्याप्रकरणी अनेक गुन्हे दाखल झाले आहेत. त्यांच्या अटकपूर्व जामीनावर येत्या शुक्रवारी उच्च न्यायालयात सुनावणी होणार आहे. यासंबंधीच्या विविध बातम्या प्रसिद्धी माध्यमे आणि सोशल मीडियावर येत असल्यामुळे गुंतवणुकदारांमध्ये संभ्रम निर्माण केला जात असल्याने आपण माध्यमांशी बोलण्याचा निर्णय घेतल्याचे कुलकर्णी यांनी सांगितले. पत्रकार परिषदेत त्यांच्या पत्नी हेमंती कुलकर्णी आणि मुलगा शिरीष कुलकर्णी हेही उपस्थित होते.
ते म्हणाले, आम्ही १९८० पासून बांधकाम व्यवसायासाठी मुदत ठेवी घेत असून नोव्हेंबर २०१६ पर्यंत कोणाचेही पैसे बाकी नव्हते. जानेवारी ते ऑक्टोबर २०१६ पर्यंत गुंतवणुकदारांचे अडीचशे कोटी रुपये परत केले आहेत. त्यानंतर आम्हाला पैशांची चणचण सुरु झाली. गुंतवणुकदारांचे पैसे वेळेत परत करण्यासाठी टोयोटा कंपनीतून येणारे पैसे आम्ही इकडे वळविले. खेळते भांडवल नसल्याने १३ गृहप्रकल्पाचे काम बंद पडल्याने आमच्या अडचणी वाढू लागल्या. त्यातूनही ऑक्टोबर २०१७ मध्ये आम्ही बाहेर आलो होतो, मात्र पोलिसांमध्ये तक्रार झाली. त्यामुळे आमच्या जागा विकत घेणारे मागे हटले. त्यामुळेच टोयोटोच्या शोरुम विकल्या गेल्या नाहीत. या शोरुम आम्ही पुन्हा सुरु करु.
इस्त्रायली कंपनीबरोबर आम्ही सोलापूर रोडला डायमंडचा सेझ प्रकल्प सुरु करणार होतो. सेझसाठी घेतलेली जमीन जर तो प्रकल्प ५ वर्षात उभा राहिला नाही तर, शेतक-यांना परत द्यावी लागते. ती परत करावी लागू नये, यासाठी या जमिनी प्रथम डीएसके कुटुंबियांच्या नावावर घेतल्या व नंतर त्या कंपनीला ५ ते १० टक्के चढ्या भावाने विकल्याचे डीएसके यांनी कबुल केले.
आमच्या मालमत्तेचा बँकांनी ताबा घेतला असला तरी त्याचा आमच्या व्यवसायावर कोणताही परिणाम होणार नाही. बंद पडलेल्या १३ गृहप्रकल्पाचे काम आम्ही सुरु करत आहोत. ते पूर्ण झाले की त्यातून २ हजार कोटी रुपये मिळतील़. ड्रीम सिटीतून १० हजार कोटी रुपये मिळू शकणार आहेत. आमच्या सर्व मालमत्तांची कमीतकमी किंमत गृहीत धरली तरी ती ९ हजार १२४ कोटी रुपये होत असून आमच्यावर जास्तीत जास्त १५०० कोटी रुपयांची देणी आहेत.
गुंतवणूकदारांचे नोव्हेंबर २०१७ अखेर १६५ कोटी रुपये देणे आहे. २०२० पर्यंत मुदत ठेवीचे आम्हाला ५८९ कोटी रुपये द्यायचे असून दरमहा मुदत पूर्ण होणा-या ठेवीचे पैसे देण्यासाठी साधारण १५ कोटी रुपये लागतात. त्याचा आराखडा आम्ही उच्च न्यायालयाला देत असून न्यायालयाच्या आदेशानुसार सर्वांचे पैसे परत देणार असल्याचे डी. एस. कुलकर्णी यांनी सांगितले.
जानेवारी २०१६ मध्ये बांधकाम क्षेत्रात मंदी आली होती. त्यात एप्रिल २०१६ मध्ये ठाण्यात बिल्डरने केलेल्या आत्महत्येमुळे व्यवसायावर मोठा परिणाम झाला. तसेच ड्रीम सिटीमध्ये गुंतवणुक करणारी इस्त्रायल कंपनीही बंद पडल्याने सेझ रद्द करावा लागला. त्याचवेळी मे २०१६ मध्ये आपल्याला झालेल्या अपघातामुळे कार्यालयीन कामकाज ढेपाळले. त्यातून गुंतवणुकदारांकडून मुदत ठेवींचे नुतनीकरण करणे बंद झाले. पैसे परत मागणे सुरु झाले. नोटाबंदीनंतर नवीन फ्लॅटचे बुकींग बंद झाल्याने रोखता संपली आणि गुंतवणुकदारांकडून पैसे परतीसाठी तगादा मागे लागल्याने आर्थिक अडचणीत आलो, असे त्यांनी सांगितले.
आपली कंपनी आर्थिक अडचणीत आल्यानंतर एका राष्ट्रीय पक्षाच्या अध्यक्षाने सुमारे १० महिन्यापूर्वी गुंतवणुकदार शोधण्यासाठी प्रयत्न केला होता, असे सांगून डीएसके म्हणाले, ड्रीम सिटीपेक्षा पाच पट मोठे प्रकल्प करणा-या या व्यावसायिकाने मंदीमुळे गुंतवणुक करण्यास नकार दिला. तसेच आमच्या कंपनीत असलेल्या आमच्याच कुटुंबातील एका सदस्याने माझ्या विरोधात माहिती पुरविली. गुंतवणुकदारांच्या बैठकीतील संभाषणापैकी डीएसके यांचे दीड हजार रुपयांचे चेक परत जातात. पत्नीला मुर्ख म्हणालो, असा व्हिडिओ काटछाट करुन व्हायरल केला. त्यामुळे अफवा पसरुन आमच्या अडचणीत वाढ झाली, असेही ते म्हणाले.