पावसाळा अद्याप संपलेला नाही. पावसाळय़ादरम्यान फर्निचर सुरक्षा फार महत्त्वाची असते. लाकडी फर्निचर असेल, तर अधिक काळजी घ्यावी लागते. फर्निचरची काळजी कशी घ्यावी, यावर टाकलेला प्रकाश.
फर्निचर लाकडाचे असेल किंवा विनिअरचा वापर केलेले असेल तर त्यावर पॉलिश करणे अधिक संयुक्तिक ठरते. लाकूड तसेच विनिअर या पूर्णत: नैसर्गिक वस्तू असल्याने त्यावरील रेषा, गाठी हेच त्याचे सौंदर्य असते. पॉलिशच्या वापराने हेच सौंदर्य आणखी उठावदार करता येते. याखेरीज लाकडामध्ये नैसर्गिक खाचखळगे असतील तर पॉलिश करताना ते कौशल्याने भरून काढून लाकडाला आश्चर्यकारक गुळगुळीत, चमकदार स्वरूप मिळते. शिवाय शेवटी यावर कॉम्प्रेसर मशीनचा वापर करून मॅलॅमाइन पॉलिशचा थर चढवला जातो. या पॉलिशमुळे लाकडावर एक प्रकारचे प्लास्टिकचे आवरण घातल्यासारखे होते. ज्यामुळे लाकडाला पाणी, वारा, इ. पासून संरक्षण मिळते आणि त्याचे रंगरूप थोडा अधिक काळ टिकण्यास मदत मिळते. पूर्वी काही काळ लाकडाचे फर्निचर रंगवण्याची देखील प्रथा आली होती. अर्थात आजही आपण ते करूच शकतो; पण त्यामुळे लाकडाचे नैसर्गिक सौंदर्य लोप पावते. शिवाय लाकडी फर्निचर रंगवण्यासाठी ज्या विशिष्ट रंगांचा वापर केला जातो ते रंग लाकडामध्ये काही प्रमाणात शोषले गेल्याने पुन्हा लाकडाला पूर्वीचे स्वरूप देणे जरा अवघड होऊन बसते. लाकडाचेच आधुनिक स्वरूप म्हणजे विनिअर. विनिअर म्हणजे चांगल्या प्रतीच्या लाकडाचे पातळ पापुद्रेच. बाजारात निरनिराळय़ा झाडांपासून तयार केलेले विनिअर मिळते. ज्यांच्या उपयोगाने आपण जणू त्याच झाडाच्या लाकडात फर्निचर बनविल्याचा आव आणू शकतो. याची निवड करताना हे एकाच झाडाचे आणि एकसारख्या रेषा आणि गाठी असणारे निवडून घ्यावे. विनिअरमुळे संपूर्ण लाकडात फर्निचर न बनवताही लाकडात फर्निचर बनविल्याचा आनंद आपण उपभोगू शकतो. यावर मात्र पॉलिशच आवश्यक. जर काही वर्षानी पुन्हा पॉलिश करत राहिले तर लाकूड काय किंवा विनिअर काय आपल्याला कायमस्वरूपी आनंद देत राहील.
आता थोडा लॅमिनेटचा विचार करू आणि त्याच्या वापराचा अभ्यास करू. खरे तर आता लॅमिनेट हा काही तसा आधुनिक वगैरे प्रकार राहिलेला नाही. प्रत्येक घरात लॅमिनेट लावलेले काही ना काही फर्निचर मिळेलच. प्लायवूड, पार्टीकल बोर्ड, एमडीएफ, एचडीएफ आदींपासून बनवलेल्या फर्निचरला टिकाऊ आणि सुंदर बनवण्याचे काम लॅमिनेट चोख बजावते. पूर्वीपेक्षा आता बाजारात क्रांती झाल्याप्रमाणे लॅमिनेटचे निरनिराळे प्रकार उपलब्ध आहेत. काही लॅमिनेट तर विनिअरलादेखील मागे टाकतील, इतके सुंदर असतात. याची जमेची बाजू म्हणजे एक तर लॅमिनेट अनेकविध रंगात आणि अनेकविध पोत यामध्ये सहज उपलब्ध होते. शिवाय लॅमिनेट लावल्यानंतर विनिअर अथवा लाकडाप्रमाणे पॉलिशची वगैरे भानगड नसते. अर्थात देखभालीचा खर्च कमी असतो. याला ओल्या कपडाने पुसून काढले, तर चकचकीत नव्यासारखे दिसते.
लॅमिनेट लावत असताना घ्यायची महत्त्वाची काळजी म्हणजे शक्यतो फर्निचरच्या आतील आणि बाहेरील अशा दोन्ही बाजूंना लॅमिनेट लावावे. यातून फर्निचरचा टिकाऊपणा तर वाढतोच, पण त्याचसोबत प्लायवूडला वक्रता येत नाही. आणखी एक मुद्दा, जो सर्वसामान्यांना माहीत नसतो, तो म्हणजे लॅमिनेटची जाडी. प्रत्येक कंपनीप्रमाणे लॅमिनेट निरनिराळ्या जाडींत उपलब्ध होते. साधारण २० ते २५ वर्षापूर्वीपर्यंत सर्रास दीड मिलिमीटर जाडीचे लॅमिनेट मिळत असते. परंतु, आज मात्र एक मिलिमीटर जाडीचे लॅमिनेट प्रमाण (स्टँडर्ड) समजले जातात. क्वचित काही कंपन्या दीड मिमी जाडीचेही लॅमिनेट बनवतात. परंतु, त्यावरही काही मर्यादा आहेत. त्या लक्षात घेता एक मिमी जाडीचे लॅमिनेट वापरायला काही हरकत नाही; परंतु त्याहून पातळ लॅमिनेट मात्र शक्यतो टाळावे. अगदी स्वस्त असले तरी वापरू नये.
फर्निचर हे दर सहा महिन्यांनी बदलता येत नाही. वर सांगितलेल्या गोष्टी फर्निचरचे रंगरूप तर खुलवतात. पण त्याचबरोबर फर्निचरचा टिकाऊपणा देखील वाढवण्यास मदत करतात. सर्वात महत्त्वाचे म्हणजे फर्निचर हाताळण्यायोग्य बनतात. फर्निचरची वेळीच काळजी घेतली तर त्यांचे आयुष्य वाढेल. पावसाळय़ात थोडी जास्त घेतली तर फर्निचरबाबत सातत्याने काळजी घेण्याची गरज नाही.