‘पीजी’मध्ये राहायला येणा-या लोकांकडून एक महिना भाडे, एक महिना डिपॉझिट अशी रक्कम घेतली जाते. शिवाय एक महिन्याचे भाडे ब्रोकरेज म्हणून घेतले जाते. ते एजंटला जाते. पण, विकासकाला किंवा सदनिका मालकाला दोन महिन्यांचे भाडे मिळते.
मुंबईत चरितार्थासाठी, नोकरी धंद्यासाठी म्हणून येणारांचा ओघ सतत असतो. परंतु, मुंबईत यायला काही कोणाची हरकत नसते पण, प्रश्न असतो तो मुंबईत राहायचे कुठे याचा. मुंबईत असंख्य टॉवर, इमारती, बिल्डिंग, चाळी तयार होत असतात. यात अधिकृत-अनधिकृत बांधकामेही खूप असतात. त्यामुळे अशा ठिकाणी नेमके कुठे राहायचे असा प्रश्न बाहेरून आलेल्यांना पडत असतो. अशांसाठी विकासकांनीच आपल्या एजंटमार्फत सुरू केलेला आणि गेल्या ५ वर्षात जोरात विकसित झालेला व्यवसाय म्हणजे पीजी अर्थात पेइंग गेस्ट व्यवसाय.
कोसळलेली अर्थव्यवस्था, विकासकांच्या पडून राहिलेल्या सदनिका यामुळे एक मोठी अर्थव्यवस्था ब्लॉक झालेली आहे. एका टॉवरमध्ये चाळीस सदनिका असतील आणि त्यातील ३० सदनिका विकल्या गेल्या आणि दहा सदनिका शिल्लक राहिल्या असतील, तर त्या दहा सदनिकांचे पैसे अडकून पडतात. विकासकाचा पैसा ब्लॉक होतो. त्यामुळे नवा प्रोजेक्ट अडकून पडतो. ही अर्थव्यवस्था सुरळीत चालण्यासाठी रोटेशनला पैसा मोकळा होणे गरजेचे असते. त्यासाठी बहुतेक विकासकांनी आता पीजी अर्थात पेइंग गेस्ट ठेवण्याचा व्यवसाय सुरू केला आहे.
मुंबईतील पश्चिम उपनगरातून विरार ते चर्नीरोड आणि मध्य रेल्वेमार्गावरील कल्याण ते दादर तसेच हार्बर मार्गावर पनवेल ते वाशी दरम्यान शेकडो विकासकांनी आपल्या टॉवरमधील अनेक सदनिका या पीजी व्यवसायासाठी दिलेल्या आहेत. यामध्ये दराप्रमाणे जास्तीत जास्त सुविधा देऊन कमी जागेत चांगले उत्पन्न मिळवण्याची संधी आहे. त्यामुळे सेकंड होमप्रमाणे पीजी व्यवसायासाठी सदनिका खरेदी करण्याचाही कल वाढलेला आहे. विकासक सेकंड होमप्रमाणे पीजी बिझनेससाठी सदनिका उपलब्ध करून देऊन आपला पैसा मोकळा करताना दिसत आहेत.
पीजीमध्ये राहायला येणा-या लोकांकडून एक महिना भाडे, एक महिना डिपॉझिट अशी रक्कम घेतली जाते. शिवाय एक महिन्याचे भाडे ब्रोकरेज म्हणून घेतले जाते. ते एजंटला जाते. पण, विकासकाला किंवा सदनिका मालकाला दोन महिन्यांचे भाडे मिळते. एका फ्लॅटमध्ये कमीतकमी ६ ते प्लॅटच्या आकारानुसार ८ ते १० बेड टाकून जागा राहायला दिली जाते. यामध्ये प्रत्येकाला स्वतंत्र कपाट, वायफाय, गीझर गरम पाणी, किचन आणि हॉल कॉमन वापरासाठी, वॉशिंग मशीन, मायक्रोवेव्ह ओव्हन, इस्त्री, मिक्सर, टीव्ही, फ्रीज अशा सर्व अॅमिनीटीज दिल्या जातात. त्याचप्रमाणे पार्किंगची व्यवस्था असते. त्यामुळे बाहेरून आलेला नोकरदार अगदी राजीखुशीने पैसे देऊन आनंदात राहतो. अनेक ठिकाणी सफाईसाठी स्वतंत्र व्यवस्था असते आणि केअरटेकरही ठेवलेला असतो. हा केअरटेकर जेवण, चहा, नाष्टय़ाचीही सोय करतो. त्यामुळे सगळे काही एकाच ठिकाणी उपलब्ध होते.
मुंबईत येणा-या आयटी सेक्टर, कॉलसेंटर, मल्टीनॅशनल कंपन्या आणि अन्य खासगी सरकारी नोकरदारांना ही पीजी व्यवसायाची सुविधा म्हणजे वरदान ठरते आहे. पश्चिम उपनगरात बोरिवली ते दादर या भागात पीजीचे दर जास्त आहेत. मध्य मुंबई उपनगरात भांडुप, पवई, कांजूरमार्ग आणि मुलुंडमधील दर जास्त आहेत. तर नवी मुंबईतील नेरुळ, जुईनगर, कामोठे या भागात स्वस्त दरात पीजी उपलब्ध होतात.
विकासक आपल्या काही सदनिका काही व्यवसायिक एजंट अथवा कंपन्यांना तीन ते पाच वर्षाच्या कराराने भाडय़ाने देतात. त्यापोटी डिपॉझिट आणि काही रक्कम आगाऊ घेतली जाते. त्या सदनिकेत तो एजंट अनेक पीजी ठेवून दुप्पट कमाई करतो. ८०० चौरस फुटांचा एक ३ बीएचके फ्लॅट २५ हजार रुपये भाडय़ाने घेतला, तर त्या सदनिकेतील ३ बेडरूममध्ये प्रत्येकी ३ आणि हॉलमध्ये ४ असे पीजी ठेवले, तर १३ जणांची राहण्याची सोय होते. प्रत्येकाकडून महिना ५ हजार घेतले, तर साठ ते पासष्ठ हजार रुपये मिळकत होते. त्यातील २५ हजार गेले आणि लाईट व इतर खर्च गेला, तर महिना ३५ हजार रुपये उत्पन्न एका सदनिकेतून मिळवले जाते. असे सदनिकेच्या दर्जानुसार कमी जास्त दर ठरतात. पण, यामुळे विकासकाला दरमहा सदनिकांचे भाडे आणि डिपॉझिट मिळत असल्यामुळे त्याचा अडकलेला पैसा वसूल होतो.
भांडुपची ड्रीम्स सोसायटी, ठाण्यातील कळवा, वर्तकनगर भाग आणि मालाडमधील एव्हरशाईनगर या भागात मेट्रो ट्रेनच्या कामासाठी आलेले बाहेरगावचे इंजिनीअर, मॉल आणि मल्टिनॅशनल कंपन्यांमधील कर्मचारी यांचा मोठा राबता असल्यामुळे त्यांना याचा फायदा होतो.
पीजी व्यवसायासाठी अनेकांनी साईटही काढलेल्या आहेत. या संकेतस्थळावरून तुम्ही भारताच्या कानाकोप-यातून कुठूनही पीजी बुक करून अचानक राहायला येऊ शकता. मॅजिक ब्रिक, सुलेख, नो ब्रोकर अशा अनेक संकेतस्थळांमार्फत अशा एजंट आणि विकासकांशी संपर्क साधून आपला मुंबईतील राहण्याचा प्रश्न सोडवता येतो.
दरपत्रक
>> ठाणे ५०००
>> मुलुंड ६०००
>> भांडुप ६५००
>> पवई १००००
>> मालाड ८०००
>> बोरिवली ५०००
>> कांदिवली ६०००
>> दादर १००००
>> बांद्रा १००००
>> गिरगांव चर्नी रोड ८०००
>> नेरूळ ४०००
>> कामोठे ४०००
>> जुईनगर ३०००
>> कळवा ३०००
>> डोंबिवली ४०००
>> कल्याण ३५००