सावंतवाडी शहरातील सालईवाडा भागातील लोकांचे श्रद्धास्थान असलेल्या एका मंदिरालगतच्या तुळजा बिल्डर्स या निवासी संकुलातील सांडपाणी रस्त्यालगतच्या उघड्या गटारात वाहत असल्याने येथील रहिवाशांनी नगराध्यक्षांची भेट घेत बिल्डरच्या या कृत्याबाबत तीव्र नापसंती व्यक्त केली होती.
सावंतवाडी– सावंतवाडी शहरातील सालईवाडा भागातील लोकांचे श्रद्धास्थान असलेल्या एका मंदिरालगतच्या तुळजा बिल्डर्स या निवासी संकुलातील सांडपाणी रस्त्यालगतच्या उघड्या गटारात वाहत असल्याने येथील रहिवाशांनी नगराध्यक्षांची भेट घेत बिल्डरच्या या कृत्याबाबत तीव्र नापसंती व्यक्त केली होती. हा प्रकार सुधारण्यासाठी तीन महिन्यांची मुदत देण्यात आली आहे. तरीही या प्रकारामुळे सावंतवाडी शहरातील एकूणच वाढत्या संकुलांच्या उभारणीत सांडपाणी व्यवस्थापनाचा विषय ऐरणीवर आला आहे. न. प.च्या दुर्लक्षामुळे किंबहुना आशीर्वादामुळे तसेच ‘बिल्डरराज’ला पाठीशी घालण्याच्या धोरणामुळे नागरिकांमध्ये तीव्र असंतोष पसरला आहे.
सावंतवाडीतील वाढत्या शहरीकरणामुळे पर्यावरण व न. प.चे नियम धाब्यावर बसवून ठिकठिकाणी निवासी व व्यापारी संकु ले उभारली जात आहेत. अगदी नरेंद्र डोंगराच्या पायथ्यापासून माजगाव-कोलगाव-चराठा हद्दीपर्यंत या इमारतींचे जाळे पसरले आहे. बहुतांश इमारत बांधकामधारकांनी सांडपाण्याची विल्हेवाट लावण्याची सोय न केल्याने हे सांडपाणी इतस्त: उघडय़ा गटारात सोडण्यात येते. शिवाय इमारती बांधताना बांधकाम विभागाच्या नियमांचे उल्लंघन केले असतानाही या इमारतींना पूर्णत्वाचा दाखला देण्यात येतो. तर दुसरीकडे झाडांची कत्तल करून इमारती उभारल्या जात आहेत. तोडलेल्या झाडांऐवजी नवीन झाडे लावणे बंधनकारक आहे. मात्र, प्रत्यक्षात या बिल्डरनी झाडे लावल्याचे दिसत नाही.
१९९०-१९९५नंतर हळूहळू शहरात ‘बिल्डरराज’ घुसू लागले. वाढत्या शहरीकरणामुळे येथे निवासी व व्यापारी संकुले उभारण्याची संस्कृती उदयास आली. ठिकठिकाणी टोलेजंग इमारती उभारल्या जात आहेत. सावंतवाडी शहरात सुमारे ९०० निवासी संकुले तसेच बाजारपेठेत व्यापारी संकुले बांधण्यात आली आहेत. सांडपाण्याची योग्य पद्धतीने विल्हेवाट लावणे कायदेशीर असतानाही प्रत्यक्षात तसे दिसत नाही. बहुतांश बिल्डरांनी संकुलातील पाणी रस्त्यालगतच्या गटारात सोडले आहे. शहरातील मध्यवर्ती ठिकाणी असलेल्या इंदिरा गांधी व्यापारी संकुलातील एका चप्पल दुकानालगत असलेल्या जलवाहिनीमधून सांडपाणी रस्त्यावर वाहत असून चप्पल दुकानातही ते घुसत असल्याचे दिसून आले आहे.
सालईवाडा भागातील संचयनी बिल्डिंग परिसरातील एका संकुलातही अशीच समस्या असून या संकुलातील सांडपाणी गटारात उघडय़ावर सोडल्याने रहिवाशांमध्ये तीव्र नाराजी आहे. सावंतवाडी शहरात उभारण्यात आलेल्या इमारती या न. प.च्या नियमांचे उल्लंघन करून उभारल्या जात आहेत. सांडपाणी ऐतिहासिक मोती तलावात सोडण्याचे कृत्यही काही बांधकाम व्यावसायिकांनी केले आहे. असे असतानाही न. प.ने अशा इमारतींना पूर्णत्वाचा दाखला दिलेला आहे. वेळोवेळी लक्षात आणून देऊनही देऊनही न. प. प्रशासन बिल्डरनाच पाठीशी घालत असल्याचे निदर्शनास आले आहे.
सावंतवाडी शहरातील सांडपाणी व्यवस्थापनाची समस्या प्रकर्षाने पुढे येत असतानाच बिल्डर्सबरोबरच खासगी इमारतीमधील सांडपाणी गटारात सोडण्याचे प्रकार वाढीस लागत आहेत. शहरातील जिमखाना परिसरातील एका विख्यात रुग्णालयात रुग्णांच्या धुतलेल्या कपडयांचे पाणी समोरील रस्त्यालगतच्या गटारात सोडण्यात येत आहे. विविध आजारांनी त्रस्त असलेल्या रुग्णांच्या कपडयांचे जंतूचा प्रादुर्भाव असलेले हे पाणी गटारात येत असल्याने परिसरातील नागरिकांचे आरोग्य धोक्यात आले आहे. याबाबत नागरिकांनी आवाज उठवूनही न. प. प्रशासन त्याकडे जाणीवपूर्वक दुर्लक्ष करीत असल्याचे दिसत आहे.