मुंबई महापालिकेने आपल्या ताब्यातील कांदिवलीतील क्रीडांगणाचा भूखंड मुंबई क्रिकेट असोसिएशनला (एमसीए) दिल्यानंतर त्या ठिकाणच्या मैदानावर एमसीएच्या वतीने क्लब उभारण्यात आला.
मुंबई- मुंबई महापालिकेने आपल्या ताब्यातील कांदिवलीतील क्रीडांगणाचा भूखंड मुंबई क्रिकेट असोसिएशनला (एमसीए) दिल्यानंतर त्या ठिकाणच्या मैदानावर एमसीएच्या वतीने क्लब उभारण्यात आला. परंतु या क्लबवर सुधार समिती सदस्य तथा प्रभागातील स्थानिक नगरसेवकांना सदस्यत्व देण्याचा ठराव महापालिका सभागृहात होऊनही या ठरावाला वाटाण्याच्या अक्षता लावण्यात येत आहेत. याबाबतचे सदस्यत्व देण्यास एमसीएकडून चालढकल केली जात असून ठराव होऊन अकरा वर्षे उलटत आली तरी याची अंमलबजावणी केली जात नाही. सदस्यत्व देण्याची काटेकोरपणे अंमलबजावणी करण्याकरता ‘एमसीए’ला लेखी कळवले असले, तरी क्लबच्या व्यवस्थापकांकडे कोणतेही उत्तर नाही.
मुंबईतील कांदिवली (प.) महावीरनगर येथील क्रीडांगणाचा भूखंड क्रिकेट अॅकॅडमी तथा क्रीडा-नि-मनोरंजन मैदान संकुल उभारण्यासाठी मुंबई क्रिकेट असोसिएशनला स्वीकृती तत्त्वावर विकास व देखभालीसाठी देण्यात आला होता.
२००४ रोजी हा भूखंड दिल्यानंतर २०१३मध्ये त्याचे उद्घाटन करून या संकुलाचे नाव सचिन तेंडुलकर क्रीडा संकुल असे करण्यात आले. ही जागा या क्लबला देण्याच्या प्रस्तावाला २००५मध्ये महापालिका सभेत मंजुरी देण्यात आली. त्यामध्ये तब्बल ३९ हजार ९५० चौरस मीटर क्षेत्रफळाची जागा महापालिकेने काळजीवाहू तत्त्वावर देण्याचा ठराव करतानाच क्लबचे सदस्यत्व संबंधित प्रभाग समितीच्या सर्व नगरसेवकांना त्याच्या पदाच्या कालावधीकरता देण्याचा ठरावही करण्यात आला.
परंतु प्रत्यक्षात क्रीडा संकुलाचे उद्घाटन होऊन संकुल सुरू झाल्यानंतरही येथील क्लबचे सदस्यत्व नगरसेवकांना देण्यात आलेले नाही. त्यामुळे जुलै २०१५मध्ये हा प्रस्ताव फेरविचार करण्यासाठी सुधार समितीपुढे मांडण्यात आला. त्यामध्ये सुधार समितीने १३ प्रश्न उपस्थित करत एमसीएकडून खुलासा मागितला होता. परंतु या १३ प्रश्नांची उत्तरे देताना पुन्हा एकदा नगरसेवकांच्या मागण्यांना हरताळ फासला आहे.
सन २००५च्या ठरावाच्या अनुषंगाने सुधार समिती सदस्यांनी उपस्थित केलेल्या प्रश्नांच्या अनुषंगाने क्लबचे सदस्य प्रभाग समितीतील सदस्यांना त्यांच्या पदाच्या कालावधीकरता देण्याची काटेकोरपणे अंमलबजावणी करण्याकरता एमसीएला लेखी आदेश दिले असल्याचे सचिन तेंडुलकर क्रीडा संकुलाच्या व्यवस्थापकांनी स्पष्ट केले आहे. त्यामुळे मागील दहा वर्षात याची अंमलबजावणी न करणा-या एमसीएने सहा महिन्यांपूर्वी एमसीएला खरमरीत प्रश्न करून फैलावर घेतल्यानंतरही पुन्हा महापालिकेची बोळवण केली असल्याचे दिसून येते.
क्रीडा संकुल सुरू होऊन दोन ते अडीच वर्ष होत आले; परंतु लाखो रुपये देऊन सदस्यत्व दिले जात असताना, ज्या महापालिकेने भूखंड दिला, त्यांच्या विश्वस्तांना डावलून महापालिकेच्या अधिका-यांनाही विचारले जात नाही. त्यामुळे महापालिकेने एमसीएसह जे ९ भूखंड काळजीवाहू तत्त्वावर देण्यात आले आहेत, ते परत घेण्यात यावेत, ही नगरसेवकांची मागणी असल्याचे सुधार समिती सदस्य संतोष धुरी यांनी स्पष्ट केले.
चांगल्या प्रकारच्या देखभालीसाठी शुल्क अधिक
सुधार समिती अध्यक्ष प्रकाश गंगाधरे यांच्यासह माजी महापौर श्रद्धा जाधव, शुभा राऊळ, मोहन मिठबावकर, जोत्स्ना दिघे, डॉ. अजंता यादव,गीता यादव आणि चेतन कदम आदींनी कांदिवलीतील एमसीएच्या क्रीडा संकुलाला भेट दिली. यावेळी सदस्यांनी महापालिकेच्या ठरावाची आठवण करून दिली.
याबाबत एमसीएचे ऑपरेशनल मॅनेजर कुराडे यांनी या सर्व सूचना एमसीएच्या व्यवस्थापन समितीपुढे मांडण्यात येतील आणि असोसिएशनचे सदस्यत्व मिळण्याबाबत व्यवस्थापन समितीचा निर्णय लवकरात लवकर कळवण्यात येईल,असे स्पष्ट केले. परंतु याच वेळी सदस्यत्वाचे शुल्क जास्त घेत असल्याचा खुलासा करताना, त्यांनी सदस्यत्व शुल्क कमी घेतले असते तर इतक्या चांगल्या प्रकारे देखभाल ठेवणे शक्य झाले नसते,असे स्पष्ट केले.
विक्रमवीर सचिन तेंडुलकर क्रीडा संकुलात बार, रेस्टॉरंटला परवानगी
कांदिवलीतील एमसीएच्या विक्रमवीर सचिन तेंडुलकर क्रीडा संकुलातील क्लबमध्ये बार, रेस्टॉरंट उभारण्यात आले असून त्यांनी कोणत्याही प्रकारची परवानगी घेतली नसल्याची तक्रार सुधार समितीच्या सभेत सदस्यांनी केली होती. परंतु विकास नियंत्रण नियमावली १९९१नुसार अशा प्रकारच्या क्रीडा संकुलामध्ये बार, रेस्टॉरंट व कार्डरूम यांच्या बांधकामास निर्बंध घालण्यात आलेले नाहीत. त्यामुळे प्रस्तावातील अटी व शर्तीचे उल्लंघन झाले नसल्याचे महापालिकेने म्हटले आहे.